‘खुला सीमानाकासे लागू पदार्थ प्रयोगमे बह्रलै’
पहुरा समाचारदाता
धनगढी, १ पुस । खुला सीमा ओ सहज रुपमे मदिरा उपलब्धताके कारणसे समाजमे मदिरा तथा लागू पदार्थ प्रयोग न्यूनीकरणमे समस्या रहल एक कार्यक्रमके सहभागीहुक्रे बटैले बटैं ।
सिविन नेपालके योजनामे शुकके रोज धनगढीमे हुइल मदिरा प्रयोग न्यूनीकरण तथा लागू पदार्थ प्रयोगके विरुद्ध सरोकारवालाहुकनबीच हुइल अन्तरक्रिया कार्यक्रमके सहभागीहुक्रे मदिरा प्रयोग कम करेक लाग सरकारसे बनाइल नीति नियमके कार्यान्वयन, नियमन ओ अनुगमन करेपरना बटैले रहैं ।
सिविनके प्रबन्धक सिद्धराज पनेरू कार्यक्रमके आधारपत्र प्रस्तुत करटि मदिरा सेवनसे समाजमे हुइना
असरके बारेमे जानकारी करैले रहैं । उहाँ कलैं, “मदिराके सेवन कलेक विकासके बाधक हो । टबेमारे मदिरा न्यूनीकरणमे सक्कु सरोकारवालाके महत्वपूर्ण भूमिका रहठ ।”
उहाँ मदिराके प्रयोगसे महिलामे गुणस्तरीय प्रजनन स्वास्थ्य तथा मानसिक स्वास्थ्यमे असर, मृत्यु हुइना, परनिर्भरता बह्रना, एचआइभीके जोखिम बह्रे सेक्न बटैलैं । ओस्टेक, किशोरकिशोरीमे स्वास्थ्य, मानसिक, सामाजिक रूपमे असर, हेपाइ खेपे परना, एन्टी सोसियल, ड्रगजैसिन औरे नसा सेवनओर लग्ना हुइ सेक्ना बटैलैं ।
मदिरा प्रयोगसे बालिबालिकामे दुव्र्यवहार, विद्यालय छोरना, घरे पह्रना वातावरण नैरना, परिवारमे समस्या, खाद्य समस्या, गरिबी बह्रना, पारस्परिक सम्बन्धमे समस्या, लैंगिक हिंसामे बृद्धिलगायतके समस्या हुइना बटैलैं । उहाँ सीमा क्षेत्रमे मदिरा तथा लागू पदार्थ प्रयोगके अवस्था और डरलग्टिक रहल बटैलैं ।
कार्यक्रममे जिल्ला प्रहरी कार्यालयके नविनसिंह धामी जिल्लामे अन्य घटनाके उजुरीसे लागू पदार्थके उजुरी बह्रल बटैलैं । उहाँ खुला सीमाके कारणसे लागूऔषध प्रयोग न्यूनीकरणमे समस्या रहल जानकारी करैलैं ।
धनगढी उपमहानगरपालिकाके अनिता बुढाऐर पालिका किशोरकिशोरीहुकनके लागू पदार्थ दुव्र्यसनीसे जोगैना वडास्तरसे कार्यक्रम लागू करल जानकारी करैलि ।
दलित महिला अधिकार मञ्चके परियोजना संयोजक बिमला कडायत मदिरा सेवनके कारण बालविवाह बृद्धि तथा विद्यालय छोरना संख्या बह्रल ओरसे हिनहे स्थानीय तहसे अनुगमन ओ नियमन करेपरनामे जोड डेलि ।
कार्यक्रममे पिसविन नेपालके हर्कबहादुर ओली मदिरा प्रयोग कम करेक लाग अपने घरसे सुधार करेपरना बटैलैं । कार्यक्रममे “बालबालिका राष्ट्रिय गौरव हुइट” दृष्टिकोण ओ आधार, बालबालिकाके अनलाइन यौन शोषण विरुद्ध सरोकारवालाहुकनके भूमिका, बालबालिकाके अनलाइन संरक्षणके लाग हम्रे नवयुगहुकनके जागरुकतालगायत विषयमे छलफल तथा सिविनसे सञ्चालित बाल हेल्पलाइन पैसा नैलग्ना फोन नम्बर १०९८ बारे जानकारी कराइल रहे ।
कार्यक्रममे कमला साउँद, पशुपति खाती, कुम्भराज भट्ट, तेज बोहरालगायत मन्तव्य व्यक्त करले रहैं । कार्यक्रमके सहजीकरण सिविनके कार्यक्रम संयोजक हरिलाल चौधरी करले रहैं ।
