विपद जोखिम न्यूनिकरणबारे वहुसरोकारवाला निकायविच छलफल
पहुरा समाचारदाता
धनगढी, ११ चैत । विपद जोखिम न्यूनिकरण तथा व्यवस्थापन कार्यके स्थानीयकरणके लाग बहुसरोकारवाला निकायविच छलफल हुइल बा ।
मानवीय सहयता साझेदारी मञ्चके आयोजनामे हुइल कार्यक्रमके वडका पहुना आन्तरिक मामिला तथा कानून मन्त्रालय सुदूरपश्चिम प्रदेशके सहसचिव विश्वदिप बेस्रा विपदके बेला भारी जोखिम आई सेक्ना कहटी विपद कोष स्थापनामे जोड डेले बटै ।
विपदके बेला जबफे औरे जनहनसे हात फैलाई पर्ना अवस्था रहठ,’ सहसचिव बेस्रा कहलै, ‘विपद जोखिमके लाग कोष स्थापना करे सेक्लेसे आत्मनिर्भरफे हुई सेक्जाई ।’ बन्चितिकरणमे परल समुदाय, अपाङगता भएका व्यक्ति, महिला तथा बालबालिका विपदके बेला ढेर जोखिममे पर्ना करल उहाँ बटैलै ।
सहसचिव बेस्रा विपद जोखिम न्यूनिकरण तथा व्यवस्थापन कार्यके स्थानीयकरणके लाग बहुसरोकारवाला निकायविच अनुभव अदानप्रदान कैना जरुरी रहलफे बटैलै ।
निडस नेपालके कार्यकारी निर्देशक भवराज रेग्मी विपद जोखिम सम्बन्धी कार्यपत्र प्रस्तुत करटी सुदूरपश्चिम प्रदेश ओ कर्णाली प्रदेश विपद जोखिमके दुष्टिमे उच्च जोखिममे रहल बटैलै । ओस्टेक करके बहुआयमिक गरिबीके दृष्टिमेफे सुदूरपश्चिम प्रदेश आघे रहल ओरसे विपद जोखिमके क्षेत्रमे काम कैना सरकारी तथा गैरसरकारी एकबद्ध हुके जाई पर्ना उहाँ बटैलै ।
गैरसरकारी संस्था महासंघ सुदूरपश्चिम प्रदेश अध्यक्ष देवी खनाल स्थानीय सरकार जनताका लग्गेक सरकार हुइल ओरसे विपदके जोखिमके क्षेत्रमे काम कैना सरकारी तथा गैरसरकारी स्थानीय सरकारसंग सहकार्य करके आघे बढना सुझाव डेलै । प्रदेशभिटर ढेर बस्ती विपदके जोखिममे रहल बस्ती स्थान्तरण करे पर्ना अवस्थामे समेत रहल उहाँ बटैलै ।
यूएनडीपीके कृष्णप्रसाद भट्टराई विपद सक्कुहुनके लाग अइना मने सबसे ढेर प्रभावित पाछे परल समुदाय परटी करल बटैलै । विपदके बेला आइल महिला, बालबालिका तथा अपाङगता हुइल व्यक्ति हिंसामे समेत पर्ना करल उहाँ बटैलै ।
यूएनडीपीके जयन्ती गिरी सिंह यूएनडीपी टमान विपदके बेला महत्वपूर्ण भूमिका निर्वाह करल बटैली उहाँ सुपर परियोजना मार्फत विपद जोखिम न्यूनिकरणमे काम करटी रहल जानकारी डेटी तीन तहके सरकार विच तलमेल करटी आघे बह्रना सुझाव डेली ।
जिल्ला प्रशासन कार्यालय कैलालीके फोकल पर्सन शिवराज जोशी डिओसी अपनही अपाङता अवस्थामे रहल बटैलै । उहाँ कहलै, हम्रे विपदमे ढेर काम करे नइसेक्ठी । हमारथेन जनशक्ति ओ आर्थिकफे ढेर नइरहठ । विपदके बेला मानविय सहायता ओ आर्थिक चाहठ मने हम्रे ओकर लाग और जनहनसे कहे पर्ना रहल उहाँ बटैलै ।
ओरेक नेपालके जिल्ला संयोजक विनु राना गैल बर्खाक बाढके बेला कैलारी ओ भजनीमे अपनेहुक्रे स्नेह केन्द्र स्थापना करके सुत्कोरी महिलाहुकनहे सेवा डेहल बटैली ।
सामाजिक विकासका लागि सचेत समाजके अध्यक्ष बलबहादुर शिलाधर विपदमे परल समुदाय लडिया किनार, बन जंगलके छेउछाउमे जाके बैठना बाध्य हुइल बटैलै ।
कार्यक्रममे डिआरआर के फोकल मोइल लक्ष्मीप्रसाद जोशी विपदके क्षेत्रमा काम कैना सरोकारवाला एक ठाउँमे आके समस्याके समाधान खोजके आघे बह्रना जरुरी रहल बटैलै ।
कार्यक्रमे पत्रकार कर्ण शाह, लुथरन विश्वफेडरेशनके चेतमान साउँद, कैलाली उद्योग वाणिज्य संघके गोमा आचार्य लगायतसे विपद जोखिम न्यूनिकरण तथा व्यवस्थापन कार्यके स्थानीयकरणके लाग बहुसरोकारवाला निकायविच छलफल जारी राखे पर्ना लगायत सुझाव डेले बटै ।
निडस नेपालके अध्यक्ष दुर्गा खरेलके अध्यक्षतामे हुइल कार्यक्रममे सहजीकरण निडस नेपालके कार्यक्रम निर्देशक विनोदसिंह कडरा करले रहिट । कार्यक्रममे विपद जोखिम न्यूनिकरण तथा व्यवस्थापनमे काम कैना बहुसरोकारवाला निकायके प्रतिनिधिहुकनके सहभागिता रहल रहे ।
