ओेरेकमे २१ सय ९६ ठो घटना दर्ता
पहुरा समाचारदाता
धनगढी, १९ चैत । महिला पुनस्र्थापना केन्द्र (ओरेक नेपाल) कैलालीमे २ हजार १९६ ठो हिंसा प्रभावितहुकन मुद्दा दर्ता हुइल बा ।
३२औं स्थापनाके अवसरमे संगालो प्रदर्शनी तथा अन्तरक्रियामे ओरेक कैलालीके कार्यक्रम अधिकृत गीता चौधरी स्थापना काल २०६४ बैशाखसे २०७९ चैतसम महिला हिंसाके ओटरा घटना दर्ता हुइलक बटैली । उहाँ कहली, अब्बेसम दर्ता हुइल घटना मध्ये ४५३ ठो घटनाके फैसला हुसेकल, ४४२ ठो मिलापत्र हुइल, ५६२ मुद्दा दर्ता बा । ओस्टेके ६९५ जाने महिलाहुकनहे सुरक्षा आवाससे सेवा डेहल उहाँ बटैली ।
कार्यक्रममे ओरेक नेपालके केन्द्रीय सदस्य संगीता अधिकारी अपनेहुक्रे महिला हिंसा न्यूनिकरण करेक लाग अभियानके रुपमे आघे बह्रल बटैली ।
सुदूरपश्चिम प्रदेशमे महिला हिंसाके अवस्था हेरेबेर दर्दनाक अवस्था बा,’ उहाँ कहली, यहाँक महिला घरेलु हिंसासे ढेर पीडित बटै । टमान मेरिक कुप्रथा जर गारके बैठल बा । बालविवाह, बहु विवाहके कारण महिला पीडित हुइल डेखल बा ।’
पितृसत्तात्मक सोच पुरुषसंगे महिलाफे रहल उहाँ बटैली । ओरेक नेपालके अभियानहे सरोकारवाला निकायसँगे संचारकर्मीनकेफे साथ ओ सहयोग पाइल उहाँ बटैली ।
गैरकारी संस्थाके केन्द्रीय सदस्य सावित्रा घिमिरे महिलाहुकनहे न्याय संगसगे राजनितिक, आर्थिक, सामाजिक अधिकार डेहे पर्ना जरुरी रहल बटैली । हयावीटयाट फर हुमानिटी नेपालके पुनिता चौधरी महिलाहुकनहे आर्थिक रुपमे बल्गर बनाइक लाग भूमिके स्वामित्व डेहे पर्ना बटैली । उहाँ कहली, महिलाहुक्रे आर्थिक रुपमे कम्जोर हुइल कारण गोसिया, घरपरिवारसे पीडित हुई परल अवस्था बा ।’
कार्यक्रममे जिल्ला प्रहरी कार्यालय कैलालीके महिला सेल प्रमुख सरस्वती अधिकारी, नेपाल पत्रकार महासंघके केन्द्रीय सचिव हेमकर्ण विक, जिल्ला अध्यक्ष हिमालय जोशी, गौरीगंगा नगरपालिकाके सूचना अधिकारी जयन्त ठकुल्ला, महिला मानव अधिकार रक्षक संजालके अध्यक्ष अम्बिका भण्डारी, कोशिस नेपालके खडकराम ओड, राष्ट्रिय अपाङता महासंघ प्रदेश महासचिव नन्दराज भट्ट, सहास नेपालके सरिता चौधरीलगायत मन्तव्य व्यक्त करल रहिट ।
कार्यक्रममे स्वागत मन्तव्य ओरेक नेपालके केन्द्रीय सदस्य बसन्ती चौधरी करल रहिट । ओस्टेक करके हिंसा पीडित अस्मिता चौधरी ओ भगवती सिंह ओरेक नेपालसे पाइल सहयोग ओ अब्बेक अवस्थाबारे अनुभव शेयर करल रहिट । उहाँहुक्रे ओरेक नेपालसे पाइल सहयोगसे अपनेहुक्रे नयाँ जीवन सुरुवाट करल बटैलै ।
