विकट क्षेत्रके विकासहे प्राथामिकता डेहे पर्ना जोड
पहुरा समाचारदाता
धनगढी, २२ चैत । संघ तथा प्रदेश सरकारसे योजना तथा बजेट विनियोजन करेबर विकट तथा दुरदराज क्षेत्रके विकासहे विशेष प्राथामिकतामे राखके बजेट विनियोजन करे पर्ना एक कार्यक्रमके सहभागीहुक्रे जोड डेले बाटै ।
बुधके रोज धनगढीमे हुइल वित्तीय संघीयता ओ स्थानीय तहके योजना तर्जुमा प्रदेशस्तरीय कार्यशाला गोष्ठीके सहभागीहुक्रे विकट पहाडी क्षेत्रके विकासहे विशेष प्राथमिकतामे राखके बजेट विनियोजन तथा योजना तर्जुमा करे पर्ना जोड डेहल हुइट ।
साइपाल गाउँपालिका बझाङके उपाध्यक्ष डोल्मा तामाङ विकट पहाडी क्षेत्रके विकासके आवश्यकताहे मध्यनजर कैके छनौट हुइल योजना कार्यान्वयके लाग बजेट विनियोजन करे पर्ना जोड डेहल रही । उपाध्यक्ष तामाङ वहाँके स्थानीयहुक्रनके आवश्यकताके आधारमे छनौट करगैल योजना सडक सञ्जाल, विजुली बत्ती, शिक्षा स्वास्थ्य लगायत भौतिक पूर्वाधारके लाग आवश्यक बजेट विनियोजन करे पर्ना संघ तथा प्रदेश सरकारके विशेष ध्यान जाइ पर्ना औँल्याइल रही ।
उपाध्यक्ष तामाङ कहली–‘विकट पहाडी क्षेत्र जहाँ सडक सञ्जाल नैहो, शिक्षा स्वास्थ्यके लाग स्कूल अस्पताल नैहो, खानेपानी विजुली बत्ति नैहो, जहाँ विकासके आवश्यकता ढेर रहल, वहाँक लाग संघ तथा प्रदेश सरकारसे विशेष ध्यान डेके वजेट विनियोजन करे पर्ना जरुरी रहल बा ।’
ओस्टके उहाँ जनसंख्याके आधारमे संघ तथा प्रदेश सरकारसे स्थानीय तहहे डेना समानीकरण अनुदानहे भौगोलिक विकटता हेरके डेहे पर्ना आवश्यक रहल बटाइल रही । उहाँ जनसंख्याके आधारमे छुट्या जैना बजेट तथा अनुदानसे वहाँके जनताहुक्रनहे ढेर अन्याय हुइल फेन बटाइल रही ।
‘जनसंख्याके आधारमे छुट्या जैना बजेट तथा अनुदानसे वहाँके जनताहुक्रनहे ढेर अन्याय हुइल बा’, उहाँ कहली–‘उ मेरके वजेट विनियोजन तथा अनुदानसे वहाँके विकासमे फेन चुनौती थपल बा ।’
बुङ्गल नगरपालिका बाजुराके नगरप्रमुख जयबहादुर धामी फेन भौगोलिक क्षेत्रके आधारमे विकास निर्माणके योजना तथा बजेट विनियोजन करे पर्ना आवश्यक रहल बटाइल रहिट । उहाँ जोखिमपूर्ण भौगोलिक क्षेत्र तथा विकट पहाडी क्षेत्रके विकासके लाग ढेर बजेट आवश्यक पर्ना हुइल ओरसे विशेष प्राथामिकताके आधारमे संघ तथा प्रदेश सरकारसे बजेट विनियोजन करे पर्ना औँल्याइल रहिट ।
जानकी गाउँपालिकाके अध्यक्ष गणेश चौधरी केन्द्र सरकारसे टमान नाउँसे योजना बनाके पठैना मने आवश्यक बजेट विनियोजन नैकरल ओरसे कार्यान्वयनमे समस्या हुइना बटाइल रहिट ।
‘केन्द्र तथा प्रदेश सरकारसे सिमित बजेटमे नीति तथा कार्यक्रम बनाके पठैना करठ्’, अध्यक्ष चौधरी कहलै–‘मने कार्यान्वायन भर स्थानीय सरकारसे करे पर्ना हुइल ओरसे टमान समस्या तथा चुनौती फेन अइना करठ्, यकर लाग आवश्यक बजेट विनियोजन करे पर्ना जरुरी रहल बा ।’
कैलारी गाउँपालिकाके उपाध्यक्ष भगवती कुमारी चौधरी संघ तथा प्रदेशके योजना कार्यान्वयनमे ढिला सुस्ती हुइल बटैटी समयमे कार्यसम्पन्न करे पर्ना जोड डेहल रही ।
उहाँ कहली–‘संघ तथा प्रदेश सरकारसे स्थानीय तहमे डगरघाट, पुलपुलेसा निर्माण लगायत टमान मेरके योजना आइल रहठ् मने उ योजनाके निर्माण कार्य समयमे सम्पन्न नैहुइठ, योजना कार्यान्वयनमे हुइल ढिला सुस्ती हुइलके कारण यहाँके स्थानीयहुक्रे ढेर सास्ती भोगे पर्ना अवस्था रहठ् ।’
उहाँ कैलारी लगायत कैलालीके ढेर स्थानीय तह बाढी प्रभावित क्षेत्र रहल ओरसे बाढसे पीडित तथा प्रभाावितहुक्रनके लाग आवश्यक बजेट विनियोजन कैना फेन राष्ट्रिय प्राकृतिक श्रोत तथा वित्त आयोगहे ध्यानाकार्षण कराइल रही ।
भीमदत्त नगरपालिका कञ्चनपुरके उपप्रमुख निलम लेखक जोशी टुक्रे बजेटसे विकास निर्माणमे ढेर समस्या अइना बटैटी संघ तथा प्रदेश सरकारसे बजेट विनियोजन करेबर योजनाके आवश्यकताके आधारमे बजेट विनियोजन करे पर्ना जोड डेहल रही ।
आलिताल गाउँपालिका डडेल्धुराके उपप्रमुख मैना कुमारी रावल प्रदेश गौरब तथा राष्ट्रिय गौरबके आयोजना पहुँचके आधारमे बाँट जैना हुइल ओरसे विकासके आवश्यकता रहल ठाउँ ओझेलमे परल बटैली ।
डिलाशैनी गाउँपालिकाके अध्यक्ष सन्तोष प्रकाश जोशी योजना तर्जुमा करेबर निर्वाचनके बेला करल प्रतिवद्धताहे फेन ख्याल करे पर्ना आवश्यक रहल बटाइल रहिट ।
योजना तथा बजेट विनियोजनके लाग स्थानीय तहके जनप्रतिनीधीहुक्रे भौगोलिक क्षेत्र, विकासके आवश्यकता हेरके योजना तथा बजेट विनियोजन करे पर्ना बटैटी रहल बेला राष्ट्रिय प्राकृतिक श्रोत तथा वित्त आयोगके अध्यक्ष बालानन्द पौडेल बजेट तथा योजना निर्माण करेबर चार चीजमे विशेष ध्यान डेहे पर्ना बटाइ रहिट ।
अध्यक्ष पौडेल योजना तथा बजेट विनियोजन करेबर योजना तथा बजेटके पूर्वानुमान, प्राथामिकीकरण, अनुशासन लगायत योजना ओ बजेटके सम्बन्ध ओ सहकार्यके पाटोहे विशेष ध्यान डेहे पर्ना बटाइल हुइट ।
‘कौनो फेन कार्ययोजना तथा बजेट बनाइबर साधन स्रोतके अनुमान, योजना प्राथामिकीकरण, सम्बन्ध ओ सहकार्यमे विशेष ध्यान डेहे परठ्’, अध्यक्ष पौडेल कहलै–‘इहीसे योजना फेन नै डोह्याइठ् ओ समयमे कार्यान्वयन हुइनाके साथे समस्या फेन नैआइठ् ।’
कार्यक्रम राष्ट्रिय प्राकृतिक श्रोत तथा वित्त आयोगके सहकार्य तथा नेपाल नगरपालिका संघ ओ गाउँपालिका राष्ट्रिय महासंघ नेपालके आयोजनामे हुइल रहे ।
गाउँपालिका राष्ट्रिय महासंघ नेपाल सुदूरपश्चिम प्रदेशके अध्यक्ष लोकेन्द्र बहादुर शाहीके अध्यक्षतामे हुइल कार्यक्रममे सुदूरपश्चिम प्रदेश अन्र्तगत स्थानीय तहके प्रमुख तथा उपप्रमुख, कर्मचारीनके सहभागिता रहल रहे ।
