मुक्तकमैयनके आवाज सुनो सरकार
मुक्तकमैया, बुक्रही ओ कमलरीहुक्रनके न्यायिक पुनर्स्थापनाके लाग सुदूरपश्चिम प्रदेशके कैलाली ओ कञ्चनपुरमे अधिकार यात्रा २०८० सुरु हुइल बा । मुक्तकमैया ओ कमलरीहुक्रनके न्यायिक पुनर्स्थापनाके लाग बनल कमैया श्रमिक पुनर्स्थापना कार्यविधि २०७९ नेपाल सरकार मन्त्री परिषदसे पारित कैके उ अनुसारके कार्य आघे बह्रैना दवाव डेना उद्देश्यसे यात्राके सुरुवाट करल हुइल बा । कैलाली जिल्लामे टीकापुरसे सुरुवाट हुइलक अधिकार यात्रा जानकी गाउँपालिका, लम्कीचुहा नगरपालिका, बर्दगोरिया गाउँपालिकामे, घोडाघोडीके सुखड हुइटी भजनी नगरपालिकामे साइकल र्याली सहित कोण सभाके कार्यक्रम हुइल बा । यात्रा भजनी नगरपालिका, कैलारी गाउँपालिकाके विपतपुर शिविर हुइटी गौरीगंगा नगरपालिकामे, करटी १७ गते गौरीगंगा नगरपालिकाके बढैपुर, चौमाला हुइटी धनगढीके धुरझन्ना, श्रीलंकाम कोणसभा सहितक कार्यक्रम कैना कहले बा । उहोर मुक्तकमैया समाज कञ्चरपुर जिल्लाके भीमदत्त नगरपालिकाके सालघारी बस्तीसे साइकलसहितके अधिकार यात्रा सुरु हुइल बा । बेदकोट नगरपालिकाके ओझाखाली, बीचफाँटा, धर्मपुर नयाँमुक्ति हुइटी छेलामे कार्यक्रम कैना जनाइल बा । अधिकार यात्रा कैलालीके टीकापुरसे सुरु होके धनगढीसम पुग्ना कहल बा ।
नेपाल सरकार भूमि व्यवस्था सहकारी तथा गरिबी निवारण मन्त्रालयसे गठन करल मुक्तकमैया कमलरी हलिया ओ हरवाचरवा वस्तु स्थिति अध्ययन समितिके प्रतिवेदनके आधारमे निर्माण करल कमैया श्रमिक पुनस्र्थापना कार्यविधि २०७९ हे नेपाल सरकार मन्त्री परिषदसे पास कैके उ कार्यविधि बमोजिम शीघ्रादिशीघ्र कार्य सुरु कैना ओ शिक्षा, स्वास्थ्य, रोजगारी, सामाजिक सुरक्षा सहितके दीगो जीविकोपार्जनके सुनिश्चिततालगायतके माग रहल बा । कमैयाहुक्रे दासत्वके जंजिरसे मुक्ति पाइल २१ बरस पुरा हुइल बा । कमैया मुक्ति घोषणा हुइल २२ औं बरस लागे बेरफे चार जिल्लामे अभिन २ हजार ३ सय ७५ जाने पुनस्र्थापनासे वञ्चित बटै । सरकार कमैयाहुकन २०५७ साल सावन २ गते मुक्ति घोषणा करेबेर उचित गाँस, बास, कपास, स्वास्थ्य, शिक्षा डेना कहिके मालिकहुकनके घरसे छुटाके अलग बैठाइल । कमैया मुक्ति घोषणापाछे सरकार पाँच जिल्लाके लगत लेटी २७ हजार ५ सय ७० जनहनहे जग्गा डेना कहल रहे, मने अभिनसम २५ हजार १९५ जाने केल जग्गा पैलै । ढेर मुक्तकमैया अभिन जग्गाविहिन बटै, जिहीसे मुक्तकमैयाहुक्रे दिवसहे खुशीयालीके रुपमे मनाई छोरके हक अधिकारके लाग सडकमे उत्रे पर्ना अवस्था रहल बा ।
सबसे ढेर बर्दियामे १२ सय ४५ जाने मुक्तकमैया पुनर्स्थापनासे वञ्चित बटै कलेसे कैलालीमे ९ सय ५३ जाने, कञ्चनपुरमे १२९ जाने ओ दाङमे ४८ जाने पुनर्स्थापना हुइना बाँकी रहल बटै । पुनर्स्थापनाके नाउँमे जग्गा नैरहल ठाउँक लालपुर्जा, व्यक्तिके नम्बरी जग्गाके लालपुर्जा, लडिया, खोला रहल ठाउँमे टमान मुक्तकमैयाहुकन जग्गा डेगिल बा । ओसिन समस्या सट्टा भर्ना कैना संख्या ६ सय ६१ रहल बा । परिचय बदर हुइल संख्या १७३, जग्गा नइपाइल ४६३, परिचयपत्रसे वञ्चित १ हजार ७८ जाने करके कुल २ हजार ३ सय ७५ जाने पुनर्स्थापना हुइना बाँकी बटै । अब्बे मुक्तकमैया पुनर्स्थापनाके काम रुकल बा । पहिले संघीय सरकार, प्रदेश सरकार पुनर्स्थापनाके लाग बजेट विनियोजन करे अब्बे पुनर्स्थापनाके नाउँमे बजेट छुटयाई छोरले बा । प्रदेश सरकारके मुख्यमन्त्री, भूमि व्यवस्था कृषि तथा सहकारीके पाँच बरससे मुक्तकमैया पुनर्स्थापना कैनामे अपनेहुक्रे प्रतिवद्ध रहल भाषण केल छटलै ओइनेक कार्यकाल ओराइल मने मुक्तकमैया पुनर्स्थापनाके काम भर शुन्य रहल बा । अब्बे फेरसे दुसरा कार्यकालके लौवा जनप्रतिनिधि आइल बटै । ओइने करे नइसेकल काम अबसिक जनप्रतिनिधि करही कना मुक्तकमैयाके आश बा । मुक्तकमैया अपन अधिकारके लाग यात्राफे सुरु करले बटै । मुक्तकमैयाके पुनर्स्थापना कैना हो कलेसे आवाजके सुनुवाई करी ।
