नमस्ते सहकारीसे वित्तीय साक्षरता अभिमुखीकरण कार्यक्रम

पहुरा समाचारदाता
धनगढी, १५ असार । नमस्ते बचत तथा ऋण सहकारी संस्था लिमिटेडसे वित्तीय साक्षरता अभिमुखीकरण कार्यक्रम करले बा ।

लिमिटेडसे शुकके रोज सहकारी समुह कार्यक्रमके केन्द्र प्रमुख तथा शेयर सदस्यहुकन विच वित्तीय साक्षरता अभिमुखीकरण कार्यक्रम करल हो । कार्यक्रमके वडका पहुना सहकारीके अध्यक्ष जगतराम चौधरी कौनो व्यवसायीहुक्रे दैनिक हुइना गतिविधिके खर्च विवरण धरना जरुरी रहल बटैलै । उहाँ कहलै, लेखा सम्बन्धी जानकारी रख्लेसे खर्च आम्दानी पत्ता हुइठ । जिहीसे व्यापार घाटा नाफा हुइल जाने सेक्जाइठ । नमस्ते सहकारीमे सक्कु समुह कार्यक्रमके केन्द्र प्रमुख तथा शेयर सदस्यहुकनके लगानी रहल ओरसे अपनत्व महशुस कैनाफे जरुरी रहल अध्यक्ष कहलै ।

संस्थाके उपाध्यक्ष रोहित कुमार चौधरी सहकारी समुह कार्यक्रमके केन्द्र प्रमुख तथा शेयर सदस्यहुकनके मुहारमे खुशी नानेक लाग कार्यक्रमके आयोजना कैलक बटैलै । उहाँ कहलै, हम्रे सहकारीसे लोन लेठी मने व्यवस्थापन करे नइजानल अप्ध्यारोमे परठी । उन्नती प्रगतिके लाग लोनके व्यवस्थापन कैना टौर तरिकाबारे जानकारी डेहक लाग विच वित्तीय साक्षरता अभिमुखीकरण कार्यक्रम हुइल उहाँ बटैलै । शेयर सदस्यहुकनके आर्थिक प्रगति होए कना उद्देश्यसे सहकारी ऋण लगानी करलफे उहाँ बटैलै । सहकारी लेहल लोनहे उत्पादनमुलक क्षेत्रमे लगानी कैना उहाँ आाग्रह करलै ।

सहकारीके सचिव खडकराज चौधरी शेयर सदस्यसे संकलन करल बचत पैसा शेयर सदस्यहुकनमे लगानी करल बटैलै । उहाँ कहलै, हम्रे बाहेर लगानी नइकरठी यिहे ठाउँमे लगानी करल ओरसे हमार बचत सुरक्षित रहल बा । यी सहकारीके अपने भवनमे कारोवार, संचालक समिति स्थानीय रहल ओरसे लगानी डुबना कौनौ शंका नइहो । यी सहकारी २०६५ सालमे डेढ लाखसे करोवार सुरु कैके अब्बे करोडौके कारोवार करटी बा ।

सहकारीके शिक्षा उपसमिति संयोजक बुधराम चौधरी बैंकसे लोन लेहटी कलेसे योजनाके बनाके खर्च कैना सुझाव डेले बटै । यहाँ ढेर बह्रल लिखल मनै रहल वित्तिय साक्षरण पाइल व्यक्ति कम रहल बटै, उहाँ कहलै, हम्रे कहुसे पैसासे लेठी मने दइजाहा हस खर्च कैठी । यी संस्कृतिके विकास हुइल बा । सहकारीसे लेहल ऋणके उद्देश्य अनुसार लगानी करी योजना ओ आम्दानी अनुसार खर्च, बचत करी यिहीसे यिहीसे आर्थिक रुपमे सम्बृद्धि हुई । योजना अनुसार खर्च ओ बचत करलेसे घर व्यवहार चलैना, बाल बच्चा पहै्रना सहजुल हुइना बटैलै । साक्षार हुइना जरुरी बा । ओकरपाछे वित्तिय साक्षर हुइना और जरुरी बा ।

सहकारीके शिक्षा उपसमिति सदस्य इन्दिरा चौधरी सहकारीसे ढेर जैसिन महिलाके नाउँमे लोन लेजैटी रहल ओरसे चनाख हुइना जरुरी रहल बटैली । उहाँ कहली, घरमे कुछ समस्या परल कलेसे समुह, सहकारीसे महिला नाउँमे ऋण खेलैना प्रचलन ढेर बा । जिहीसे ऋणके बोझ ओ घरेक कामके बोझ महिलामे परन कारण जन्यवानसे आम्दानी अनुसार बचत खर्च कैना सुझाव डेली ।

कार्यक्रम शेयर सदस्य सावित्री चौधरी लोन लेके मजासे सदुपयोग करलेसे प्रगतिके डगरमे लम्के सेक्ना बटैली । सहकारी संस्थामे बचत कैना, शेयर सदस्य बनेबेर आब सम्बन्ध केल नाही सक्कु ओर ध्यान पुगैना जरुरी रहल उहाँ बटैली । वित्तीय साक्षरता अभिमुखीकरण कार्यक्रममे ढेर ज्ञान पाइल ओ खर्च बचत कैना टौरतरिकाफे पत्ता हुइल बटैली ।

वित्तीय साक्षरता अभिमुखीकरण कार्यक्रमके सहकारीके शिक्षा उपसमिति संयोजक बुधराम चौधरी, सहकारीके प्रवन्धक विजय चौधरी, शिक्षा उपसमिति सदस्य ठाकुर प्रसाद करिया प्रधान सहजीकरण करल रहिट । आरएमडिसीके आर्थिक सहयोगमे हुइल वित्तीय साक्षरता अभिमुखीकरण कार्यक्रममे सहकारी समुह कार्यक्रमके केन्द्र प्रमुख तथा शेयर सदस्यहुकनके सहभागिता रहल रहे ।