मुक्तकमैयाके समस्या समाधान कैना प्रतिवद्धता
पहुरा समाचारदाता
धनगढी, १९ सावन । मुक्त कमैयाके समस्या समाधान हुइना मेरिक काम आघे बह्रैना सरकारहे दबाब डेना सुदूरपश्चिम प्रदेश सभामे रहल सामाजिक विकास समितिसे प्रतिवद्धता व्यक्त करल बटै ।
सञ्चार प्रतिष्ठान नेपाल, कैलालीके आयोजना तथा संसद सहयोग परियोजनाके समन्वय ओ सहकार्यमे मुक्त कमैयाके सवाल ओ सामाजिक विकास समितिके निगरानी विषयक अन्तरसम्वाद कार्यक्रमहे सम्बोधन करटी समितिके सदस्यहुक्रे प्रतिवद्धता व्यक्त करल हुइट ।
समितिके सदस्य तथा नेपाली काँग्रेसके प्रदेश सभा सदस्य प्रकाश बम प्रदेश सभासे मुक्त कमैया, कम्लहरी, हलिया लगायतके समस्या समाधान हुइना करके नीति, नियम बनाके कार्यान्वयन कैना दबाब डेना बटैलै । उहाँ कहलै–‘कमैया मुक्ति हुइल २३ वर्षसमफे पूर्ण रुपमे पुनस्र्थापना हुई नइसेक्ना दुखद हो । वर्तमान प्रदेश संसद यी विषयमे सजग बा । नीति, नियम बनाके आब यी समस्या पुनः दोहर्याई नइडेना करके काम कैबी ।’
उहाँ मुक्त कमैया अभिन पुनस्र्थापना हुई नइसेक्नामे सरकारके कमजोरी रहल बटैलै । उहाँ कहलै–‘सरकारसे कमैया मुक्ति घोषणा कैना आघे पूर्ण लगत संकलन करे पर्ना रहे मने, ओसिन हुई नइसेकल । अब्बे सरकार ओ संस्थाके तथ्यांक फरक–फरक बटैं । कमैयाके संख्या हरेक वर्ष बह्रल बा ।’ उहाँ कानूनके अभाव हुकेफे प्रदेश सरकारहे काम कैना गाह्रो हुइल बटैलै ।
नेकपा एमालेके प्रदेश सभा सदस्य हिरा सार्की सामाजिक विकास समिति मुक्त कमैयाके समस्या समाधान कैना ओर तत्पर रहल बटैलै । उहाँ कहलै–‘सभासे यी सम्बन्धी हाली नीति ओ ऐन पारित कैबी । मने, कार्यान्वयन कैना निकाय यम्ने गम्भीर नइहुइलेसे समस्या पुन ज्यूके त्यू रही ।’
नेकपा एमालेके प्रदेश सभा सदस्य धर्मराज पाठकसे मुक्त कमैयाके समस्याहे निष्कर्षमे नइपुगाई सेक्ना सक्कुहुनहे लज्जास्पद बनाइल बटैलै । उहाँ कहलै–‘पुनस्र्थापनासंगे मुक्त कमैयाहे आधारभुत अधिकारकेफे प्रयोग करे पैले नइहुइट । यि सम्बन्धी कार्यान्वयन कैना निकाय अलमलमे रहल विल्गाइठ ।’ उहाँ प्रतिवद्धता व्यक्त करटी – ‘जौन विषयमे छलफल हुइटी रहल बा । यैसिन छलफल दुसर वर्ष करे नइमिल्ना करके हम्रे काम कैेबी ।’
नेपाली काँग्रेसके प्रदेश सभा सदस्य तुलसी देवकोटा नीति निर्माण करके मुक्त कमैयाके अधिकार स्थापित कैना करके काम कैना प्रतिवद्धता व्यक्त करली ।
भुमि आयोग कैलालीके अध्यक्ष यज्ञराज उपाध्याय सार्वजनिक जग्गामे बसोबास करटी रहल मुक्त कमैयाके जग्गा नापजाँच करे नइसेक्ना बटैलै । उहाँ कहलै– ‘आयोगसेफे डेहल मापदण्डे बैठके काम करटी रहल बा । सार्वजनिक जग्गा, कलेज, मन्दिर, वन लगायतके क्षेत्रमे बसोबास करटी आइल व्यक्तिहुकनके जग्गा नापजाँच कैना अधिकार नइहो । मने, हमारथेन कैलालीके वास्तविक भुमिहिन परिवारके लगत रहल बा ।’
उहाँक अनुसार कैलालीमे अभिनसम भुमिहिन दलित आठ हजार नौ सय ७३, भुमिहिन सुकुम्वासी ११ हजार एक सय २३ ओ अव्यवस्थित बसोबासके एक लाख ३० हजार सात सय एक घरपरिवार रहल बटै ।
उहाँ सार्वजनिक जग्गामे बसोबास करटी आइल मुक्त कमैयाके समस्याहे समाधान कैना ओर आयोगसे काम करटी रहल बटैलै ।
कार्यक्रममे सहभागि मुक्त कमैया परिवारहुक्रे बसोबास करटी आइल ठाउँमे सरकारी संरचना बन्ना, वनभिटर, लडियाके छेउछाउमे बसोबास करैना लगायतके समस्यासे कमैयाहुक्रे समस्या झेले परटी रहल बटैलै । ओइने बसोबास करटी रहल ठाउँमे जग्गाके व्यवस्थापन करे पर्ना, मुक्त कमैयाहे जिविकोपार्जनके लाग रोजगारीके व्यवस्था, निःशूल्क
शिक्षा तथा स्वास्थ्यके व्यवस्था करे पर्ना माग करलै ।
मुक्त कमैया महिला विकास मञ्चके जिल्ला कार्यक्रम संयोजक ईन्द्र चौधरी मुक्त कमैयाके अवस्था, समस्या, समाधान लगायतके बारेमे प्रस्तुतीकरण करल रहिट कलेसे संसद सहयोग परियोजनाके पार्वती भण्डारी कार्यक्रमके उद्देश्यबारे जानकारी करैले रहिट । कार्यक्रमके सहजीकरण वरिष्ठ पत्रकार मनमोहन स्वाँर करले रहिट ।
कार्यक्रममे प्रदेश सभा सचिवालयके सामाजिक विकास समितिके सदस्य, अधिकारकर्मी, सामाजिक संस्था, पत्रकार लगायतके सहभागिता रहल रहे ।
