हरेरी महोत्सव २०८० निम्जल

पहुरा समाचारदाता
धनगढी, ९ भदौ । धनगढी उपमहानगरपालिका–५, जाँई गाउँमे संचालन कैगिल हरेरी महोत्सव निम्जल बा । परम्परासंगे कला, संस्कृति जोगाइक लाग हरेरी महोत्व २०८० मुल आयोजक समितिसे यिहे भदौ ७ से ९ गतेसम महोत्सवके आयोजना करगिल रहे ।

भाषा संस्कृति कला, भेष हमार पहिचान । हरेरी महोत्सव मनैना सक्कु किसाननके अभियान । हरियर खेती हरियार वन हरियर मैदान बनाई । डहिया महिया किराकाँटी गाँधी फटिङ्गासे विउवाली बचाई कना मुल नाराके साथ हरेरी महोत्सवके आयोजना करल रहे ।

हरेरी महोत्सव २०८० मुल आयोजक समितिके संयोजक तथा जाँईक भल्मन्सा कुलवीर चौधरीके अध्यक्षतामे महोत्सव सम्पन्न हुइल बा ।

समापन कार्यक्रममे उहाँ हरेरी महोत्सव भव्यताके साथ निम्जल बटैलै । प्रकृतिके जीवनचक्रहे बचैटी कृषि क्षेत्रके आधुनिकीकरण कर्ना ओ कला संस्कृतिके संरक्षण प्रवद्र्धन कैना, कृषि क्षेत्रके विकास एवं सम्भावनाबारे छलफल ओ हरियर कृषि, बनुवा मैदान बनाके वातावरण सन्तुलन बनैना उद्देश्य लेके महोत्सव हुइल समितिके संयोजक कुलवीर बटैलै ।

महोत्सवमे संस्कृतिक बहससंगे थारु समुदायके झुम्रा नाँच, सखिया नाँच, एकल नाँच, बर्कीमार, आधुनिक नाँच, सामूहिक डान्स, राष्ट्रिय तथा स्थानीय कलाकारके प्रस्तुति, सजना, मैना गीता प्रस्तुत, हाँस्या कार्यक्रम प्रस्तुत हुइल रहे ।