‘बहुसरोकारके विवाद समाधनमे दुई पक्षके जीत–जीत आवश्यक’
पहुरा समाचारदाता
धनगढी, १९ भदौ । बहुसरोकारके विवाद समधान करेबेर दुनु पक्षके जीत–जीत आवश्यक रहल सरोकारवाला निकायके प्रतिनिधिहुक्रे बटैले बटै ।
सोम्मारके रोज धनगढीमे प्राकृतिक श्रोत द्वन्द्व रुपान्तरण केन्द्र नेपालसे आयोजना करल जिल्ला स्तरीय समन्वय तथा सल्लाहकार समितिके बैठकमे सरोकारवाला निकायसे बहुसरोकारके विवादमे दिगो समाधान आवश्यक रहल बटैले रहिट ।
जिल्ला समन्वय समिति कैलालीके कार्यवाहक सभापति खगराज भुषाल कौनोफे विवाद समाधान करेबेर दुई पक्षके मन मिलाई नइसेक्लेसे उ विवाद बारम्बर अल्झना हुइल ओरसे दिगो समाधान हुइना मेरिक काम कैना जरुरी रहल बटैलै ।
बहुसरोकारके विषयमे मुद्दा समाधान कैना दुई पक्षके मन मिलैना जरुरी रहठ,‘ उहाँ कहलै, ‘छोट–छोट मुद्दा स्थानीयस्तरमे मिलैलेसे मजा हो । अदालतसम पुगेबेर समय ढेर लागठ । कतिपय मुद्दा टे मनै विटजैना समाधान नइहुइना रहठ । अदालतमे एक पक्षके जिटठ कलेसे दुसर पक्षके हारठ । स्थानीयस्तरमे विवाद मिलाईबेर दुनु पक्षके मन मिलैले दिगो रुपमे विवाद समाधान करेसेक्जाइठ ।’
प्राकृतिक श्रोत द्वन्द्व रुपान्तरण केन्द्र नेपालसे जल, जंगल ओ जमिनसंग बहुसरोकारे विवादमे दुई पक्षके मन मिलाके जीत–जीत सुनिश्चित हुइना मेरिक कैलालीमे ढेर विवाद मिलाइल उहाँ बटैलै । आवसे हरेक संस्थासे परिणाम अइना मेरिक काम कैना जरुरी रहलफे जिसस कैलालीके कार्यवाहक सभापति भुषाल आग्रह करलै ।
डिभिजन वन कार्यालय धनगढीके प्रमुख रामचन्द्र कँडेल कैलालीके टमान ठाउँमे जल, जंगल ओ जमिनसे बाँझल विवाद रहल ओरसे स्थानीय तह ओ प्राकृतिक श्रोत द्वन्द्व रुपान्तरण केन्द्र नेपाल विच समन्वय करके दिगो समाधानके डगर खोजे पर्नामे जोड डेलै ।
उहाँ कहलै, यहाँ समुदायविच ताल तलैया, सामुदायिक वन, पानी पाँधेरोलगायत टमान विवाद रहल बा । जौन नम्मा समयसम नइमिलल हो । प्राकृतिक श्रोत द्वन्द्व रुपान्तरण केन्द्र नेपाल टमान मुद्दाके दिगो समाधान करसेकल ओरसे कर्रा विवाद रहल स्थानीय तहके न्यायिक समिति आब सहकार्य कैके जैना आवश्यक बा ।
जिल्ला अदालत कैलालीके मानबहादुर विष्ट समाजमे विवाद सृजना हुइना सक्कु चिज अदालतमे अइलेसे मुद्दामे चाप बह्रना बटैलै । छोट प्रकृतिके विवाद स्थानीयस्तरमे मेलमिलापके पद्धतिहे उत्तम विकल्पके रुपमे लेना आवश्यक बा, उहाँ कहलै, ‘बैकल्पिक डगरमे रुपमे छोट–छोट विवाद स्थानीयस्तरमे मिलैलेसे अदालतमे मुद्दाके चाप कम हुई । अदालतमे फौजदारी, देवानी प्रकृतिके ढेर आइल बा । पछिल्का समयमे बैकिङ कसुर ओ ठगीके मुद्दा अइटी रहल बा ।’
उहाँ कहलै, ‘स्थानीयस्तरमे मेलमिलापकर्ताके शैक्षिक योग्यता स्नातक तह हुई पर्ना कहल बा । कहु कहु परम्परागत रुपमे सीप रहल व्यक्तिफे विवाद मिलैना करल बटै । मने ऐन कानूनमे रहिके काम कैना जरुरी बा ।’
कैलालीके १३ स्थानीय तह मन्से १० स्थानीय तहके न्यायिक समितिके भर्खर कैगिल अनुगमनमे न्यायिक प्रक्रियामे सुदृद्धिकरण हुइटी गैल उहाँ बटैलै ।
कार्यक्रममे टीकापुर नगरपालिकाके नगर उप प्रमुख खडकबहादुर शाह, घोडाघोडी नगरपालिकाके नगर उपप्रमख गुलिया चौधरी, भजनी नगरपालिकाके नगर उपप्रमुख राजु तिरुवा, कैलारी गाउँपालिकाके उपाध्पक्ष भगवतीकुमारी चौधरी, जानकी गाउँपालिकाके उपाध्यक्ष लालमति कठरिया, जोशीपुर गाउँपालिकाके उपाध्यक्ष रेखा कठरियालगायतसे न्यायिक क्षेत्रमे कैना विवाद समाधानबारे अपन बाट राखल रहिट । ओस्टेक करके बार कैलालीके अध्यक्ष इन्द्र प्रसाद लेखक मेलमिलाप कर्ताके शैक्षिक योग्यता ऐन नियममे तोकल अनुसार हुइना बटैले रहिट ।
कार्यक्रममे प्राकृतिक श्रोत द्वन्द्व रुपान्तरण केन्द्र नेपालके क्षेत्रीय संयोजक बल्लु चौधरी संस्थासे करल गतिविधि ओ प्रगतिबारे जानकारी डेहल रहिट । उहाँ संस्थासे बहुसरोकारवाला द्वन्द्व रुपान्तरण अभियान अन्र्तगत जल, जंगल ओ जमिन सम्बन्धीके समुदायस्तरके द्वन्द्व २०७९ चैतसम २८९ ठो द्वन्द्व रुपान्तरण कैसेकल बटैलै ।
बहुुसरोकारवाला विवाद विकासके बाधक रहल कहटी प्राकृतिक श्रोत द्वन्द्व रुपान्तरण केन्द्र नेपालसे दुनु पक्षके जीत–जीत सुनिश्चितता कैगिल ओ सम्बन्ध सुधार तथा विकास निर्माणके कार्य सुचारु हुइल बटैलै ।
ओस्टेक करके प्राकृतिक स्रोत द्वन्द्व रुपान्तरण केन्द्र नेपाल कैलालीके स्रोत व्यक्ति गंगा दुलाल संस्थासे कैलाली जिल्ला जिल्लामे करटी रहल गतिविधि, विवाद समधान, मेलमिलापके चरणबारे जानकारी डेहल रहिट ।
कार्यक्रममे स्वागत मन्तव्य प्राकृतिक स्रोत द्वन्द्व रुपान्तरण केन्द्र नेपाल कैलालीके सहजकर्ता बन्धु विवस चौधरी करल रहिट । जिल्ला समन्वय समिति कैलालीके कार्यवाहक सभापति खगराज भुषालके अध्यक्षतामे हुइल जिल्ला स्तरीय समन्वय तथा सल्लाहकार समितिके बैठकमे स्थानीय तहके उप प्रमुख, अदालत, बार कैलाली, डिभिजन वन, सुरक्षा निकायके प्रतिनिधिहुकनके सहभागिता रहे ।
