सुदूरपश्चिम महोत्सव अगहन २२ गतेसे
पहुरा समाचारदाता
धनगढी, ९ कार्तिक । सुदुरपश्चिम महोत्सवके १७ औं संस्करण यिहे अगहन २२ गतेसे पुस २ गतेसम हुइना जनागिल बा ।
सुदूरपश्चिम प्रदेशके पर्यटन, कृषि ओ उद्योग व्यापारके विकास तथा विस्तारके साथे सस्कृती ओ कलाके प्रवद्र्धन करटी २०६३ सालसे हुइटी आइल महोत्सव यी बरसफे अगहन २२ गतेसे हुइना आयोजक कैलाली उद्योग बाणिज्य संघ शुकके रोज पत्रकार सम्मेलनके आयाोजना कैके जनैले बा ।
यी क्षेत्रके समग्र विकासके सम्भावनाहे उजागर कैना ओ पछिल्का समयमे विविध कारण सुजित आर्थिक सामाजिक प्रतिकुलता, विषम सामाजिक परिस्थितिसे गुज्रटी रहल उद्योग व्यवसायहे आसावादी बनाके पुनस्र्थापित कैना महोत्सव उपलब्धीमुलक हुइना विश्वास लेहल बा ।
धनगढी उपमहानगरपालिका वडा न १ पशुपति टोलमे आयोजना करेलागल महोत्सवमे वृहत व्यवसायीक कृषि प्रदर्शनी तथा प्रतियोगिता ताजा टिना ओ कृषिमे आइल प्रविधिसंगे मच्छी, केरा, पोल्ट्री, दुग्धजन्य पदार्थ, बेम्टी आदी व्यवसायहे प्रदर्शनीमे विशेष जोड डेहल कैलाली उद्योग बाणिज्य संघके अध्यक्ष पुष्पराज कुँवर बटैलै ।
सास्कृतिक रुपमे धनी सुदुरपश्चिमके कला संस्कृतिके संरक्षण करके विगतके दिनमे महोत्सवसे उत्पादन करल कलाकार आज जैसिक देश विदेशमे ख्याती कमैले बटै उहे कार्यहे निरन्तता डेटी यी क्षेत्रके कला संस्कृतिमे सम्भावना रहल ओ योगदान डेहल कलाकारहुकनहे स्टेजमे प्राथमिकता डेना जनागिल बा ।
यी क्षेत्रके उद्यमी व्यवसाय उत्पादनहे प्राथमिकता डेना, नेपाल अधिराज्यसे अइना उद्योगी व्यव्सायीहुकनहे सम्मानित रुपमे सहभागिता करैना आयोजक जनैले बा ।
सुदूरपश्चिमके परिकार सहितके महोत्सव स्थलमे खाना, खाजाके स्टल रहना, जेकर सरसफाइ तथा उत्कृष्ट व्यवस्थापनके लाग होटल व्यवसायीसे समन्वय करटी रहल जनागिल बा ।
महोत्सवमे अनुमानित २ करोडके लगानी लग्ना, उद्योगी व्यवसायके २० करोड बराबरके कारोवार हुइना अनुमान करल बा । सुदुरपश्चिम महोत्सव २०८० मे कृषि, जडिबुटी, हस्तकला फर्निचर, अटो मोबाइल्स, गारमेन्ट, इलेक्टोनिकल, होटल ओ सूचना प्रविधि करके ४०० जटरा संख्याके स्टल रहना आयोजक जनैले बा ।
महोत्सव अवलोकनके लाग विद्यार्थीनहे रु ५० टिकट दर धारल बा कलेसे सर्वसाधारणहे रु १०० ओ फरक क्षमता रहलहे निःशुल्क प्रवेशके व्वस्था रहना जनागिल बा ।
महोत्सवमे स्थानीय उत्पादन ओ महिला उद्यमीहे प्रोत्साहन करल बा कलेसे यी वर्षके महोत्सवमे करिब ५ लाख व्यक्तिसे अवलोकन कैना अनुमान करल बा ।
महोत्सवहे भब्यरुपमे सम्पन्न कैना मुल समिति सहित ३० उप समिति रहल बटै । जेम्ने सक्कुहुनके उत्कृष्ट सहयोगसे सु.प महोत्सव २०८० भव्य रुपमे सम्पन्न कैना हुइना ओ सुरक्षाके दृष्ट्रिकोणसे पूर्णरुपमे अत्याधुनिक सि सि क्यामरासे निरिक्षण कैना, नीजि ओ सरकारी सुरक्षाकर्मीहुकनके व्यवस्था करल बा ।
यी महोत्सव सुदुरपश्चिमके आर्थिक विकासके लाग सम्भावनाके खोजी करटी यी क्षेत्रके पर्यटन विकास, सास्कृतिक कला, खानपान, भाषाके संरक्षण करटी व्यवसायिक सफलता प्राप्त करके जनताके गुणस्तरिय जीवनमे यी महोत्सव सहयोग सावित हुइना कहल बा ।
