अपाङता दिवसके अवसरमे धनगढीमे दुई दिने मिनि महोत्सव सुरु

अपांग उद्यमीसे उत्पादित सामाग्री प्रर्दशनीमे

पहुरा समाचारदाता
धनगढी, १४ अगहन । ३२ औं अन्तराष्ट्रिय अपांगता दिवसके अवसरमे आयोजित मिनि महोत्सवमे अपांग उद्यमीसे उत्पादित सामाग्री प्रदर्शनीमे धारल बा ।

राष्ट्रिय अपांग महासंघ नेपालके सुदूरपश्चिम प्रदेशके आयोजनामे अँटवारके रोजसे मिनि महोत्सव शुरु हुइल बा । महोत्सवमे अपांग रहल युवाहसकनके उद्यमशिलतासे उत्पादन हुइल सामाग्रीके प्रदर्शनीमे धरले बटै । सोम्मारसम चल्न मिनि महोत्सव उद्घाटन सुदूरपश्चिम प्रदेशके सामाजिक विकास मन्त्री झपटबहादुर साउँद करले बटै ।

११ ठो प्रदर्शनी स्टलमे अपांग रहल उद्यमीसे उत्पादन करल कृषि उत्पादन, स्थानीय पोशाक, अपांग उद्यमीसे उत्पादन करल लेहंगा, ढाका झोला, कृषिमुलक उद्योगसे उत्पादित नमकिन, दृष्टि बिहीनसे प्याकेजिङ करल हारपिक जैसिन सामाग्री धारल बा । उ सामाग्री आवश्यक हुइल व्यक्तिसे सुपथ मुल्यमे खरिद करे सेक्ना आयोजक महासंघके प्रदेश अध्यक्ष मानबहादुर साउँद बटैलै । उहाँ अपांगता रहल युवाहुकनके उद्यमसे उत्पादन हुइल सामाग्रीके प्रचार प्रसार तथा बजारीकरण कैना उद्देश्यसे महोत्सव आयोजना करल बटैलै ।

धनगढी उपमहानगरपालिकाके पार्किङ स्थलमे आयोजना करल महोत्सवमे अपांगता रहल युवाहुकनके उद्यमसे ज्ञान, सीप ओ कलाके प्रदर्शनीके व्यवस्था समेत करल बा । मिनि महोत्सव उद्घाटन कार्यक्रममे अपांगता रहल व्यक्तिहुकनहे रोजगारी डेना रोजगारदाता ओ अपांगताके क्षेत्रमे काम कैना टमान व्यक्तिहुकनहे सम्मान करल बा ।

राष्ट्रिय अपाङ महासंघ सुदूरपश्चिम प्रदेशके आयोजनामे धनगढीमे पहिल चो मिनी महोत्सव सुरु हुइल हो ।
कार्यक्रममे २०६७ सालमे मदन पुरस्कार विजेता नरबहादुर साउदहे सम्मान करल बा । ओस्टेक होटेल व्यवसायीहे ओ विशेष विद्यालयहे प्रशंसनिय कार्य करल कहटी सम्मान करल बा ।

कार्यक्रममे परिलक्षित संस्थासे हाजिरी जवाफ प्रतियोगितामे प्रतियोगीहे नगद पुरस्कार ओ प्रमाणपत्र प्रदान करल बा । रोस्यारा अपाङता प्रतिस्ठानसे विपन्न अपांगता विधार्थी ८ जनहनहे नगद रकम प्रदान करल बा ।
कार्यक्रममे प्रमुख अतिथी सामाजिक विकास मन्त्री झपट बहादुर साउँद अपाङगता रहल व्यक्तिके लाग बनाइल ऐन नीति नियम कार्यान्वयन कैना ओर लागे पर्ना बटैलै ।

सुदूरपश्चिम सरकार ओ सामाजिक विकास मन्त्रालय अपाङगता रहल व्यक्तिके हक अधिकारके लाग, बजेट बिनियोजन, अपाङगतामैत्री भौतिक संरचना निर्माण करे पर्ना बाट प्रदेश सरकार गम्भीर रुपमे लेहल बटैलै । विगतमे महासंघ ओ प्रदेश सरकार बिच हुइल सम्झौता कार्यान्वयनमे अपने प्रतिबद्ध रहल मन्त्री साउँद दाबी करलै ।

महोत्सव आयोजनासे अपांगता नागरिकसेफे कुछ करे सेक्ठै ओ आत्मनिर्भर बने सेक्ठै कना सन्देश डेनाके साथे अपांगता नागरिकके प्राविधिक प्रतिभाके उजागर नीजि क्षेत्र ओ सार्वजनिक क्षेत्रसंगके सहकार्य ओ साझेदारीके विकास कैना, व्यवसायिक नीजि तथा सार्वजनिक क्षेत्र प्रदेश ओ स्थानीय पालिकासंग साझेदारी समन्वय तथा बजारीकरण करके उद्योग व्यवसाय संचालन कैना अपांगता युवा उद्यमशिलता स्वरोजगार महोत्सवके प्रमुख उपलब्धी रना महासंघके महासचिव नन्दराज भट्ट बटैलै ।
कार्यक्रममे शारीरिक अपाङता बालबालिकाके नृत्य, बहिरा बाल बालिकाके नृत्य, दृष्टि विहिनहुकनके एकल गायन, प्रस्तुती समेत कैगिल बा । मिनी महोत्सवके पूर्वसन्ध्यामे धनगढी बजारमे प्रभातफेरीके कार्यक्रमके आयोजना कैगिल बा ।
राष्ट्रिय अपाङता महासंघके सुदूरपश्चिमके अनुसार सुदूरपश्चिममे ७० हजार ८ जाने अपाङता रहल व्यक्ती बटै ।

रास्ट्रिय अपांग महासंघ नेपाल अपांगता रहल व्यक्तीहुकनके हक अधिकार संरक्षण ओ प्रबर्द्धनके लाग वि.स. २०५० सालसे निरन्तर कृयाशिल एक ठो केल रास्ट्रियस्तरके छाता सस्था हो । जेम्ने हाल ४०० से ढेर अपांगता सम्बन्धी काम कैना सस्था आबद्ध बटै । सुदूरपश्चिम प्रदेशमेफे २०६१ सालसे रास्ट्रिय अपांग महासघ निरन्तर क्रियाशिल बा । हाल यी प्रदेशमेफे ४२ ठो सस्था आवद्ध रहल बटै । २०७८ के जनगणना अनुसार सुदूरपश्चिम प्रदेशमे ७० हजार ८ जाने अपांगता रहल व्यक्ति रहल बटै । जेम्ने कैलालीमे २२ हजार ३६३ जाने अपांगता रहल व्यक्ति रहल महासंघ जनैले बा ।

सक्कु मेरिक अपांगता रहल व्यक्तिहुकनके सर्वाङिगण बिकास ओ अपांगता समावेशिताके सुनिश्चितता समाजमे रहल मानवीय विविधता बोकल अपाङगता रहल नागरिक, सडक बालबालिका, बेसहारा, असहाय, हिंसामे परल महिला, जेष्ठ नागरिक, दलित, मजदुर, किसान, लैंगिक अल्पसंख्यक, राउटे, राजी, बादी सिमान्तकृत समुदाय ओ राज्य विकासके मुल प्रवाहमे आइ नइसेकल हुइट ।

पाछे पारल, अपन ईच्छा, चाहना माग करे नइसेक्ना नागरिकहुकनके समाजमे सम्मानपुर्वक बाँचे पैना तथ्यमे विश्वास रख्टी मानवअधिकारके विश्वव्यापी घोषणा पत्र, अपाङगता रहल नागरिकके अधिकार सम्बन्धी संयूक्त राष्ट्र संघीय महासन्धी लगायत बालबालिका ओ महिला सम्बन्धी टमान अभिसन्धि ओ घोषणापत्र उप्पर दृढ विश्वास करटी नेपालके संविधानसे प्रदत्त मौलिक हक अधिकारहुकनहे आत्मसात करटी, लैंगिकता पक्ष ओ मानवीय विविधतायूक्त नागरिकके शिक्षा, स्वास्थ्य, रोजगारी, आयआर्जन, सीप विकास, सशक्तीकरण ओ पुनस्र्थापना मार्फत राष्ट्रिय नीति निर्माण तथा सर्वाङगीण राष्ट्र विकासके मुलप्रवाहमे समान सहभागिता एवं सेवामे सहज पहुँच पुगैना उद्देश्यसे “रास्ट्रिय अपांग महासघ नेपाल ” संस्था स्थापना करके सञ्चालन करल हो ।