दिपेन्द्र माविके विद्यार्थी पाठयक्रमसंगे परम्परागत थारु खाना पकाई सिख्टी
पहुरा समाचारदाता
हसुलिया, २८ अगहन । कैलाली जिल्लाके कैलारी गाउँपालिका वडा नम्बर १ मे रहल दिपेन्द्र माविके विद्यार्थी पाठयक्रम रहल पाठके सैद्धान्तिक ज्ञानसंग्गे व्यवहारिक ज्ञानफे खिख्टी रहल बटै ।
उ विद्यालयके कक्षा ८ मे अध्ययनरत रहत विद्यार्थी ‘हाम्रो कैलारी मातृ भाषाके पाठयक्रम लागु हुइल बा, उ पाठयक्रममे रहल पाठके सैद्धान्तिक ज्ञान लेनासंगे थारु खाना पकैना, टमान कला, संस्कृतिहे व्यवहारमे उतर्ना प्रयास करटी रहल बटै ।
थारु समुदायके बाहुल्यता रहल ओ कक्षा ८ मे थारु समुदायके ढेर विद्यार्थी अध्ययनरत रहल ओरसे विफेक रोज विद्यार्थीहुक्रे थारु परिकार अन्र्तगत मेरामेराइक (दशिया, डेवारी, माघमे पकैना) ढिक्री, अँचार, भाजिक झलरा पकाके विद्यालयके शिक्षक, कैलारी गाउँपालिकाके जनप्रतिनिधि ओ कर्मचारीहुकन थारु परिकार खवाके स्वागत करल रहिट ।
उ विद्यालयके प्रअ विनोद भट्टराई विद्यार्थीहुक्रे सैद्धान्तिक ज्ञानसंग्गे व्यवहारिक ज्ञान आर्जन करेक थारु परिकार बनाइल बटैलै । उहाँ कहलै, ‘दिपेन्द्र माविमे थारु समुदायके ढेर विद्यार्थी बटै । ओइने थारु समुदायके पहिचानसे जोरल ढिक्री पकाके पहुनाके स्वागत करलै, ढिक्री पकैना व्यवहारिक ज्ञान आर्जन करलै ।’
उहाँ कहलै आज थारु परिकार बनाई सिखागैल, यिहीसे पहिले कला, संस्कृति, परम्परागत ज्ञान डेहलक लाग टमान गतिविधिमे सहभागि कराजैटी बा । विद्यालयमे अँग्रेजी ओ नेपाली माध्यमसे पह्राई हुइटी रहल ओरसे विद्यार्थीके संख्या बह्रल बटैलै ।
ओस्टेक विद्यार्थीनसे पकागिल थारु परिकारके गाउँपालिका उपाध्यक्ष भगवतीकुमारी चौधरी, शिक्षा शाखा प्रमुख गणेश प्रसाद मिश्र, सामाजिक विकास अधिकृत यगम कलेल लगागत कर्मचारी तथा जनप्रतिनिधिसे अनुगमन करल रहिट ।
अनुगमनके क्रममे गाउँपालिका उपाध्यक्ष भगवतीकुमारी चौधरी विद्यार्थीनहे सैद्धान्तिक ज्ञानसंगे व्यवहारिक ज्ञान पैना सह्रनिय रहल बटैली । अब्बेक समयमे सैद्धान्तिक ज्ञानसंगे व्यवहारिक ज्ञान आवश्यक बा,’ गाउँपालिका उपाध्यक्ष कहली, ‘व्यवहारिक ज्ञानसे विद्यार्थीन प्रत्यक्ष सिखेपैना अवसर पैही । जिहीसे बुझना सहजुल हुई ।’ उहाँ यी कार्यहे निरन्तरता डेना आवश्यक रहल बटैली । थारु समुदायके ढिक्रीमे कौनो मिसावट नइरहठ, जौन पानीक बाफसे पकाजाइठ । स्वास्थ्यके मजा रहलफे उहाँ बटैली ।
