‘राज्यसे द्वन्द्व प्रभावितहे अनुभूति हुइना मेरके हेरे नइसेकल हो’
पहुरा समाचारदाता
धनगढी, १४ पुस । कैलाली जिल्ला समन्वय समितिके कार्यवाहक सभापति खगराज भुषाल राज्यसे द्वन्द्व प्रभावितहुकनहे अनुभूति हुइना मेरके हेरे नइसेकल बटैले बटै ।
थारु महिला उत्थान केन्द्र बर्दियाके आयोजनामे शुकके रोज धनगढीमे लैङिक न्यायप्रति जवाफदेहिता कार्यक्रम अन्तर्गत स्थानीय सरकार, नागरिक समाज ओ द्वन्द्व प्रभावित समुदायके प्रतिनिधिविच हुइल जिल्ला स्तरीय शान्ति संवाद कार्यक्रममे उहाँ बाट बत्वाइल रहिट ।
सशस्त्र द्वन्द्वकालमे ढेर जाने पीडित हुइलै, उहाँ कहलै, ‘राज्यसे पीडितके परिपूरण हुइना मेरिक सम्बोधन नइसेकल हो, समय ओ परिस्थिति अनुुसारके आवश्यकताके आधारमे तीन तहके सरकार सहयोग करे पर्ना जरुरी बा ।’
उहाँ कहलै, ‘द्वन्द्व प्रभावितहुकनहे तालिम डेहल बा । दक्ष हुइना मेरिक सीपके बृद्धि कैना जरुरी बा । ओ द्वन्द्वपीडितसे तालिममे लेहल सीपके सदुपयोग करटी व्यावसायिक रुपमे जाई पर्ना आवश्यकफे बा ।
टीकापुर नगरपालिकाके उपप्रमुख खडकबहादुर शाह आर्थिक अभावसे कोई सीपमूलक तालिम, शिक्षासे वञ्चित हुइटा कलेसे नगरपालिका ओइनहे सदैव सहयोग बटैलै । उहाँ कहलै, ‘द्वन्द्वपीडितहे सहयोग कैना राज्यके दायित्य हो । द्वन्द्वपीडित अपनहे आवश्यक पर्ना तालिम ओ सीपके आवश्यक रहलेसे नगरपालिकाके न्यायिक समितिके सम्पर्क कैबी । गौरीगंगा नगरपालिका वडा नम्बर ८ के वडाध्यक्ष करुणा चौधरी गैल बरष द्वन्द्वपीडितहुकनके लाग ढाई लाख बजेट विनियोजन करल मने यी बरस पालिकासे बजेट विनियोजन हुइल बटैली ।
घोडाघोडी नगरपालिकाके महिला तथा वालबालिका शाखा प्रमुख ईन्दुकुमारी जोशी अपन पालिका द्वन्द्वपीडित, अल्पसंख्यक, सीमान्तकृत कहिके संयुक्त रुपमे बजेट विनियोजन करल आवश्यकताके आधार सक्कु जनहनहे समेटल बटैली ।
गौरीगंगा नगरपालिकाके स्वास्थ्य शाखा प्रमुख सपना घिमिरे द्वन्द्वपीडितहुकनहे अवस्था कम्जोर रहलेसे निःशुल्क स्वास्थ्य विमा करके स्वास्थ्य उपचारमे पहुँच बह्राई सेक्ना बटैली ।
घोडाघोडी नगरपालिकाके स्वास्थ्य तथा सामाजिक विकास शाखाके संयोजक बेदबहादुर चौधरी अपन पालिकामे जेष्ठ नागरिकके निःशुल्क विमाके कार्यक्रम आघे बह्राइल बटैलै ।
गौरीगंगा नगरपालिकाके महिला तथा बालबालिका शाखा प्रमुख भावना जोशी, घोडाघोडी नगरपालिकाके न्यायिक समिति सदस्य रोहित बम द्वन्द्वपीडितके लाग टमान कार्यक्रम लागु करल बटैलै ।
कैलारी गाउँपालिकाके स्वास्थ्य शाखा प्रमुख नरेशकुमार चौधरी गाउँपालिकासे द्वन्द्वपीडितहुकनहे आयमुलक, सीपमुलक तालिम प्रदान करटी स्वास्थ्य क्षेत्रमे सहयोग करेक लाग वडाके सिफारिसमे उ परिवारके निशुल्क स्वास्थ्य विमा कैना बटैलै ।
कैलारी गाउँपालिकाके महिला तथा बालबालिका शाखा प्रमुख बालकुमारी चौधरी गाउँपालिकासे द्वन्द्वपीडितहे सम्बोधन हुइना मेरिक सीपमुलक आयमुलक तालिमके सहयोग ओ व्यवसाय संचालनके सहयोग करल बटैली । उहाँ कहली, ‘लैगिंक न्याय हुइना मेरिक द्वन्द्वपीडितसंगे ंिहसामे परल ओ एकल महिलाहे सम्बोधन हुइना मेरिक तालिम संचालन कैगिल बा ।’
कैलारी गाउँपालिकाके कृषि शाखा प्रमुख मैया चौधरी कृषकके नाउँमे नक्कली किसान फाइदा लेहल बटैली । उहाँ कहली, द्वन्द्वपीडित व्यवसायिक खेती करलेसे चक्लाबन्दी करके अइलेसे अनुदान डेना सहजुल हुइना बटैली ।
वेपत्ता परिवारके सदस्य टीकापुर निवासी सर्मिला चौधरी द्वन्द्वपीडितहुक्रे आर्थिक अभावमे शिक्षासे बञ्चित हुइ परल बटैली । उहाँ कहली, ‘मै एसइई कम जिपिए आइल रहे । लोकसेवाके कक्षा लेहल लाग फाराम भरले रह्ु मने सिफारिसमे नइपरनु ।’ कार्यक्रममे द्वन्द्वपीडित घोडाघोडीके जानकी चौधरी, पुष्पा चौधरी योग्यता अनुसारके रोजगारीके व्यवस्था कैडेना माग करली ।
धनगढी–८ के रशमी चौधरी द्वन्द्वपीडितहुक्रे स्वास्थ्य विमा करल मने स्वास्थ्य सेवा लेहना सहज नइरहल बटैले बटी । द्वन्द्वपीडितहुक्रे उच्च शिक्षासे वञ्चित हुइलफे उहाँ बटैली ।
घोडाघोडीके वेपत्ता परिवारके सदस्य निर्मला चौधरी द्वन्द्वपीडित परिचयपत्र नैहुइल कारण टमान ठाउँमे विभेदपूर्ण व्यवहार करल बटैली । उहाँ कहली, ‘द्वन्द्वपीडितके नाउँमे सेवा लेहे जाई परिचयपत्र माग करल मने अपनेहुक्रनठेन कौनो प्रमाण नइरहलपाछे सेवासे बञ्चित हुई परल बा ।’
थारु महिला उत्थान केन्द्र बर्दियाके अध्यक्ष प्रिज्म थारुके अध्यक्षतामे हुइल कार्यक्रममे उहाँ संस्था नम्मा समयसे द्वन्द्वपीडितके अधिकारके लाग काम करटी आइल बटैली ।(बाँकी ४ पेजमे) संवाद कार्यक्रममे थारु महिला उत्थान केन्द्रके कार्यक्रम संयोजक बसन्त थारु कार्यक्रमके उद्देश्य ओ परियोजनासे करटी आइल गतिविधिबारे जानकारी डेहल रहिट । कार्यक्रमके संचालन सर्मिला चौधरी करल रहिट ।
लैङिक न्यायप्रति जवाफदेहिता कार्यक्रम अन्तर्गत स्थानीय सरकार, नागरिक समाज ओ द्वन्द्व प्रभावित समुदायके प्रतिनिधिविच हुइल जिल्लास्तरीय शान्ति संवाद कार्यक्रममे कैलाली लगायत बर्दिया जिल्लाके द्वन्द्वपीडित परिवारके सदस्य, जनप्रतिनिधि ओ विषगत शाखाके प्रमुख, नागरिक समाजके प्रतिनिधिहुकनके सहभागिता रहल रहे ।
