सिएफसीसी भजनीके १४ औं वार्षिक साधारणसभा

जीवन चौधरी
भजनी, १६ पुस । सामुदायिक वन उपभोक्त समुह समन्वय समिति भजनीके १४औं वार्षिक साधारणसभा तथा जनलेखा परिक्षण कार्यक्रम धनौरामे हुइल बा ।

कार्यक्रममे वडका पहुना रहल भजनी नगरपालिकाके नगर प्रमुख केवल चौधरी वन अतिक्रमण करुइयनहे संरक्षण कैना काम वनके उच्च पदाधिकारीसे हुइल आरोप लगैलै । उहाँ कहलै, वनके उच्च पदाधिकारीसे वनमे राजनितिकरण कैना काम हुइटी रहल बा । जिहीसे बन जोगैना कर्रा रहल ओरसे अतिक्रमण वह्रटी गैलेसे मरुभूमिमे परिणत हुई सेकी ।’

पहलमानपुर सव डिभिजन वन कार्यालयके प्रमुख रामविचारी ठाकुर वन्य जन्तुके बासस्थान खण्डीकृत हुइटी गैल बटैलै । उहाँ कहलै, वन्य जन्तु ओहोर दोहोर कैना ठाउँ ओरैटी जाइटा, सामुदायिक वन उपभोक्त समन्वय समिति संरक्षणमे लागल, डिभिजन वन कार्यालय ओकर हातमे हात मिलाके आघे बह्री ।’

फेकोपनके केन्द्रीय सदस्य डण्डीराज सुवेदी सामुदायिक वनभिटर कौनो मेरिक कर नइलगाई पैना प्रष्ट परलै । उहाँ कहलै, सामुदायिक वनभिटर कौनो मेरिक क्षति हुइलेसे सरकार पूर्ण रुपमे जिम्मेवार रहठ ।’

कार्यक्रममे हरियाली सामुदायिक वनके अध्यक्ष राहुल बुढा खुला सीमानाका हुइल कारण चरीचरण रोक्ना समस्या हुइल बटैलै ।

चरा विज्ञ हिरुलाल डगौरा भजनी क्षेत्रमे चिरै चुुरुङगीके भारी अवसर रहल बटैलै । उहाँ कहलै, ‘यहाँ सामुदायिक वनके अपने महत्व बा । ओम्नेफे तलतलैयाफे ढेर बा । जिहीसे बाहेर देशसे आइल चिरैनके बास बनल बा ।’

सयपत्री सामुदायिक वनके सदस्य पूर्णबहादुर बन्तोला बनके नीति नियममे रहिके काम कैना अवस्था रहल बटैलै ।
तराई भु परिधि तालके फिल्ड सुपर भाइजर तिलक चौधरी वन्य जन्तु जोखिमसंगे लोप हुइना अवस्था रहल ओरसे ओइनके नेंग्ना डगर सक्कु सामुदायिक वनसे बनाई पर्ना बटैलै ।

पत्रकार धर्मेन्द्र विष्ट पुरैना तलुवाहे जीवन्त रखना सक्कु जनहनहे आग्रह करलै । थारु महालोक गायक मनिराम चौधरी गितके माध्यमसे वन जंगल संरक्षणमे जोड डेहल रहिट ।

प्रगतिशिल सामुदायिक वनके अध्यक्ष दिपक चौधरी प्रगति प्रतिवेदन ओ सिएफसीसीके सचिव इन्द्र विक आयव्यय विवरण पेश करल रहिट । कार्यक्रममे हरियाली सामुदायिक वनसे डेउडा, प्रगतिशिलसे सखिया नाँच डेखैले रहिट । यिहे विच पत्रकार जीवन चौधरी, सामुदायिक वनके पदाधिकारी, राजनितिक दल, समाजसेवीहुकनहे दोसल्लासहित सम्मान कैगिल रहे ।

सिएफसीसी भजनीके अध्यक्ष खोजराज चौधरीके घरगोस्यामे हुइल कार्यक्रममे उहाँ जनचेतनाके कमीसे वन जंगल बचैना बहुत कर्रा रहल बटैलै । उहाँ कहलै, चोरी शिकारी नियन्त्रण कैना सक्कु वनकर्मी लग्लेसे केल जोगाई सेक्जाई ।’ कार्यक्रमके संचालन मंगला जोशी ओ संचालन वनरक्षक प्रकाश विक करल रहिट ।