थारु गीत संगीतमार्फत कला संस्कृति संरक्षणमे सहयोगः मन्त्री चौधरी
पहुरा समाचारदाता
धनगढी, ७ चैत । थारु गीत संगीतमार्फत थारु भाषा, कला संस्कृति संरक्षणमे सहयोग पुगल सुदूरपश्चिम प्रदेश सकारके आर्थिकमन्त्री घनश्याम चौधरी बटैले बटै ।
बर्दगोरिया इभेन्ट एण्ड मार्केटिंग प्रालिके आयोजनामे मंगरके धनगढीमे हुइल थारु राष्ट्रिय म्युजिक आवार्ड २०८० के टप लिष्टमे परल कलाकारहे प्रमाणपत्र वितरण कैना कार्यक्रमहे सम्बोधन कैटि मन्त्री चौधरी थारु गीत संगीत तथा म्युजिक भिडियोमार्फत थारु भाषा, कला संस्कृति संरक्षणमे सहयोग पुगल बटाइल हुइट ।
‘हमार थारु समुदायके भाषा कला संस्कृति बचैनामे अपने कलाकारहुक्रे रातदिन खटल बटि,’ मन्त्री चौधरी कहलै, ‘इहीसे थारु समुदायके इतिहास ओ पहिचान बचैना सहयोग पुगल बा ।’
थारु समाजमे रहल विकृति विसंगतिहे हटाके समाज रुपान्तरणमे फेन थारु गीत संगीत महत्वपूर्ण भूमिका खेलल् मन्त्री चौधरी बटैलै । उहाँ गीत संगीतमार्फत थारु समुदायहे राष्ट्रिय तथा अन्तर्राष्ट्रिय स्तरमे फेन चिन्हाइल बटैलै ।
मन्त्रीचौधरी थारु गीत संगीत, भाषा, कला संस्कृति संरक्षणके लाग अपने प्रदेश सरकारमार्फत सहयोग कैना प्रतिवद्धता फेन जनैलै ।
राष्ट्रिय थारु कलाकार मञ्चके केन्द्रीय अध्यक्ष विनय वैद्य थारु कलाकारहुक्रे लोप हुइटी रहल भाषा संस्कृति संरक्षणमे महत्वपूर्ण भूमिका खेलल् बटैलै । यकर साथे उहाँ म्युजिक आवार्डसे थारु कलाकारहे थप हौसाला पुग्ना बटैलै ।
बर्दगोरिया इभेन्ट एण्ड मार्केटिंग प्रालिके प्रबन्ध निर्देशक तथा थारु राष्ट्रिय म्युजिक आवार्ड २०८० के संयोजक हरेन्द्र चौधरी आवार्डके लाग १२० जाने कलाकार नोमिनेशनमे सहभागिता जनाइल बटैलै ।
नोमिनेशनमे सहभागी कलाकारमध्ये उहाँ २८ विधाके लाग ६९ जाने कलाकारहे टपलिष्टमे समावेश कैके प्रमाणपत्र वितरण करल बटैलै ।
ओस्टहे इहे चैत २४ गते धनगढीमे हुइना ग्राण्डफिनालेके लाग भोटिंग फेन सुरु हुइल संयोजक चौधरी जानकारी डेलै ।
