स्वास्थ्य क्षेत्रओर ढेर काम करटीः उपप्रमुख राना
पहुरा समाचारदाता
धनगढी, २८ वैशाख । धनगढी उपमहानगरपालिकाके नगर उपप्रमुख कन्दकला राना मानसिक स्वास्थ्य तथा मनोसमाजिक अपांगता रहल व्यक्तिहुक्रनके स्वास्थ्य उपचार लगायत टमान कार्यक्रमके लाग नीति तथा कार्यक्रम सहित बजेट विनियोजन कैना बटैले बाटी ।
शुकके रोज कोसिस नेपालके आयोजनामे हुइल मानसिक स्वास्थ्य तथा मनोसमाजिक समस्याबारे जनप्रतिनीधीहुक्रन बिच हुइल कार्यक्रममे उहाँ ओइसीन बटाइल हुइटी । उपप्रमुख राना स्वास्थ्य तथा शिक्षा लगायत क्षेत्रमे ढेर काम कैटी रहल बटैटी उहाँ अइना आर्थिक बरसमे मानसिक स्वास्थ्य क्षेत्रके लाग फेन नीति तथा कार्यक्रम बनाके काम कैना बटैली ।
उहाँ कहली, ‘स्वास्थ्थ तथा शिक्षामे सबके पहुँचके लाग धनगढी उपमहानगरपालिकाके सक्कु वडामे विशेषज्ञ सहितके स्वास्थ सेवा डेटी रहल बाटी, यम्ने गरिव, विपन्न परिवार तथा स्वास्थ्य सेवासे डुर रहल व्यक्ति सेवा लेना अवसर पैले बाटै ।’
मानसिक स्वास्थ्य समस्यासे पीडित कमला राना अपने मानसिक स्वास्थ्यसे ढेर पीडित रहल बटैटी आपन जस्टे अन्यके लाग सरकारसे स्वास्थ्य उपचारके व्यवस्था कैडेहे पर्ना जोड डेहल रही ।
उहाँ कहली, ‘हम्रे शारीरिक अपांगता रहल व्यक्तिहे किल अपांगता कहठी मने मानसिक समस्या रहल व्यक्तिनके समस्या नै डेख्ठी । मोर सक्कु निकायसे एकठो अनुरोध बा, हमार जस्टे मानसिक समस्यासे जुझ्टी रहल व्यक्ति परिवारके लाग स्वास्थ्य उपचार ओ रोजगारमुलक सीपके व्यवस्था कैडेहे परल ।’
संस्थाके कार्यक्रम संयोजक रवि पौडेल परियोजना तथा सुदूरपश्चिम प्रदेशमे मनोसामाजिक अपांगताके अवस्थाबारे जानकारी कराइल रहिट । उहाँ सुदूरपश्चिमके कुल जनसंख्या २६ लाख ९४ हजार ७८३ मध्ये २.६ प्रतिशत ७० हजार आठ जाने अपांगता रहल बाटै कलेसे उमध्ये दुईहजार ४५८ (३.५ प्रतिशत) मनोसामाजिक अपांगता रहल बटैलै ।
कोसिस संस्था कैलालीके पैरवी अधिकृत पशुपति खाती मनोसामाजिक अपांगता व्यक्ति, समाज ओ राष्ट्रहे भारी बोझ रलेसे फेन यम्ने नगण्य काम हुइल बटैली । नेपाल सरकार मानसिक स्वास्थ्यहे डेना महत्व सरकारसे मानसिक स्वास्थ्यहे विनियोजन करना बजेटसे स्पष्ट बा, जोन कुल स्वास्थ्य बजेटके १ प्रतिशतसे फेन कम हुइठ । मनोचिकित्सक, मनोविद् ओ मनोविमर्शकर्ता अँग्रीमे गने सेक्ना संख्यामे बटैं । तसर्थ, सर्वप्रथम मानसिक स्वास्थ्य ओ मनोसामाजिक अपांगताहे सरकार प्राथमिकतामे ढरे पर्ना उहाँ बटैठी ।
मनोसामाजिक अपांगता हमार देशमे गम्भीर समस्याके रूपमे आघे आइल बा । अपांगताके बाट करेबेर मनोसामाजिक अपांगताहे फेन प्राथमिकताके साथ स्थान डेहे परल । जनमानसमे यीबारेके छलफल व्यापक बनाके यीबारेके सूचनाहे उचितरूपमे प्रचारप्रसार कैके व्याप्त भ्रमहे चिरे उहाँ कहठी ।
सरकारी तवरसे यीसम्बन्धी उचित नीति ओ कानून बनाके ओकर कार्यान्वयनमे तदारुकता देखाइ परल । सामुदायिक ओ व्यक्तिगत तवरसे यीसम्बन्धी उचित सूचना लेके मनोसामाजिक अपांगता रहल व्यक्तिहुकनहे समानुभूति प्रदान कैके उहाँहुकनके पुनःस्थापनामे सहयोग करे पर्ना जरुरी रहल अधिकृत खाती बटैली ।
संस्थाके कार्यक्रम अधिकृत पदमराज जोशी कार्यक्रमके सहजीकरण करल रहिट । कार्यक्रममे धनगढी उपमहानगरपालिकाके वडा अध्यक्ष, सदस्य लगायत टमान शाखाके कर्मचारीहुक्रनके सहभागिता रहल रहे ।
