मुक्त हलिया, कमैयाके सवाल सम्बोधनके माग
पहुरा समाचारलाता
धनगढी, ४ वैशाख । सुदूरपश्चिमके मुक्त हलिया, कमैया, कमल्हरीहुक्रे आगामी आर्थिक बरसके नीति तथा कार्यक्रम प्रति ध्यानाकार्षण जनैले बाटै ।
जेठ १ गते राष्ट्रपति रामचन्द्र पौडेलसे प्रस्तुत करल नीति तथा कार्यक्रममे मुक्त हलिया, कमैया, कम्लहरी, हरवा चरवाहुक्रनके सवाल सम्बोधन नैहुइल प्रति उहाँहुक्रे ध्यानाकार्षण जनाइल हुइट ।
बिफेक रोज धनगढीमे संयुक्त पत्रकार सम्मेलन मार्फत नीति तथा कार्यक्रम परिमार्जन कैके उहाँहुक्रे आपन सवाल सम्बोधन करे पर्ना औँल्याइल रहिट । राष्ट्रिय मुक्त हलिया समाज महासंघ नेपालके अध्यक्ष इश्वर सुनार हलिया, कमैया, कम्लहरी, हरवा चरवाहुक्रनके लाग कौनो फेन सवाल सम्बोधन नैहुइल प्रति दुःख व्यक्त करलै । ‘मुक्त हलिया, कमैया, कम्लहरी, हरवा चरवाहुक्रनके अवस्था अभिन फेन दयनीय रहल बा । अब्बे फेन हलिया, कमैया, कम्लहरीहुक्रे शिक्षा, स्वास्थ्यके क्षेत्र ओर विजोग रहल बा’, उहाँ कहलै, ‘हम्रे ढेर अपेक्षा कैले रही कि अब्बेक सरकार नीति तथा कार्यक्रममे हमार हक अधिकारबारे सम्बोधन करी, मने नीति तथा कार्यक्रममे मुक्त हलिया, कमैया, कम्लहरीनके टे नाउँ फेन उच्चारण नैहुइल ।’
उहाँ मुक्त हलिया, कमैया, कम्लहरी, हरवा चरवाहुक्रनके लाग २०७६ से बजेट फेन विनियोजन नैकरल जानकारी डेलै ।
उहाँ आघे कहलै, ‘देशमे तीन तहके सरकार बा, मने सक्कु सरकार हम्रहीनहे उपेक्षा करले बा । एकदमे पिँढमे रहल समुदाय जे जर्जर अवस्थामे बँच्टी रहल ओइनके लाग कौनो सम्बोधन नैहुइना टे बहुट दुःखद ओ गम्भीरके विषय हो ।’
अध्यक्ष सुनार सरकारसे लानल आगामी नीति तथा कार्यक्रमहे परिमार्जन करे पर्ना जोड डेलै । उहाँ नीति तथा कार्यक्रम परिमार्जन नैकैलेसे अथवा आपनहुक्रनके माग सम्बोधन कैनामे वेवास्ता कैलेसे आन्दोलन फेन कैना चेतावनी डेले बाटै ।
मुक्त कमैया समाजके अध्यक्ष पशुपति चौधरी मुक्त कमैयाहुक्रे आभिन फेन ढेर समस्यासे गुज्रटी रहल बटैलै । अध्यक्ष चौधरी राज्यसे कयौँचोट छानविन कैलेसे फेन आभिनफेँ ढेर कमैयाहुक्रे पहिचानसे वञ्चित रहल बटैलै ।
‘मुक्त कमैयाहुक्रनठेँ पुर्जा बा मने जग्गा उपभोग करे नैपाइल हुँइट, जग्गामे घर बनाके बैठे नैपाइल हुँइट, मुक्त कमैयाहुक्रनठन परिचय पत्र नैहो, राज्यसे जग्गा टे उपलब्ध कराइल मने ओम्ने बैठ्ना वातावरण नैबनाडेले हो,’ उहाँ कहलै, ‘अत्रे किल नैहो, हलियाके फेन समस्या यथावत बा, ढेर हलियाहुक्रे आभिन फेन परिचयपत्रसे वञ्चित रहल अवस्था बा । कम्लहरीनके समस्या आभिन फेन ओस्टहे बावै, ढेर कम्लहरीहुक्रे फेन परिचयपत्रसे आभिन फेन वञ्चित बाटै । इ मेरके समस्यासे गुज्रटी रहल बेला फेन राज्यसे हम्रहीनहे बिस्रैटी गैल अनुभुटी हुइल बा ।’
आगामी आर्थिक बरसके नीति तथा कार्यक्रममे राज्यसे आपन सवालहे सम्बोधन कैना विश्वस्त रहल बेला वेवास्ता करल प्रति अध्यक्ष चौधरी आपत्ति फेन जनैले बाटै । उहाँ सरकारसे आपन नीति तथा कार्यक्रम परिमार्जन कैके मुक्त हलिया, कमैया, कम्लहरी, हरवा चरवाहुक्रनके सवाल सम्बोधनके लाग जोडदार माग फेन कैले बाटै ।
साथे उहाँ आपनहुक्रनके सवालहे सम्बोधन नैकैलेसे आन्दोलनमे उत्रना फेन चेतावनी डेले बाटै । पत्रकार सम्मेलनमे मुक्त कमैया महिला विकास मञ्चके अध्यक्ष सिमा चौधरी, कौशिला चौधरी, मुक्त कमैया समाज प्रदेश समिति अध्यक्ष चन्द्र चौधरी, मुक्त कम्लहरी विकास मञ्चके उपाध्यक्ष गीता चौधरी लगायतके उपस्थिति रहल रहे ।
