राष्ट्रिय मानव अधिकार आयोगके २४ औं वर्षिकोत्सव

पहुरा समाचारदाता
धनगढी, १३ जेठ । सुदूरपश्चिम सरकारके मुख्यमन्त्री दीर्घबहादुर सोडारी मानव अधिकार संरक्षण, प्रवद्र्धन ओ सम्मानके लाग आर्थिक विकाससँगे सामाजिक ओ सांस्कृतिक विकास हुइ परना बटैले बटैं ।

अँट्वारके रोज धनगढीमे राष्ट्रिय मानव अधिकार आयोगके २४ औं वर्षिकोत्सवके उद्घाटन करटि मुख्यमन्त्री सोडारी मानव अधिकार रक्षाके लाग संघ, प्रदेश, स्थानीय सरकारलगायत अन्य सरोकारवाला निकाय समन्वय ओ सहकार्य करेपरना बटैलैं ।
उहाँ मानव अधिकारके सम्मानके लाग समाजके रहल छाउपडी, विभेद, जघन्य अपराधहे नियन्त्र करे परना बटैलैं । उहाँ मानव अधिकार संरक्षणके विषयहे प्रभावकारी बनाइक लाग प्रदेश सरकार अपन नीति तथा कार्यक्रममे टमान कार्यक्रम समोट बटैलैं ।

कार्यक्रममे भूमि व्यवस्था, कृषि तथा सहकारीमन्त्री टीका थापा सक्कु सरोकारवाला संघ संस्थाहुक्रे समन्वय ओ सहकार्य करलेसे किल मानव अधिकारके सम्मान हुइना बटैलैं । उहाँ कलैं, “मानव अधिकार कना संस्कार हो । यकर संरक्षण ओ सम्वद्र्धन करना हमार सबके दायित्व ओ कर्तव्य हो ।”

अस्टेक, कार्यक्रममे प्रदेश नीति तथा आयोगके उपाध्यक्ष गणेश विक मानव अधिकार संरक्षण करना अब्बेक चुनौतीहे सबजे मिलके समाधान करे परना बटैलैं । उहाँ मानव अधिकारके उपयोग करना सक्कु नागरिकके हकके विषय रहल बटैलैं ।

कार्यक्रममे राष्ट्रिय मानव अधिकार आयोगके सुदूरपश्चिम प्रदेश प्रमुख हरि ज्ञावली मानव अधिकार संरक्षण ओ रक्षाके लाग प्रभावकारी कार्यान्वयन करेक लाग सबजे अपन अपन जिम्मेवारी ओ उत्तरदायित्व वहन करे परना बटैलैं । उहाँ कलैं, “मानव अधिकार रक्षाके लाग बनल ऐन, नियम, कानून, नीतिके प्रभावकारी कार्यान्वयन करे परठ ।”

अस्टेक, कैलाली प्रमुख जिल्ला अधिकारी धर्मेन्द्रकुमार मिश्रा मानव अधिकार उल्लंघनके घटना न्यूनीकरण करेक लाग सबजे अपन जिम्मेवारी ओ कर्तव्य पालना करे परना बटैलैं ।

कार्यक्रममे धनगढी उपमहानगरपालिकाके उपप्रमुख कन्दकला राना, गैरसरकारी संस्था महासंघ सुदूरपश्चिम प्रदेश अध्यक्ष देवी खनाल, दलित महिला अधिकार मञ्चके अध्यक्ष सावित्री घिमिरेलगायतके मन्तव्य व्यक्त करले रहैं । कार्यक्रमके सञ्चालन राष्ट्रिय मानव अधिकार आयोगके अधिकृत गणेशराज जोशी करले रहैं ।