मानव बेचविखन विरुद्धके प्रादेशिक कानून हाली बनैना जरुरी
पहुरा समाचारदाता
धनगढी, १४ जेठ । मानव बेचविखन तथा ओसरपसार विरुद्धके प्रादेशिक कानून हाली बनैना जरुरी रहल एक कार्यक्रममे जोर डेहल बा ।
महिला कानून विकास मञ्चके आयोजना अँटवारके रोज धनगढीमे हुइल प्रादेशिक छलफल कार्यक्रममे सुदूरपश्चिम प्रदेशमे चार समितिके मानव बेचविखन तथा ओसरपसार विरुद्धके प्रादेशिक कानून हाली बनैना जरुरी रहल बटाइल रहिट ।
कार्यक्रमके बरका पहुना रहल सुदूरपश्चिम प्रदेशके उपसभामुख कोइली देवी चौधरी मानव बेचविखन तथा ओसरपसार विरुद्धके प्रादेशिक कानून हालसम नइबनल ओरसे हाल हाली बनाइ पर्ना बटैले बटी ।
उहाँ कहली, एक ठो मानव हुके स्वार्थ पूर्तिके लाग दुसर मानवहे वेचविखन कैना दुखद बाट हो । सुदूरपश्चिम प्रदेश यी कानून नइसेक्ना विदम्वानाके बाट हो । अभिन संघीय ऐन अनुसार चलल ओरसे प्रदेश ओ स्थानीय कानून बनाके कार्यान्वयन कैना जरुरी बा ।’
सुदूरपश्चिम प्रदेशसभा सदस्य तथा सार्वजनिक लेखा समिति सभापति विरबहादुर थापा अभिनसम मानव बेचविखन तथा ओसरपसार विरुद्धके प्रादेशिक कानून नैबनेसेकल कहटी अपनेहुकनके ध्यानकर्षण हुइल बटैलै । प्रदेशस्तरीय कानून बनाइक लाग अपनेहुक्रे आव तदारुकताके साथे लाग पर्ना बटैलै ।
सामाजिक विकास समिति सदस्य माया पन्त, तुल्सी देवकोटा लगायतसे मानव बेचविखन तथा ओसरपसार विरुद्धके प्रादेशिक कानून पहिले बनसेके पर्ना मने अभिनसम काहे नइबनल कहटी खोजनीति करे पर्ना बटैलै । यी कानून बनाइक लाग विषयगत समिति विच सहकार्य ओ समन्वय आवश्यक रहल बटैलै ।
आन्तरिक मामिला तथा कानून मन्त्रालयके सचिव गंगाबहादुर खरेल मानव बेचविखन तथा ओसरपसार विरुद्धके प्रादेशिक कानून नइबनल कारण संघीय कानून अनुसार आघे बह्रल बटैलै ।
सामाजिक विकास मन्त्रालयके महिला तथा बालबालिका शाखा प्रमुख जयन्ती गिरीफे प्रादेश कानून नइहुके संघीय कानूनके अनुसार गतिविधि आघे बह्राइल बटैली । प्रदेशमे लैङिक समानता तथा सामाजिक समावेशीकरण नीति, प्रदेश बालबालिका सम्बन्धी प्रादेशिक नीति, बालविवाह विरुद्धके रणनीतिक कार्ययोजना, प्रारम्भिक बाल विकास, विभेदपूण लिंग छनौटके मस्यौदा तयार पारल बटैली ।
महिला कानून विकास मञ्चके कार्यकारी निर्देशक तथा अधिवक्ता सविन श्रेष्ठ प्रस्तुतीकरण करटी मानव बेचबिखन तथा ओसार पसार (नियन्त्रण) ऐन, २०६४ से स्थानीय तह लगायत प्रदेश तहसे फे पुनःस्थापना केन्द्र ओ कोषके स्थापना करे पर्ना जिम्मेवारी थपलसंगे ओकर लाग स्थानीय तह ओ प्रदेश तहसेफे कानून बनाई पर्ना अवस्था रहल बटैलै ।
अब्बेसम कोसी प्रदेश ओ लुम्बिनी प्रदेश मानव बेचविखन तथा ओसरपसार विरुद्धके प्रादेशिक कानून बनाइल ओ सुदूरपश्चिम प्रदेशके साँफेबगर नगरपालिका उ सम्बन्धी कानून बनाइल बटैलै ।
कार्यक्रमके संचालन अधिवक्ता रेणु प्रधान श्रेष्ठ ओ स्वागत मन्तव्य अधिवक्ता रोजिना श्रेष्ठ करले रहिट । कार्यक्रममे सुदूरपश्चिम प्रदेशके चारु समिति सभापति, सदस्य, सरोकारवाला निकायके सहभागिता रहे ।
