अधिकारसंगे कर्तव्यके बाट सिखैना आग्रह
पहुरा समाचारदाता
धनगढी, १८ जेठ । जिल्ला समन्वय समिति कैलालीके कार्यवाहक सभापति खगराज भुषाल संस्थाहुकनहे अधिकारसंगे कर्तव्यके बाट सिखैना आग्रह करले बटै ।
गैरसरकारी संस्था महासंघ सुदूरपश्चिम प्रदेश आयोजनाके शुकके रोज धनगढीमे नागरिक संघ संस्था सम्बन्धी नीति संवाद तथा परामर्श कार्यक्रममे उहाँ उ आग्रह करल रहिट । उहाँ कहलै, ‘संघ संस्थासे अधिकार बाट सिखैठै ओकर संगसंगे कर्तव्यके बाट सिखैना जरुरी बा ।’ जिल्लामे संघसंस्थासे कार्यक्रम कैना मने ओकर जानकारी नइहुइल ओरसे आबसे कार्यक्रम करेबेर कार्यक्रम ओ बजेटबारे जिल्ला समन्वय समितिमे एक प्रति जानकारीके लाग छोरडेना आग्रह करलै ।
नीति तथा योजना आयोगके सुदूरपश्चिम प्रदेश उपाध्यक्ष गणेश विक गैरसरकारी संस्था महासंघ नीति बनाके आघे बह्रे पर्ना बटैलै । उहाँ कहलै, ‘यहाँ ल फर्म खुलल, सहकारी खुलल, धार्मिक संस्था खुलल सब यम्हे समेटे पर्ना गलट भाष्य हुइटा टबमारे नीति बनाके आघे बह्रना जरुरी रहल बा ।’
गैरसरकारी संस्था महासंघके केन्द्रीय अध्यक्ष रामप्रसाद सुवेदी भौतिक विकास संगे मानविय विकास जरुरी रहल बटैलै । उहाँ कहलै, ‘हमार समाजमे भौतिक विकास हुइल कलेसे क्या विकास हुइल बा कठी, मने नागरिक गाँस, बाँस ओ कपास पैले बा कि नै ओहोर ओर सरकारहे जवाफदेही हुई परल । गैरसरकारी संघसंस्था सरकारसे बनाइल नीति नियम ओ परिधिभिटर रहिके चल्ना हो, मने राज्यपक्षसे जनताके आवश्यकता का हो उ बुझना जरुरी रहल उहाँ बटैलै ।
धनगढी उपमहानगरपालिका वडा नम्बर ३ के वडा अध्यक्ष राजबहादुर ऐर संघ संस्थाहे अपन उद्देश्य अनुसार काम कैना आग्रह करटी पारदर्शिता रख्ना आग्रह करलै । जिल्ला प्रशासन कार्यालय कैलालीके प्रशासकीय अधिकृत शिवराज जोशी जिल्ला प्रशासनमे दर्ता हुइना ढेर संस्था नविकरण नइहुइल बटैलै । जिल्ला प्रशासन कार्यालयमे दर्ताके लाग आइल संस्थाहे अपनेहुक्रे कबु रुखो व्यवहार नइकरल बटैलै ।
गैरसरकारी संस्था महासंघके निवर्तमान केन्द्रीय अध्यक्ष जीतराम राना संस्था करेबेर नविकरण कैना झंझट हुइल कारण संस्था चलैना कर्रा रहल बटैलै । नयाँ संस्थासे बजेट ओ कार्यक्रम पैना गाह्रो रहल बटैलै ।
गैरसरकारी संस्था महासंघके केन्द्रीय महासचिव अर्जुन भट्टराई हम्रे जनताके लाग का करटी उ हेर्ना जरुरी रहल बटैलै । अब्बेसम टमान नीति तथा ऐन कानून बनल मने कार्यान्वयन फितलो रहल बटैलै ।
गैरसरकारी संस्था महासंघके केन्द्रीय कोषाध्यक्ष नानीमाया थापा नीतिगत तथा संवाद करेबेर महिलाके सवाल कहाँ प्रश्न उठैना बेला आइल बटैली । महिलाहुकनके नाउँमे ९० प्रतिशत बजेट आइल मने लैङिक समानता नइहुइल उहाँ बटैली । संस्था दर्ता करेबेर, नविकरण करेबेर ओ कार्यक्रमके लाग सहकार्य करेबेर कतिपय ठाउँमे यौन दुव्र्यवहार हुइल उहाँ बटैली ।
नागरिक संघ संस्था सम्बन्धी नीति संवाद तथा परामर्श कार्यक्रममे उठाल बाटबारे गैरसरकारी संस्था महासंघ सुदूरपश्चिम प्रदेशके महासचिव भवराज रेग्मी प्रस्ट पारल रहिट ।
कार्यक्रम गैरसरकारी संस्था महासंघ सुदूरपश्चिम प्रदेश अध्यक्ष देवी खनालके अध्यक्षतामे हुइल रहे । उहाँ गैसस गैरनाफा मुलक संस्था रहलेसेफे राज्यसे कर तिर्ना बाध्य बनाइल बटैलै । कार्यक्रम गैरसरकारी संस्था महासंघमे आवद्ध सुदूरपश्चिम प्रदेशके संस्थाके प्रतिनिधिहुकनके सहभागिता रहल रहे ।
