ब्रिज परियोजनासे संचालन कैना गतिविधिबारे छलफल
पहुरा समाचारदाता
धनगढी, १८ असार । मुक्त हलिया समाज महासंघ केन्द्रीय कार्यालयसे संचालित ब्रिज परियोजनासे संचालन कैजिना गतिविधिबारे छलफल मंगरके रोज छलफल कैगिल बा ।
अन्तर्राष्ट्रिय श्रम संगठनके सहयोगमे मुक्त हलिया समाज महासंघसे संचालित ब्रिज परियोजना टु अन्तगत मुक्तहलियाहुकनके श्रममे जोरल सवाल सम्बोधन कराइक लाग मिडिया परिचालन कैनाबारे छलफल कैगिल हो ।
ब्रिज परियोजना सुदूरपश्चिम प्रदेश ओ कर्णाली प्रदेशमे ६ महिनाके लाग लागु हुइना परियोजना संयोजक चक्रबहादुर आग्री बटैलै । उहाँ कहलै, ‘सरकारसे हलिया मुक्ती घोषणा करल मने न्यायिक पुनस्र्थापना नइकरके टमान बाहना लगाके पन्छना कार्य करटी रहल बा । पुनस्र्थापनाके नाउँमे आवस घर बनाके कुछ फे व्यवस्था नइकरल हो ।’
सुदूरपश्चिम प्रदेश सरकारसे हलियाहुकनके लाग बजेट विनियोजन करल मने कर्णाली प्रदेश कुछफे बजेट विनियोजन नइकरल मुक्त हलिया महासंघके अधिकारकर्मी मंगल सार्की बटैलै । उहाँ कहलै, ‘सरकारसे कञ्चनपुर ओ डोटीमे मुक्तहलियाहुकनके लाग घर बनाइल मने कुछफे व्यवस्था नइकरल कारण उ घरमे मुक्त हलियाहुक्रे बैठे नइसेक्लेसे ।’ परियोजना अन्र्तगत मुक्तहलियाहुकनके बास्तविक समस्याबारे अध्ययन ओ अनुगमन कैना बटैलै ।
नेपाल सरकार ओ हलिया महासंघ विच हुइल पाँच बुँदे सहमति कार्यान्वयन नइहुइल हो । मुक्त हलिया सुदूरपश्चिम प्रदेशके नौ जिल्ला ओ कर्णाली प्रदेशके तीन जिल्ला सुर्खेत, जारकोट ओ हुम्ला करके १६ हजार ९ सय ५३ जाने मुक्त हलिया रहल बटै । नेपाल सरकारसे जम्मा लेहल तथ्यांक संख्या १९ हजार ५९, दोहरो टेहरो नाउँ हटाके पुनप्रमाणीकरण हुइल संख्या १६ हजार ९ सय ५३, परिचयपत्र प्राप्त करल संख्या १४ हजार २४२ ओ हालसम पूनस्र्थापना हुइल संख्या १३ हजार ५४६ रहल बा । मने पूनस्र्थापना बाँकी संख्या हेरेबेर कैलालीमे ४६, बैतडी ३२, डडेल्धुरा ४८९, सुर्खेत ०, बझाङ २१७, डोटी ६७, बाजुरा ९ ओ कञ्चनपुरमे १०६ जाने रहल बटै ।
नेपाल सरकारसे प्रतिबद्धता करल पुनस्र्थापनाके समयावधी लम्बइटी जाईबेर पुनस्र्थापनाके चर्चामे रहल मुक्त हलियाहुकनके बसोबासके उचित व्यवस्थापन हुई नइसेकल हो । तत्कालिन समयमे लगतमे नाम छुटल मुक्त हलियाके पहिचान हुई नइसेकल हो । पुनस्र्थापनाके साथे शिक्षा, स्वास्थ्य, रोजगारी, जिविकोपार्जन, सामाजिक सशक्तिकरण ओ समावेशीकरण सम्बन्धी मुद्दाहे सरकारसे विशेष प्राथमिकतामे धारके प्रभावकारी रुपमे कार्यान्वयन करे नइसेक्के बाधा श्रमसे मुक्त हुइल १६ वर्ष विटलेसेफे मुक्तहलिया सम्मानित जीवन व्यतित करे नइसेकल हुइट । कैयो मुक्तहलिया परिवार पुनः हलिया बैठना बाध्य हुइल बटै । कैयो हलिया÷मुक्तकमैया परिवार परम्परागत हलियासे आधुनिक शहरीया मजदुरके रूपमे परिणत हुइल बटै ।
