प्रदेश सरकारसे चालु आर्थिक बर्षके बजेट बनैना चार आधार तय
पहुरा समाचारदाता
धनगढी, ३ भदौ । सुदूरपश्चिम प्रदेश सरकारसे चालु आर्थिक बर्षके बजेट बनैना चार आधार तय करले बा । मुख्यमन्त्री कमलबहादुर शाह आज (सोम्मार) सरकारके मन्त्रीहुँक्रनहे धारके पत्रकार सम्मेलन कैटी बजेट निर्माणके चार ठो आधार तय करल घोषणा करले बटै ।
प्रदेश सरकारसे कार्यान्वयन कैना योजना तथा कार्यक्रमके लाग रु.२५ लाखसे उप्पर सिलिङ कायम कैके बजेट विनियोजन कैना, प्रदेश सरकारसे आवश्यकता व औचित्यक आधारमे २५ लाखसे कम बजेट विनियोजन करे पर्ना हुइलेसे कार्ययोजना सहित सशर्त अनुदानके रुपमे स्थानीय तहहे वित्तीय हस्तान्तरण कैना कहल बा ।
वसहेक प्रदेश सरकारसे व्यक्ति, समुह, संस्था, निजी फर्म, कम्पनी व सहकारी आदीहन बजेट विनियोजन तोक्के निकैना, सुदुरपश्चिम प्रदेश सरकारसे कार्यान्वयन हुइना कौनोफे योजना उपभोक्ता समिती मार्फत कार्यान्वयन नैकैना विज्ञप्तीमे कहल बा ।
वर्तमान सरकार निर्माण हुइलसंगे प्रदेशमे बजेट शुन्यताके अवस्थाहे चिरटी राजश्व संकलनके प्रक्रिया आघे बह्रल बा । प्रदेश सरकार बजेट निर्माणके बाँकी प्रक्रिया पुरा कैना प्रदेश सभामे छलफलके लाग बजेट तथा कार्यक्रम पेश करटी सक्कु माननीय प्रदेश सभा सदस्यके सहमतीमे प्रक्रियागत ढंगसे आघे बह्रना प्रतिवद्ध करल मुख्यी शाह बटैलै ।
बजेट निर्माणके सन्दर्भमे प्रदेश सरकार सक्कु क्षेत्रके सम्बद्ध व्यक्ति, दल ओ नागरिक समाजसंग संवाद ओ छलफल करटी रहल मुख्यमन्त्री शाह बटैलै ।
टमान क्षेत्रसे प्राप्त सुझाव साथ विषेश करके गठवन्धन दलके सहमतिमे वार्षिक विकास कार्यक्रम (बजेट) सुदुरपश्चिम प्रदेशके आवश्यकता ओ औचित्यके आधारमे निर्माण करके आघे बह्रना उद्देश्यक साथ आधार तय करल कहलै ।
उ आधारमे सरकारसे सक्कु मन्त्रालय ओ मातहतके निकायहे प्रतिवद्ध रहिके लागु कैना निर्देशन करल बा । सुदुरपश्चिम प्रदेश सरकारसे भ्रष्टाचारहे शुन्य सहनशिलतके नीति अवलम्वन करके सुशासन, जनमुखी ओ जनउत्तरदायी तथा आम सुदुरपश्चिमवासीो विकास ओ समृद्धिप्रति प्रतिवद्ध बा कना बाट सरकार निर्माण हुइलथेनसे हम्रे करल सत प्रयाससे अवगत करल उहाँ कहलै ।
पदस्थापन करल पहिल दिन तीन ठो निर्णय, वित्तीय अनुशासन ओ सुशासन प्रवर्धन तथा भ्रष्टाचार न्यूनिकरणके लाग कार्यदल गठन करके १५ दिन भिटर प्रतिवेदन पेश कैना, सुदूरपश्चिम प्रदेशके जनताहे उपचारके लाग चहना रगत सरकारी अस्पतालमे निःशुल्क व्यवस्था कैना ओ प्राकृतिक विपदके कारण हुइना घटना–दुर्घटनासे पीडित व्यक्तिहे राहत पुगे कहिके प्रदेशवासी सक्कुहुनके जोखिम दुर्घटना विमा कैना निर्णय करल उहाँ कहलै ।
सुदुरपश्चिम प्रदेशके समग्र विकास, समृद्धी, सुशासन प्रर्वधन, भ्रष्टाचार नियन्त्रणके साथे योजना छनौट ओ बजेट विनियोजनके सन्दर्भमे थप आवश्यक सल्लाह सुझाव डेना पत्रकार सम्मेलन मार्फत सक्कुहुनहे हार्दिक अपिल करले बटै ।
