द्वन्दपीडित एकल महिला कहठै, ‘हमार सन्तान वेरोजगार हुइलै, रोजगारी डेउ
पहुरा समाचारदाता
धनगढी, ६ भदौ । सशस्त्र द्वन्दकालमे आफन्त गुमाइल द्वन्दपीडित एकल महिलाह्ुक्रे अपन छाई÷छावा मजा शिक्षादिक्षा नैपाके वेरोजगार हुइल ओरसे राज्यसे रोजगारीके व्यवस्था कैडेना माग करले बटै ।
मानव अधिकारका लागि महिला एकल महिला समु्ह सुदूरपश्चिम प्रदेश आयोजना तथा कुर्वे विस्ट्रोके सहयोगमे अन्तर्राष्ट्रिय शान्ति दिवसके अवसरमे शनिच्चरके रोज कैलारी गाउँपालिका वडा नम्बर ६ बनकट्टा स्थित शान्ति संग्राहलयमे आयोजित अन्तरक्रिया कार्यक्रममे सहभागी हुइल द्वन्दपीडित तथा एकल महिलाहुक्रे राज्यसे अपन सन्तानहुकनके रोजगारीके व्यवस्था कैडेना माग करल रहिट ।
कैलारी गाउँपालिका वडा नम्बर ३ के द्वन्दपीडित एकल महिला लक्ष्मी चौधरी कहली, ‘हमार लर्का दुई÷तीन महिनाके रहेबेर हमार सिन्दुर पोछगैल । अपन घरमुली कमुइया मनै गुमाइल पीडा जिन्गी भर विस्राई नैसेक्ना घाउ बनल बा । सरकारके डेहल पैसासे लर्का मजा शिक्षा डेहे सेक्ना अवस्था नैरहल । जेकर कारण द्वन्दपीडित एकल महिला आब झन पीडामे बटै ।’
उहाँ कहली, ‘लर्कन पैसा शिक्ष डेहे सेक्लेसे ओइने मजा रोजगारी पैलेसे । उहीसे दुख विस्रैना माध्यम बनट । अपन मनै टे गुमागैल । सन्तान बेरोजगार हुइलपाछे ठप पीडा ठपल बा ।’
सरकार सशस्त्र द्वन्दपीडितके मुद्दा विस्रैटी गैल ओरसे काल्हके दिनमे पहिचान समेट नैरना उहाँ बटैली ।
सशस्त्र द्वन्दपीडित लक्ष्मी चौधरी केल नाही उहे पीडा कैलारी गाउँपालिका वडा नम्बर २ पशुपति चौधरी ओ वडा नम्बर ६ के रमेशी चौधरीफे सुनैली ।
उहाँहुक्रे कहलै, ‘सशस्त्र द्वन्दपीडितहुकनहे राज्यसे डेहल पैसाके सदुपयोग नैहुइल । मंहगाई बह्रटी गैल, उ पैसासे सन्तानहुकनहे चाहल शिक्षा डेहे नैसेक्गैल । विभेदकारी शिक्षामे हमार सन्तान प्रतिस्पर्धा करे नैसेक्लै । जिहीसे मजा ठाउँमे रोजगारी कैना अवस्थाफे नैहो ।’
सशस्त्र द्वन्दकालमे कैलारी गाउँपालिका भर ७९ जाने अकालमे ज्यान गुमैले बटै । केक्रो सिन्दुर पोछल बा । कलेसे कोई डाई बाबा अन्तिम साहाराके रुपमे रहल सन्तान गुमैनाके पीडा बा ।
कैलारी गाउँपालिका वडा नम्बर ६ के वडा अध्यक्ष प्रेमबहादुर चौधरी सशस्त्र द्वन्दकालमे ज्यान गुमाइल शहिदहुकनके सम्झना ओ पीडित परिवारके सुखदुखके पीडा विसाइकल लाग वडा कार्यालयके सहयोगमे जग्गाके व्यवस्था करके शान्ति संग्राहलय स्थापना करल बटैलै । उहाँ कहलै, ‘सशस्त्र द्वन्दपीडत एकल महिलाहुक्रे अब्बे उ शान्ति संग्राहलयमे बैठक करके मासिक बचत उठैना, सुखदुखके बाट सातासाट करके टमान एजेन्डामे छलफल करटी रहल बटै ।’
यी संग्राहलयमे ज्यान गुमाइल शहिदहुकनके फोटोसहिट विवरण धारल, फलाक्स बोर्डके व्यवस्था हुइल ओ अइना दिनमे उ संग्राहलयमे व्यवस्थित बनैना प्रतिवद्धता जाहेर करलै । अन्तर्राष्ट्रिय शान्ति दिवसके शुभकामना डेटी मुलुकमे कहुफे नैरहल कहटी मनमे शान्ति रख्ना आग्रह करलै ।
कार्यक्रममे मानव अधिकारका लागि महिला एकल महिला समुहके केन्द्रीय सदस्य भगवती हमाल सशस्त्र द्वन्दपीडित एकल महिलाहुकन राज्यसे परिपुरणके व्यवस्था कैना आग्रह करली । उहाँ कहलै, ‘सशस्त्र द्वन्दकालमे हजारौ डिडी बाबु अपन प्रिय मनै गुगैले बटै । मनैके बडला मनै खोज्लेसे मुलुकमे कबु शान्ति स्थापना नैहुइट । सशस्त्र द्वन्दपीडित एकल महिलाहुक्रनके भारी त्यागके कारण अब्बे मुलुकमे शान्ति आइल हो । मने राज्यपक्षसे उहाँहुकनके पीडामे मल्हम पट्टी कैना जरुरी बा । उहाँहुकनके आवश्यकता अनुसार सन्तानके शिक्षा, स्वास्थ्य रोजगारीके व्यवस्था कैना जरुरी बा ।’
मानव अधिकारका लागि महिला एकल महिला समु्ह सुदूरपश्चिम प्रदेश अध्यक्ष तथा कार्यक्रमके घरगोस्या सुमन शर्मा हजारौ डिडिबाबु, डाईबाबा अपन सहारा गुमाइल मने राज्यसे पक्षसे शहिदहुकनके इतिहास मेटाई खोजल आरोप लगैली । उहाँ कहली, ‘आज अन्तर्राष्ट्रिय शान्ति दिवस रहे मने राज्य पक्षके यहोर कुछ चासो नैडेहल । शसस्त्र द्वन्दकालमे ढेर बच्चा अपन बाबा गुमैलै । जानेजुकुर हुईबेर मोर बाबा कहाँ कहेबेर उ डाईके मन कटरा रुइल हुई ।, राज्य पक्षसे सशस्त्र द्वन्दपीडित अपहेल्ना करलफे उहाँ बटैली ।
कार्यक्रममे स्वागत मन्तव्य एकल महिला समुह कैलारी–६ के अध्यक्ष रमेशी चौधरी करल रहिट । कलेसे कार्यक्रमके संचालन अन्तर्राष्ट्रिय शान्ति दिवसके बारेमे जानकारी तथा उद्देश्यबारे कार्यक्रम संयोजक दलबहादुर ओली डेहल रहिट । कार्यक्रममे सशस्त्र द्वन्दपीडित तथा एकल महिलाहुकनके सहभागिता रहे ।
उहे अवसरमे सशस्त्र द्वन्दपीडित एकल महिलाहुकनके सम्मान कैगिल बा । सम्मानित हुइलमे वडा नम्बर ९ के चेरिया चौधरी, वडा नम्बर ३ के लता चौधरी, उदशनी चौधरी, वडा नम्बर ५ के जानकी चौधरी, भागवती चौधरी, वडा नम्बर ६ के सुनिता चौधरी ओ सिता चौधरी रहल बटै ।
