नागरिकके न्यायमे पहुँच सहज बनैना जोड
पहुरा समाचारदाता
धनगढी, ७ जेठ । नागरिकके न्यायमे सहज पहँुचके लाग न्यायिक तथा अर्धन्यायिक निकायके जिम्मेवारी ओ भूमिका विषयक अन्तरक्रिया कार्यक्रम धनगढीमे सम्पन्न हुुइल बा ।
इन्सेक सुदूरपश्चिम प्रदेश कार्यालयके आयोजनामे बुधके रोज नागरिकके न्यायमे सहज पहँुचके लाग न्यायिक तथा अर्धन्यायिक निकायके जिम्मेवारी ओ भूमिका विषयक अन्तरक्रिया कार्यक्रम हुइल हो ।
जिल्ला अदालत कैलालीके श्रेष्टेदार चेतराज पन्त अन्यायमे परल पीडितहुकनहे समयमे सहज रुपमे न्याय डेहे पर्ना जरुरी रहल बटैलै । उहाँ कहलै, पीडितहे ढिला न्याय डेना कहल न्याय नैडेहल बराबर हो । न्यायिक तथा अर्धन्यायिक निकाय जे जहाँ ठाउँमे बा । पीडितके उजुरीके आधारमे आ अपन जिम्मेवारीपूर्वक न्याय डेना जरुरी बा ।
सहभागीके उठाइल जिज्ञासाबारे सम्बोधन करटी उहाँ न्यायिक तथा अर्धन्यायिकसम आइल मुद्दा निश्पक्ष प्रक्रियागत रुपमे न्यायके ढोकासम पुगैना उहाँ आग्रह करलै ।
पुनर्वास नगरपालिकाके न्यायिक समिति संयोजक भुलिया राना नागरिकके न्यायमे सहज पहँुचके लाग टोल फ्रि नम्बर, भिजिटिङ कार्डके व्यवस्था करल बटैली । पुनर्वासमे ७६ जिल्लाके व्यक्तिके बसोबास रहल कहटी नगरपालिकाके न्यायिक समितिमे चालु आर्थिक बर्षमे १५० ठो उजुरी दर्ता हुइल उहाँ बटैली । उहाँ कहली, न्यायिक समितिसे प्रत्येक दिन उजुरी हेर्ना समय तालिका बनाइल बा, दर्ता हुइल उजुरी मध्ये हालसम १२५ ठो उजुरीके फैसला, मिलापत्र हुइल बा । २५ बाँकी रहल बा ।’
नागरिकके न्यायमे सहज पहँुचके लाग प्रत्येक उजुरी हेरजाइठ, उहाँ कहली, ‘कोई कोई पीडित ओ पीडक विच कोई कोई नैआइलपाछे पाछे सारजाइठ । कबु कबु बोलाइल बेला पीडक पक्षहे उपस्थिति करैना गाह्रो रहल बा ।
कैलारी गाउँपालिकाके उपाध्यक्ष तथा न्यायिक समिति संयोजक भगवतीकुमारी चौधरी न्यायिक समितिमे साँझ सिमानाके उजुरी ढेर अइना करल बटैली । उहाँ कहली, नागरिकके न्यायमे सहज पहँुचके लाग न्यायिक समितिके साथे वडा वडामे रहल मेलमिलाप केन्द्र मार्फत उजुरीके सुनुवाई ओ मेलमिलाप कराजैटी रहल बा ।
गौरीगंगा नगरपालिकाके न्यायिक समिति संयोजक भोजबहादुर बम अपनेफे न्यायिक समितिसंगे वडा वडामे रहल मेलमिलाप केन्द्र विवादके घटना मिलैना करल बटैलै । उहाँ कहलै, और स्थानीय तहके न्यायिक समितिके संयोजकमे महिला बटै, मने अपने पुरुष हुकेफे महिला पुरुषहे भेदभाव नैकरके समान रुपमे हेरल बा । न्यायमे परल एक ठो महिला होए वा पुरुष सक्कु जाने न्याय पाई परल कहटी सहजे न्याय प्रदान करल बा ।
लालझाँडी नगरपालिकाके न्यायिक समिति संयोजक सपना चौधरी राना लालझाँडीमे भौतिक संरचनाके अभाव रहल मने न्यायिक समितिमे आइल विवाद आपन कोठामे हुइलेसेफे मिलैटी रहल बटैली । उहाँ लैङिक हिंसा निवारण कोषसे गैल बर्ष हिंसामे परल महिलाहुकनके सहयोग करलफे बटैली ।
वार कैलालीके अध्यक्ष इन्द्रप्रसाद लेखक ढेर जैसिन न्यायिक समितिमे अभिन मुद्दा सुनुवाई कैना अलग कक्ष नैरहल ओरसे काम कैना गाह्रो रहल बटैलै । हरेक न्यायिक समितिके कानून अधिकृतके व्यवस्था करेपर्ना हो,’ उहाँ कहलै, न्यायिक समितिमे कानून व्यवसायीके उपस्थिति नैहो । उजुरी प्रशासकहे कानूनी ज्ञान नैहोके समस्या रहल बा । सुदूरपश्चिम प्रदेशके पायक पर्ना ठाउँमे उच्च अदालत नैहोके ढेर जैसिन नागरिक सहज रुपमे न्याय नैपाइल अवस्था बा ।
कैलाली कञ्चनपुरमे मुद्दाके चाप ढेर बा मने दिपायलमे न्यायके जाईबेर बहुट खर्च हुइना ओरसे दुई जिल्लाके पायक पर्ना ठाउँमे उच्च अदालत स्थापना कैना उहाँ आग्रह करलै । सुदूरपश्चिम प्रदेश सरकारके पूर्व आन्तरिक मामिला तथा कानूनमन्त्री पूर्णा जोशी उच्च अदालतसे भचुअल मार्फत मुद्दाके सुनुवाई कैना सहजुल होए कहटी कम्प्यूटरके व्यवस्था करल मने अब्बे एक ठो विगरल कारण अब्बे एकठो केल्ह चालु अवस्था करल उहाँ जनैलै । सिविन कैलालीके हरिलाल चौधरी बकपत्र हुइना आघेक समय प्रर्याप्त नैहुइल, बाल सुधार गृहके अवस्थाके नाजुक रहल बठैलै ।
ओरेक नेपाल कैलालीके जिल्ला संयोजक गीता चौधरी न्यायिक निकायमे दोभाषेके व्यवस्था नैहोके पीडित न्याय नैपाइल अवस्था आइल बटैली ।
फेडोके कार्यक्रम संयोजक विनोद घिमिरे धनगढी–१२ के एक जानेक नागरिक नैहोके बालबालिकाके जन्मदर्तासे बञ्चित हुइल बटैलै ।
राष्ट्रिय अपाङ महासंघ सुदूरपश्चिम प्रदेश सचिव नरदीप धामी अपाङता रहल व्यक्ति, जेष्ठ नागरिकहुकनके सामाजिक सुरक्षा भत्ता बुझना गाह्रो हुइल बटैलै । उहाँ कहलै, ‘बैंकफे पायक पर्ना ठाउँमे नैहो । भौतिक संरचनाफे अपाङतामैत्री नैहो । जिहीसे गाह्रो हुइल बा ।
मानव अधिकारका लागि महिला एकल महिला समुहके प्रदेश कार्यक्रम संयोजक वेद अवस्थी न्यायिक तथा अर्धन्यायिक न्यायिक निकाय उत्तरदायी ओ जवाफदेही रुपमे काम करलेसे पीडित न्याय पैना बटैली ।
एकता समाजके अध्यक्ष राज चौधरी यौनिक तथा अल्पसंख्यक समुदायके लाग २०८० मे विवाह दर्ता कैना कानूनी मान्यता डेना कहल मने कार्यान्वयन नैहुइल बटैलै ।
कार्यक्रममे राष्ट्रिय मानव अधिकार आयोगके झंकर रावल, जिल्ला प्रहरी कार्यालय कैलालीके महिला तथा बालबालिका सेल, सरकारी वकिल कार्यालयके प्रतिनिधि आपन बाट राखल रहिट ।
कार्यक्रममे अधिवक्ता पुष्पविक्रम शाही संविधानमे रहल टमान हक, मौलिक हक, मानव अधिकारके विश्वव्यापी घोषणपत्र, प्रदेश कानूनमे रहल व्यवस्था, नागरिकके कर्तव्यबारे प्रस्तुतीकरण करल रहिट । कार्यक्रममे सहजीकरण इन्सेक प्रदेश संयोजक खडकराज जोशी ओ संचालन इन्सेक प्रलेख अधिकृत कृष्ण विक करल रहिट ।
