धनगढीसे ‘स्वर्णप्राशन’के शुभारम्भ
पहुरा समाचारदाता
धनगढी, ५ भदौ । स्वास्थ्य तथा जनसंख्यामन्त्री प्रदीप पौडेल धनगढीसे ‘राष्ट्रिय स्वर्ण बिन्दु प्राशन’ कार्यक्रमके औपचारिक शुभारम्भ करले बटै ।
बालबालिकाके रोग प्रतिरोधात्मक क्षमता बह्रैनाके साथे बौद्धिक ओ शारीरिक विकासहे प्रवद्र्धन कैना उद्देश्यसे राष्ट्रिय अभियान सुरु करल मन्त्री पौडेल बटैलै । प्रादेशिक आयुर्वेद चिकित्सालय, धनगढीमे आयोजित विशेष समारोहमे मन्त्री पौडेल बालबालिकाहे स्वर्ण बिन्दु प्राशन खवाके कार्यक्रमके शुभारम्भ करल हुइट ।
यी कार्यक्रमहे नेपालके प्राचीन आयुर्वेदिक चिकित्सा पद्धतिके पुनर्जागरण कैटी इहीहे वैज्ञानिक रुपमे विकास कैके आधुनिक जनस्वास्थ्य प्रणालीसँग जोरे सेकजैना मन्त्री पौडेल बटैलै ।
‘स्वर्ण बिन्दु प्राशन’ हमार हजारौं बरसके पुरान आयुर्वेद विज्ञानमे रहल ज्ञान हो । इहीहे आधुनिक विज्ञान ओ जनस्वास्थ्यसँग जोरे सेक्लेसे स्वस्थ ओ मेधावी पुस्ता निर्माण कैना हमार अभियानमे सहयोग पुगैना बा ।
औरेओर, रोग लागलपाछे उपचार कैनासे रोग लागे नैडेना स्वास्थ्य प्रणाली विकास कैना सरकारके आजके प्राथमिकता हो । ओहेमारे हमार बालबालिकाहे शारीरिक ओ बौद्धिक रूपमे अब्बल बनैना स्वास्थ्य मन्त्रालयसे निरन्तर कार्य कैना बा । ‘आगामी पुस्ता निरोगी पुस्ता’ तयार पर्ना हमार लक्ष्य अनुरुप प्रवद्र्धनात्मक ओ निरोधात्मक स्वास्थ्य प्रणालीके विकासके लाग आयुर्वेद क्षेत्रसँग जोरल यी मेरके कार्यक्रमहे देशभरके प्रभावकारी रूपमे सञ्चालन करजैना बा’ उहाँके कहाइ रहे ।
