स्रोतमे वर्गीकरण, कम्पोस्ट मलसे रिसाइकलसम
पहुरा समाचारदाता
धनगढी, १० भदौ । कैलालीके गोदावरी नगरपालिकामे सञ्चालनमे आइल एकीकृत फोहोरमैला केन्द्रहे दीर्घकालीन रुपमे व्यवस्थापन कैना नगर प्रमुख, शहरी विकास कार्यालयके प्रतिनिधि, निर्माण कम्पनी ओ फोहोर व्यवस्थापनमे खटन टोलीबीच विशेष छलफल हुइल बा ।
कार्यक्रममे गोदावरी नगरपालिकाके नगर प्रमुख बिरेन्द्र भट्ट, एशियाली विकास बैंक (एडिबी) के बिशेषज्ञ विज्ञ डा. डण्डी राज पाठक, शहरी विकास कार्यालय शिखर तामाङ्, आयोजना व्यावस्थापक/निर्माण कम्पनीके म्यानेजर ई. आशोक पाण्डे, “हाम्रो ग्रीन सुदूरपश्चिम परामर्श स्वच्छ वातावरण प्रणाली” के प्रतिनिधि गोविन्द रावल, केशब राज पन्त लगायतके उपस्थिति रहे ।
छलफलमे नगरपालिकामे फोहोर व्यवस्थापनहे आउर प्रभावकारी बनैना स्रोतमे फोहोरके वर्गीकरण कैना रणनीति मुख्य एजेण्डा बनल रहे । सहभागीहुकनके अनुसार घर–घरमे सरना, नैसरना ओ हानिकारक फोहोरहे अलग अलग सङ्कलन करे सेक्लेसे फोहोरमैला केन्द्रके आयु दीर्घकालीन हुइना ओ वातावरणीय प्रदूषण घटाई सेक्ना निष्कर्ष निकारगिल बा ।
यी प्रक्रियाअन्तर्गत सरना फोहोरहे कम्पोस्टिङ करके जैविक मल उत्पादन कैना, नैसरना फोहोरहे पुनःप्रयोग (रिसाइकल) करके नयाँ परियोजनामे प्रयोग कैना ओ हानिकारक फोहोरहे सुरक्षित व्यवस्थापन कैना विषयमे सहमति हुइल बा । यैसिक व्यवस्थापन करेबेर डम्पिङ साइटमे पुग्न फोहोरके मात्रा घट्न ओ दीर्घकालीन रुपमे खर्चफे बचत हुइना नगरपालिकासे जनैले बा ।
विशेष करके फोहोरमैला व्यवस्थापन केन्द्रके सञ्चालनके अनुगमन, निरीक्षण तथा स्रोतमे वर्गीकरणहे मजबुत बनैना, गोदावरी नगरपालिकाके ओरसे फोहोर जरैना वा जथाभावी फेकुइयाहे कारबाहीके दायरामे ल्यन्ना ओ स्वच्छ गोदावरी बनैना अभियानमे जनचेतना फैलैना समेत निगरानी कैना जनाइल बा ।
नगर प्रमुख भट्ट गोदावरीहे सफा, स्वस्थ ओ हरित नगरपालिका बनाइक लाग सक्कुहुनके सहकार्य आवश्यक रहल बटैलै । उहाँ फोहोर व्यवस्थापनहे केवल नगरपालिकाके जिम्मेवारी नैहुके नागरिकके फे दायित्व रहल उल्लेख करटी स्रोतमे वर्गीकरण कैना अभियानहे सफल बनैना सक्रिय सहभागिताके आग्रह करलै ।
सहभागी विज्ञहुक्रेफे आधुनिक प्रविधि ओ स्थानीय तहबीचके समन्वयमार्फत फोहोर व्यवस्थापनहे दिगो बनाई सेक्ना सुझाव डेलै । छलफलमे सहभागी टोलीसे गोदावरी नगरपालिकाहे उदाहरणीय नगर बनैना एकीकृत फोहोर व्यवस्थापनहे प्राथमिकता डेहे पर्नामे जोर डेले बटै ।
