‘शान्ति सुरक्षाके लाग कटिवद्ध होके लागम’
पहुरा समाचारदाता
धनगढी, १६ भदौ । जिल्ला प्रहरी कार्यालय कैलालीके प्रमुख प्रहरी उपरीक्षक नरेन्द्र चन्द शान्ति सुरक्षा कायमके लाग कटिवद्ध होके लग्ना बटैले बटै ।
सोम्मारके रोज जिल्ला प्रहरी कार्यालय कैलालीमे पत्रकारसँग करल परिचयात्मक कार्यक्रममे उहाँ ओइसीन बटाइल हुइट । उहाँ कहलै, ‘काल्हके दिनमे का हुइल ? का नैहुइल ? महिन पटा नैहुइल । मै आसेकलपाछे बिगतके कामहे ब्रेक डाउन कैके काम करम । शान्ति सुरक्षा कायम कैना कटिवद्ध होके लागम ।’
उहाँ लागुऔषध न्यूनीकरण करक लाग फेन कटिबद्ध होके लग्ना बटैलै । उहाँ कहलै, ‘यहाँ तथ्यांक हेरेबर लागुऔषध दुव्र्यसनी ढेर डेखजाइठ् । यकर नियन्त्रणके लाग मै प्रयास करम ।’
लागुऔषध न्युनीकरण कैना अभिभावकहे फेन सुसुचित करैना आवश्यक रहल उहाँ बटैलै । उहाँ लागुऔषध नियन्त्रणके लाग टमान विद्यालयमे सचेतनामूलक कार्यक्रमहे आउर बह्राके लैजैना बटैलै । उहाँ कहलै, ‘उहीसे आघे फेन सचेतनामूलक कार्यक्रम टे हुइटी रहल बावै । लागु पदार्थ दुव्र्यशनी न्युनिकरण कैना टमान विद्यालयमे अभिभावकसहित जनचेतनाके कार्यक्रम करब ।’ खुला सीमाना रहल ओ जनशक्ति अभावसे चनौति फेन रहल उहाँ बटैलै ।
