खुल्ला सीमानाकाके कारण मानव बेचविखन नियन्त्रणमे चुनौती

पहुरा समाचारदाता
धनगढी, २० कात्तिक । खुल्ला सीमानाकाके कारण मानव बेचविखन नियन्त्रण ओ उहीसे पीडित तथा प्रभावितके उद्धारमे चुनौती रहल एक कार्यक्रमके सहभागीहुक्रे बटैले बटै ।

शान्ति पुनस्र्थापना गृह धनगढी शाखाके आयोजनामे बुधके रोज हुइल आव २०८१/०८२ मे सञ्चालित कार्यक्रमके बार्षिक सामाजिक लेखा परिक्षणके सहमागिहुक्रे ओइसीन बटाइल हुइट ।

कार्यक्रमके बर्का पहुना तथा जिल्ला समन्वय समिति कैलालीके प्रमुख टीका कुमारी चौधरी भूल खुल्ला सिमानाकाके कारण मानव बेचविखन नियन्त्रण ओ उहीसे पीडित तथा प्रभावितके उद्धारमे समस्या हुइल बटैली । उहाँ कैलालीसे कञ्चनपुरसम खुल्ला सिमानाका रहल ओरसे मानव बेचविखन तथा ओसारपसारमे संलग्न गिरोह चोर डगरा प्रयोग कैना करल कारण उहीसे झन समस्या थपल बटाइल रही ।

उहाँ कहली, ‘कैलालीसे कञ्चनपुरसम नेपाल भारतके खुला सिमानाका रहल बावै, ओहेमारे मानव बेचविखन नियन्त्रणमे समस्या हुइल बा । खुल्ला सिमानाकाके कारण ओम्ने लागल गिरोह चोर डगरा प्रयोग कैना करल ओरसे उहीसे झन समस्या तथा चुनौती थपल बावै ।’

उहाँ खुल्ला सिमानाका रलेसे फेन सुरक्षा निकायके विशेष निगरानी तथा गस्तीके कारण मानव बेचविखन न्यूनीकरण हुइल फेन बटाइल रही । ओस्टके उहाँ मानव बेचविनख तथा ओसारपसार नियन्त्रण ओ उहीसे प्रभावितके उद्धार ओ पुनस्र्थापनाके लाग सरकारी पक्षसे विशेष नीति तथा कार्यक्रम सहित बजेट विनियोजन करे पर्ना जोड डेहल रही । ओस्टके उहाँ शान्ति पुनस्र्थापना गृहसे मानव बेचबिखन विरुद्धके अभियानमे महत्वपूर्ण योगदान फेन पुगाइल बटाइल रही ।

‘शान्ति पुनस्र्थापना गृह मावन बेचबिखन तथा ओसारपसार रोकथाम तथा नियन्त्रण कैना उद्देश्यसे खुलल् संस्था हो । संस्था आपन स्थापनाकालसे अब्बे आइटसम बहुट मजा काम कैटी आइल बा,’ उहाँ कहली, ‘संघसंस्थासे खास कैके राज्यहे सहयोग कैना हो, इ मेरके कार्यक्रम सरकार अपनहे करे पर्नाहो, ओकर लाग विशेष कैके राज्य ओ स्थानीय तहसे नीति तथा कार्यक्रम सहित बजेट विनियोजन कैटी कार्यक्रम सञ्चालन करे पर्ना हो ।’

प्रमुख चौधरी भूल मानव बेचविखन तथा ओसारपसार विरुद्धके अभियानबारे सक्कु सरोकारवाला निकाय समन्वय सहकार्य सहित लागे पर्नाके साथे विद्यालय तहमे फेन अभियानबारे जनचेतना सम्बन्धी कार्यक्रम सञ्चालन करे पर्ना जोड डेहल रही ।
पुनर्वास नगरपालिकाके नगरप्रमुख तोयराज शर्मा खुल्ला भारतीय सिमानाकाके कारण मानव बेचबिखन नियन्त्रण तथा रोकथाममे चुनौती रलेसे फेन अब्बे ठाउँ ठाउँमे विओपी स्थापनासे नियन्त्रणमे सहयोग पुगल बटाइल रहिट ।

धनगढी उपमहानगरपालिकाके नगर उपप्रमुख कन्दकला राना लैंगिक हिंसा तथा मानव बेचविखन न्यूनीकरणके लाग सक्कु जाने एकआपसमे समन्वय सहकार्य कैके आघे बह्रे पर्ना बटाइल रही ।

कैलालीके सहायक प्रमुख जिल्ला अधिकारी किरण मानव बेचबिखन नियन्त्रणमे शान्ति पुनस्र्थापना गृह महत्वपूर्ण भूमिका खेलल् बटैटी मानव बेचविखन नियन्त्रणहे आउर प्रभावकारी बनाइक लाग सक्कु निकाय समन्वय ओ सहकार्य कैके आघे बह्रे पर्ना बटाइल रही ।

जिल्ला प्रहरी कार्यालय कैलालीके ज्ञानेन्द्र बहादुर सिंह मानव बेचबिखन विरुद्ध सुरक्षा निकाय विशेष रुपमे खटल बटाइल रहिट । ओस्टके उहाँ उ अभियान विरुद्ध सक्कु निकायसे समन्वय ओ सहकार्य फेन जारी रहल बटाइल रहिट ।

मानव बेचविखन तथा ओसारपसारके जोखिममे पर्नाके कारण अशिक्षा, गरिबी तथा निम्न आर्थिक अवस्था, लैंगिक, सामाजिक तथा सांस्कृतिक विभेद रहल बावै । ओस्टके वेश्यावृति, यौन शोषण, अंग प्रत्यारोपण, घरेलु कामदार लगायतके लाग मानव बेचविखन हुइना जनाइल बा ।

कार्यक्रममे भजनी नगरपालिकाके नगरप्रमुख केवल चौधरी, पुर्नवास नगरपालिकाके नगरउपप्रमुख भुलिया राना, राष्ट्रिय मानव अधिकार आयोगके झंकर रावल, बार एशोसिएसन कैलालीके अध्यक्ष नाथुराम महतो लगायत मन्तव्य राखल रहिट । उहाँहुक्रे मानव बेचबिखन तथा ओसारपसार नियन्त्रण ओ उहीसे प्रभावितहुक्रनके उद्धार ओ पुनस्र्थापनाके लाग समन्वय सहकार्य कैटी आघे बह्रना प्रतिवद्धता जनाइल रहिट ।

उहे बिच शान्ति पुनस्थापना गृह कैलालीके कार्यक्रम संयोजक पार्वती चौधरी संस्थासे आव २०८१/०८२ मे सञ्चालित कार्यक्रमके वार्षिक प्रतिवेदन प्रस्तुत करल रही । उहाँसे प्रस्तुत करगैल प्रतिवेदनमे कैलालीमे १० हजार ७८ जनहनहे परामर्श, ४२० किशोरी तथा बालबालिकाके उद्धार करल बटाइल रही कलेसे ७ जनहनहे कानूनी सहयोग करल बटाइल रही । ओस्टके उहे कार्यक्रम बिच शान्ति पुनस्र्थापना गृहहे सहयोग करुइया सहयोगी संघ संस्थाहे सम्मानपत्र सहित सम्मान फेन करगिल रहे ।

गृहके संस्थापक अध्यक्ष शान्ता सापकोटाके अध्यक्षतामे हुइल कार्यक्रममे क्षेत्रीय संयोजक सन्जित सिंह स्वागत मन्तव्य राखल रहिट । कलेसे कार्यक्रमके सञ्चालन शान्ति पुनस्र्थापना गृहके पुनम विश्वकर्मा करल रहिट ।

कार्यक्रममे विभिन्न सरकारी तथा गैरसकारी निकायके प्रतिनिधि, सुरक्षा निकायके प्रमुख तथा प्रतिनिधि, सञ्चारकर्मीहुक्रनके सहभागिता रहल रहे ।