अत्तरिया हस्पिटलमे क्याथ ल्याब सेवा सुरु
पहुरा समाचारदाता
अत्तरिया, ५ अगहन । कैलालीके अत्तरिया स्थित अत्तरिया हस्पिटल प्रालिसे क्याथ ल्याब सेवा सुरु करले बा । सुदूरपश्चिम प्रदेशमे पहिल अस्पतालसे मुटुके बिरामीके लाग अत्याधुनिक क्याथ ल्याब सेवा सुरु करल हो । शुकके रोज एक कार्यक्रमके बिच क्याथ ल्याब सेवाके उद्घाटन करल बा ।
कार्यक्रमके बर्का पहुना एवं बरिष्ठ मुटुरोग विशेषज्ञ प्रा.डा. यादव भट्ट ओ अस्पतालके संस्थापक रघुनाथ पाठक क्याथ ल्याब सेवाके संयुक्त रुपमे रिबन काटके उद्घाटन करल हुइट ।
क्याथ ल्याब सञ्चालनमे आइलसँगे यी क्षेत्रके मुटुके बिरामीके लाग उपचारके लाग सहजता हुइना अस्पतालके अध्यक्ष डा. आनन्द पाठक बटैलै । यकर साथे उहाँ प्रदेशके नागरिक आब उपचारके लाग काठमाडौँ लगायत भारतके टमान शहर जाए पर्ना बाध्यताके अन्त्य हुइना बटैलै ।
१५ करोड रुपैयाँ ढेर लगानीमे अस्पतालसे क्याथ ल्याब सेवा सञ्चालन करल जनैले बा । क्याथ ल्याब सेवा सुरु हुइलपाछे मुटु सम्बन्धी जटिल समस्या– शल्यकर्म बिना पेसमेकर जडान, बन्द भल्भ खोल्ना, मुटुके प्वाल टल्ना, एन्जियोग्राफी–एन्जियोप्लास्टी जैसिन सुविधा स्थानीय स्तरमे उपलब्ध हुइना बावै ।
प्रा.डा. भट्टके अनुसार, अस्पतालसे प्रदेशके पहिल पूर्ण क्षमताके मुटुरोग सेवा प्रारम्भ कैके दीर्घकालीन स्वास्थ्य सुरक्षा दिशामे महत्वपूर्ण कदम सुरु करल बटैलै ।
अब सुदूरपश्चिमके बिरामी समय, पैसा ओ जोखिम बह्रैना लम्मा यात्रासे मुक्ति पैना बटै । आपत्कालीन मुटु उपचारमे ‘गोल्डेन आवर’ अत्यन्त महत्वपूर्ण हुइना हुइल ओरसे अत्तरियामे सेवा उपलब्ध हुइना प्रदेशके स्वास्थ्य क्षेत्रमे क्रान्तिकारी प्रारम्भ मानल बा ।
अस्पतालसे क्याथ ल्याबसँगे अन्य महत्त्वपूर्ण सेवा थप कैटी जैना योजना रहल जनैले बा ।
