मुक्त हलिया, कमैया, कमलरीके लाग बनल कार्यविधि कार्यान्वयन नैहुइल गुनासो

पहुरा समाचारदाता
धनगढी, ११ पुस । मुक्त हलिया, कमैया, कमलरीके लाग बनल कार्यविधि कार्यान्वयन नैहुइल गुनासो एक कार्यक्रमके सहभागीहुक्रे बटैले बटै ।

राष्ट्रिय मुक्त हलिया समाज सुदूरपश्चिम प्रदेशके आयोजनामे भुमि व्यवस्था, कृषि तथा सहकारी मन्त्रालयके समन्वय ओ एक्सन एडके सहकार्यमे मुक्त हलिया, कमैया, कमलरी पुनस्र्थापना सवालमे सरोकारवालाके भूमिका विषयक अन्तरक्रिया कार्यक्रममे सहभागी मुक्त हलिया, कमैया, कमलरीहुकनके अगुवाहुक्रे उ बाट बत्वाइल रहिट ।

मुक्त हलिया अगुवा राजुराम भुल सुदूरपश्चिम प्रदेशसे मुक्त हलिया, कमैया, कमलरी पुनस्र्थापना कार्यविधि बनल मने कार्यान्वयन नैहुइल बटैलै । सहकारी मार्फत जाने अनुदान मुक्त हलियासे नैपाइल बटैलै । संघीयतापाछे तीन तहके सरकार गठन हुइल मने मुक्त हलिया, कमैया कमलरीके पुनस्र्थापनाके बाँकी काम हुई नैसेकल बटैलै ।

मुक्त कमैया महिला विकास मञ्चके संस्थापक अध्यक्ष कौशिला चौधरी कमैया मुक्ती हुइल २५÷२६ बर्ष हुइल मने ढेर मुक्त कमैया पुनस्र्थापनाके प्याकेजमे आई नैसेक्ना दुखद रहल बटैली । प्रदेश सरकार ओ कुछ स्थानीय तहसे कार्यविधि बनाइल मने कार्यान्वयन नैहुइल बटैली । प्रदेश सरकारके योजना राजनितिक दलके आदेशमे पास हुइना करल बटैली । कमैया कमलरीके टमान सहकारी रहल मने बजेट नैपाइल बटैली । मुक्त हलिया, कमैयाहुकनहे सरकारसे डेहल पाँच कटठामे आय आर्जनके कार्यक्रम संचालन करेबेर अनुदानसे बञ्चित हुइल ओरसे प्रदेश सरकारसे लिजमे लेके हुइलेसे व्यवसाय कैना वातावरण बनाडेना आग्रह करली ।

विनोद चौधरी मुक्त कमैयासे पाँँच कटठामे कृषि व्यवसाय करे चाहल बेला कृषि विद्युत मिटर तथा अनुदान नैपाइल ओरसे उहीहे संशोधन कैना आग्रह करलै । अभिनसम प्रदेश ओ कैलालीके चार ठो पालिका कार्यविधि बनाइल मने कार्यान्वयन नैहुइल उहाँ बटैलै ।

राष्ट्रिय मुक्त हलिया समाज डडेल्धुराके अध्यक्ष तुलाराम सार्की पहाडके मुक्त हलियाके पुनस्र्थापनाके काममे ढिलाई हुइल बटैलै । मुक्त हलियाके लाग भेटनरी अस्पतालमे बजेट छुटयाइल मने कार्यक्रमके निवेदन डेहे जाईबेर भौगोलिक विकतटाके कारण समस्या हुइल बटैलै ।

राष्ट्रिय मुक्त हलिया समाज दार्चुलाके पूर्व अध्यक्ष दानीराम तिरुवा तीन ठो पालिकामे तथ्यांक लेहल मने परिचयपत्र वितरणके आवाज उठाईबेर सुनुवाई नैहुइल बटैलै ।

राष्ट्रिय मुक्त हलिया समाज कैलालीके अध्यक्ष भोजबहादुर सार्की दलित समुदायके भैसीनियक दुध डेरीवाला नैकिनल व्यथा सुनैलै ।

राष्ट्रिय मुक्त हलिया समाज कञ्चनपुरके अध्यक्ष शिवि लुहार कार्यविधि अनुसार काम नैहुइल, अनुदान हुइना खैनासे पाइल बटैलै । डडेल्धुराके भरत सार्की प्रदेश सरकार सक्कु जनहनहे बराबर रुपमे हेरेपर्ना बटैलै ।

गैसस महासंघ कैलालीके अध्यक्ष चेतमान साउद जेकर पहुँच नैहो आब प्रदेश सरकार ओकर अभिभावक बनेपर्ना बटलै ।
राष्ट्रिय मुक्त हलिया समाज डोटीके अध्यक्ष बजिर नेपाली जिल्लामे ८७ जाने परिचयपत्र पाइल मने सेवा सुविधासे बञ्चित रहल बटैलै । राष्ट्रिय मुक्त हलिया समाज सुदूरपश्चिम प्रदेशके अगुवा मंगल सार्की प्रदेश सरकारके इच्छा शक्ति हुइलेसे मुक्त हलिया, कमैया, कमलरी पुनस्र्थापनामे कौनो समस्या नैरहल बटैलै ।

एक्सन एडके सरोज पोख्रेल सरकारके प्रतिवद्धताफे डेखजाइठ, कमैया, हलियाके मागफे हुइटी रहल मने काम नैहुइल बटैलै । लाभान्वित समुदायसे पाई पर्ना मने नैपाइल बटैलै । कमैयाके क्षेत्रमे प्रगती हुइल मने मुक्त हलियाके अवस्था ज्यू के टिँयू रहल बटैलै ।

पत्रकार मनमोहन स्वाँर मुक्त हलिया पुनस्र्थापनाके एक चो ढेर बजेट विनियोजन करके हुइलेसेफे प्रदेश सरकारसे पुर्नविचार करेपर्ना बटैलै ।

अन्तरक्रिया कार्यक्रमके प्रमुख अतिथि सुदूरपश्चिम प्रदेश सरकारके भुमि व्यवस्था, कृषि सहकारी मन्त्री विरबहादुर थापा प्रदेश सरकार मुक्त हलिया, कमैया कमलरी पुनस्र्थापना तथा दिगो जिविकोपार्जनके लाग लागल बटैलै । उहाँ प्रत्येक, जिल्ला, स्थानीयतहमे फरक फरक कार्यक्रम लागु करल बटैलै । प्रदेश सरकार विगतमे का करल का नैकरल उहीहे छोरके आब नयाँ शिरासे आघे बह्रल ओरसे मुक्त हलिया, कमैया कमलरी पुनस्र्थापनाके एक चो के लाग हुइलेसेफे भारी बजेट विनियोजन करके आघे बह्रना तयार रहल बटैलै ।

मुक्त कमैया, कमलरीके सहकारी स्थापना करले बटै ओ उहीसे कोई व्यवसाय करटै कलेसे ८५ प्रतिशत अनुदान डेना उहाँ बटैलै ।

मन्त्रालयके सचिव शंकर शाह सक्कु जाने आपन जिम्मेवारी मजासे निर्वाह करलेसे कहुफे गुनासा नैअइना ओ सक्कु जानेक सवाल समेटना बटैलै ।

यहाँ ८४ प्रतिशत कृषिमे आधारित रहल ओ परम्परागत कृषिहे प्रवद्र्धन कैना जरुरी रहल बटैलै ।
भुमि व्यवस्था, कृषि सहकारी मन्त्रालयके भुमि शाखा प्रमुख मकर खाती यी बरस १०० जानेक घर निर्माणके लाग बजेट विनियोजन करल अनुगमनफे कैसेकल बटैलै ।

कृषि ज्ञान केन्द्र कैलालीके प्रमुख टेकबहादुर विष्ट मुक्त कमैया, हलियासंँग धुरी जोरल बटैटी पीडाहे शिरमे धारके आघे बह्रल ओ यी बरससे अपाङता ओ एकल महिलाहेफे समेटके आघे बह्रलफे बटैलै ।

कार्यक्रममे राष्ट्रिय मुक्त हलिया समाज सुदूरपश्चिम प्रदेशके कार्यक्रम संयोजक हरिसिंह बोहरा मुक्त हलिया, कमैया, कमलरी पुनस्र्थापनाके लाग उठल मागबारे प्रस्तुतीकरण करल रहिट ।

जेम्ने सुदुरपश्चिम प्रदेश भुमि व्यवस्था, कृषि तथा सहकारी मन्त्रालयसे गैल आर्थिक वर्षमे बझांगके थलारा गाउँपालिकामे मुक्त हलिया पुनःस्थापनाके लाग छनौट हुइल १६ परिवार मुक्त हलियाके आवास निर्माण सम्पन्न हुई नैसेकल । (विनियोजित बजेट फिज हुइल हो वा क्रमागत बजेटमे रुपान्तरण हुके यी बर्ष कार्यान्वयन हुइना कहल रहिट ।

मुक्त हलिया, कमैया, कम्लहरी पुनःस्थापनाके कार्यविधि २०८० मे कार्यक्रम निर्देशक समिति ओ कार्यक्रम कार्यान्वयन समितिके सरचना रहल मने हालसम उ संरचनामे मुक्त हलिया, कमैया ओ कम्लहरीके ओरसे समितिमे प्रतिनिधित्व नैहुइल ओरसे समितिसे कब पुर्णता पैना कहल रहिट ।

चालु आवमे प्रदेश सरकारके बजेट बक्तब्यके नम्बर बुँदा ५८ मे मुक्त हलिया, कमैया ओ कम्हरीके व्यवस्थापनके (आवास निर्माण) लाग ३ करोड ५० लाख रुपैया विनियोजन हुइल बा । बजेट बिनियोजन करलमे धन्यवाद ज्ञापन करटी बजेट कार्यान्वयन प्रक्रिया कबसे शुरु हुइना कहले रहिट । साथे बजेट बक्तब्यके बुदा नम्बर ११७ मे मुख्यमन्त्री जनता आवास कार्यक्रम संचालन कैना उल्लेख बा यम्ने मुक्त हलिया, कमैया ओ कम्लहरीहे कैसिक समाबेस करे सेक्ना कहल रहिट ।

भुमि ब्यब्सथा कृषितथा सहकारी मन्त्रालयके २०८१ चैत्र २८ गते अभिलेखीकरण ओ पुनःस्थापना प्रयोजनके लाग स्थानीय तहमार्फत उ विपन्न हलिया ओ कमैया परिवारके विवरण माग करल मने अधिकांस स्थानीय तहसे विवरण प्राप्त नैहुइल ओरसे दुसर सूचना हुई वा प्राप्त विवरण का आधारमे कार्य प्रक्रिया आघे बह्रठ ? (१५ दिने सूचना, नयाँ बर्षके विदा समेत परल ओरसे ढेर स्थानीय तहसे विवरण डेहे नैसेकल ।

सुदुरपश्चि प्रदेश सरकारसे बनाइल कार्यविधिमे स्थानीय तहसे आवश्यक डेखलमे एक चो के लाग नेपाल सरकारके लगतमे नाम छुटल मुक्त हलिया, कमैया ओ कम्लहरीके लगत संकलनकरे सेक्ना उल्लेख बा । सुदुरपश्चिम प्रदेशके ३४ ठो स्थानीय तहसे मुक्त हलिया पुनःस्थापना कार्यविधि पारित करके कुछ स्थानीय तहसे तथ्यांक संकलन, प्रमाणिकरण ओ परिचयपत्र वितरण करले बटै । स्थानीय तहसे पहिचानहुके परिचयपत्र पाइल मुक्त हलियाके पुनःस्थापनाके विषयमे मन्त्रालयसे कैसिक समावेस करठ ?) उदाहरणके लाग बाजुराके ४ पालिकासे परिचयपत्र वितरण करले बा ।

प्रत्येक वर्ष १०० जानेक दरले मुक्त हलिया, कमैया ओ कम्हरीके पुनःस्थापना कैना हो कलेसे ढेर वर्ष लग्ना डेखजाइठ । यकर लागप्रदेश सरकारसे हाली यी सवाल कैसिक समाधान करे सेक्जाइठ ?

चालु आ.व.मे प्रदेश सरकारके बजेट बक्तब्यके बुदानं २५ मे मुक्त हलिया, कमैया ओ कम्हरीलगायत विपन्न बर्गके ३१सय परिवारके खाद्य तथा पोषण ओ आयआर्जनके लाग ६ करोड २० लाख रुप्या विनियोजन हुइल बा । बिनियोजित बजेट सम्भवतः कृषि ज्ञान केन्द्र मार्फत कार्यान्वयन हुइना ओरसे उ बजेटमे मुक्त हलिया, कमैया ओ कम्लहरीहे कैसिक प्राथमिकता डेहे सेक्जाइठ ओ बजेट कार्यान्वयन प्रक्रिया कबसे शुरु हुइठ बारे प्रस्तुतीकरण करल रहिट ।

कार्यक्रम राष्ट्रिय मुक्त हलिया समाज सुदूरपश्चिम प्रदेशके अध्यक्ष ईश्वर सुनारके अध्यक्षतामे हुइल कार्यक्रममे स्वागत मन्तव्य कोषाध्यक्ष इन्दिरा ताम्रकार करल रहिट ।