कैलाली‐५ मे रास्वपाके पक्षमे बह्रटी जनलहर
पहुरा समाचारदाता
धनगढी, १५ फागुन । राष्ट्रिय स्वतन्त्र पार्टी (रास्वपा)से कैलाली क्षेत्र नं. ५ के उम्मेदवार बनल आनन्दबहादुर चन्द चुनावी घरदैलो अभियानके क्रममे धनगढी उपमहानगरपालिका–२ के साइली कटान क्षेत्रमे पुगेबर टोलवासी भेला होसेकल रहिट ।
“आपन क्षेत्रसे उठल रवि ओ बालेनके उम्मेदवार कैसिन बटै, का कहठै” कना जिज्ञासासहित जंगबहादुर योजना सुन्ना ओ प्रश्न कैना मुडमे रहिट । उम्मेदवार चन्द नजिक पुग्नासाथ उहाँ कहलै, “पहिले अपने आपन परिचय डेहेपरल, ओकरपाछे एजेन्डा सुनाइ परल । ओकरपाछे हम्रे आपन बात राखब ।”
आपन क्षेत्रके समस्याहे मिहिन ढंगसे बुझल ओ योजना बनाइल डा. चन्द प्रश्नके सरल ओ स्पष्ट जवाफ डेलै । साइली कटान क्षेत्रके डुबान ओ लडियाके कटानके समस्याहे उहाँ विश्वासिलो ढंगसे प्रस्तुत करलै । साथे, देश विकास नैहुइनाके कारणबारे आपन धारणा रख्टी नेतातन्त्रके कारण बह्रटी बेथिति ओ भ्रष्टाचार नियन्त्रणके लाग पार्टी ओ व्यक्तिगत रूपमे करल प्रयासबारे जानकारी डेलै । प्रणाली सुदृढीकरणके लाग आवश्यक कामबारे फेन उहाँ स्पष्ट परलै ।
“अन्य पार्टीके नेता ढेर आश्वासन बँट्ना काम करल बटै । मने चन्द सर हमार समस्याहे मजासे बुझ्ले बटै । ओहेमारे हम्रे खुसी बटी । इ बेर हम्रे टोलवासी नै मत परिवर्तन कैना प्रतिबद्धता जनाब,” एक स्थानीय बटैलै । अन्य समर्थन स्वरूप ताली बजैलै ।
शनिच्चर साँझ चन्दके टोली धनगढी उपमहानगरपालिका–६ मटियारी पुगेबर राना थारु समुदाय इ बेर घण्टीमे मतदान कैना निर्णय सुनैलै । यद्यपि, आघेक नेताहुक्रनके कार्यशैलीप्रति उहाँहुक्रे गुनासो फेन व्यक्त करलै ।
“कांग्रेस, एमाले, माओवादीसे उठल सक्कु नेताहे जिटाके पठैली, मने घुमके नैअइलै । ओहेमारे आब पुरानहे नैहोके, लावाहे जिटैना चाहब । मने लावा फेन ओस्टहे हुुइही कि ?” एक अगुवा महिला प्रश्न करली ।
उहाँ राना थारु समुदायमे सिकल सेल एनिमियाके समस्या, सेती अस्पतालके सेवामे डेखल दुर्दशा, स्वास्थ्य बीमाके जटिलता, खेट्वामे सिँचाइके लाग ट्युबवेलके अभाव, खानेपानी लगायतके विषय उठैटी उम्मेदवारसँग प्रतिबद्धता मग्ली ।
डा. चन्द दशकौँसे छोट छोट समस्या समाधान नैहुइल कारण नागरिक बाध्य होके अइसीन मुद्दा उठाइ परल बटैलै । “पुरान प्रणालीगत समस्या समाधान कैना रास्वपा लावा प्रणालीसे काम अओ बह्रैना बा । हमार नेतृत्वमे सरकार बनल पहिल १०० दिनमे परिवर्तनके संकेत डेखजैना बा,” उहाँ कहलै ।
यी दुई स्थान उदाहरण किल रहल उल्लेख कैटी धनगढी क्षेत्र नं ५ मे इ बेर मत परिवर्तनके संकेत डेखल दाबी करल बा । नेपाली कांग्रेससे इ बेर नरनारायण शाह (मनु) उम्मेदवार रहल बटै । एमालेसे यज्ञराज ढुंगाना ओ नेकपासे प्रेम आले उम्मेदवार रहल बटै ।
पाछेक दिनमे भर रास्वपाके उम्मेदवार आनन्दबहादुर चन्द उल्लेख्य जनसमर्थन पाइल दाबी करल बा । बजार क्षेत्र होस् वा गाउँ, चन्दके पक्षमे जनमत बह्रटी रहल स्थानीय बटैठै । “मने इ लहर २१ फागुनसम बचाइ सेकजाइठ् कि नैसेकजाइठ् कना चिन्ता बा,” धनगढी–५ हसनपुरके शिव शर्मा कहलै ।
चन्द देश–विदेशके अध्ययन, सिकाइ ओ अनुभवहे प्रयोग कैके देश विकासमे योगदान डेना प्रतिबद्धता जनैले बटै ।
“महनि नेता नकह्हो, मै अपनेन्के डाडा भैया, छावा नटिया हुँ । दशकौँसम अन्य पार्टीहे भोट डेलेसे फेन खासै विकास नैहुइल, न टे प्रणाली नै सुढरल । इ बेर आपन लाग, आपन सन्ततीके लाग मतदान करेपरल,” उहाँ नम्र शैलीमे मतदातासँग आग्रह कैटी आइल बटै ।
उहाँ आपन प्रतिबद्धतापत्रमे गुणस्तरीय शिक्षा ओ स्वास्थ्य, आधुनिक कृषि, बीउ–मल व्यवस्थापन, उत्पादनपाछेक बजारीकरण, धनगढीहे पर्यटन ओ व्यापार केन्द्रके रूपमे विकास कैटी क्रमशः औद्योगिक नगरके रूपमे विस्तार कैना योजना उल्लेख करले बटै ।
“चन्दजी योग्य ओ क्षमतावान उम्मेदवार रहल बटै । क्षेत्र नं. ५ मे उहाँजैसिन उम्मेदवार औरे नैहुइट । आब हम्रे उहाँहे नै भोट डेना योजनामे बटी,” हसनपुरके शिवराज भट्ट बटैलै ।
