बदर मतहे सदर बनाइक लाग मतदाता शिक्षा कार्यक्रम

पहुरा समाचारदाता
धनगढी, १६ फागुन । कैलालीके गोदावरी नगरपालिकाके २ ओ वडा नम्बर ११ ओलानीमे निर्वाचन मतदाता शिक्षा कार्यक्रम सम्पन्न हुइल बा ।

मानव अधिकारका लागि महिला एकल महिला समुह सुदूरपश्चिम प्रदेशसे कुर्वे विष्ट्रोके सहयोगमे यिहे फागुन २१ गते हुइना प्रतिनिधि सभा सदस्य निर्वाचनमे बदर हुइना मतहे सदर बनाइक लाग निर्वाचन मतदाता शिक्षा कार्यक्रम कैगिल हो ।

गोदावरी नगरपालिका नम्बर २ राधाकृष्ण मन्दिर लग्गे समुहके प्रदेश अध्यक्ष भगवती हमालके अध्यक्षतामे हुइल कार्यक्रममे एकल, द्वन्दपीडित ओ सीमान्तकृत समुदायके महिलाहुकनहे मतदान कैना तरिकाबारे जानकारी डेगिल रहे । कार्यक्रममे निर्वाचन मतदाता शिक्षा स्वय सेवक टंकेश्वरी मतदाता शिक्षा ओ मतदान प्रक्रियाबारे जानकारी डेहल रहिट ।

ओस्टेक करके कार्यक्रममे मानव अधिकारका लागि महिला एकल महिला समुहके सल्लाकार तथा फाया नेपालके अध्यक्ष गोमा आचार्य निर्वाचन ओ महिलाके सहभागिताबारे पत्रकार प्रेम चौधरी मताधिकार, मतदाता शिक्षाके महत्व, प्रत्यक्ष तथा सामनुपातिक उम्मेदवारहे मत दर्ना तरिकाबारे जानकारी डेहल रहिट ।

कार्यक्रममे मानव अधिकारका लागि महिला एकल महिला समुह सुदूरपश्चिम प्रदेशसे संचालित शान्ति परियोजनाके प्रदेश अधिकृत वेद अवस्थी निर्वाचनमे मतदान करेबेर केक्रो डर, धम्की वा लोभ लालचमे नैपरके सक्कु जानेक माग मुद्दा उठैना, विकास करेसेक्ना सक्षम उम्मेदवारहे स्वच्छासे मतदान कैना आग्रह करल रहिट ।

कार्यक्रममे उ समुहक गोदावरी नगरसमितिके सचिव जानकी बोहरा स्वागत मन्तव्य राखल रहिट । यहाँ हुइल कार्यक्रममे वडा नम्बर २,३ ओ ४ नम्बर एकल महिला, सीमान्तकृत समुदायके महिला तथा द्वन्दपीडित महिलाहुकनहे सहभागिता रहे ।

ओस्टेक करके शनिच्चरके रोज गोदावरी नगरपालिका–११ ओलानीमेफे निर्वाचन मतदाता शिक्षा कार्यक्रम कैगिल बा । उ कार्यक्रममे मतदाता शिक्षा स्वयं सेवक पुजा बडैला मतदान कैना तरिकाबारे प्रशिक्षण डेहल रहिट ।

कार्यक्रममे मानव अधिकारका लागि महिला एकल महिला समुहके सल्लाकार तथा फाया नेपालके अध्यक्ष गोमा आचार्य निर्वाचन ओ महिलाके सहभागिताबारे प्रस्तुतीकरण करल रहिट ओ सहजीकरण मानव अधिकारका लागि महिला एकल महिला समुह सुदूरपश्चिम प्रदेशसे संचालित शान्ति परियोजनाके प्रदेश अधिकृत वेद अवस्थी करल रहिट ।

कार्यक्रममे वडा नम्बर १०, ११ ओ १२ नम्बरके एकल महिला, सीमान्तकृत समुदायके महिला तथा द्वन्द्वपीडित महिलाहुकनहे सहभागिता रहे । समुहके प्रदेश अध्यक्ष भगवती हमालके अध्यक्षतामे हुइल कार्यक्रममे समूहके कोषाध्यक्ष मीना भण्डारी, जिल्ला उपाध्यक्ष धना पाठकलगागतके सहभागिता रहे ।