मतदाताहे धन्यवाद डेहे पुगल जोशीहे बधाई सहित ज्ञापनपत्र
पहुरा समाचारदाता
धनगढी, २५ फागुन । प्रतिनिधी सभा निर्वाचनमे कैलाली क्षेत्र नम्बर ३ के विजयी उम्मेदवार जगत प्रसाद जोशीहे गाउँघरके स्थानीय बधाई सहित आपन गाउँठाउँके समस्या सम्बोधन कैना माग करले बटै ।
राष्ट्रिय स्वतन्त्र पार्टीसे विजयी हुइल जोशी आपन क्षेत्रके मतदाताहे धन्यवाद डेहे पुगल बेला बेला उहाँहे बधाई सहित गाउँठाउँके समस्या सम्बोधनके लाग ज्ञापनपत्र समेत बुझाइल हुइट । अँट्वारके रोज कैलारी गाउँपालिका वडा नम्बर ७ के टमान गाउँमे पुगल उहाँहे वहाँके स्थानीय बधाई सहित आपन गाउँघरके समस्या सुनैटी ज्ञापनपत्र समेत बुझैले बटै ।
भुईयाफाँटाके स्थानीय उहाँहे मुख्य कैके लम्मा समयसे भोगचलन कैटी आइल जग्गाके जग्गाधनी प्रमाणपत्र उपलब्ध हुइ पर्ना, सिँचाईके लाग विद्युत विस्तार सहित पाँच कठ्ठा रहल किसानहे फेन विद्युत मिटर उपलब्ध हुइ पर्ना माग सहित ज्ञापनपत्र बुझाइल गाउँके भलमन्सा फिरु चौधरी जानकारी डेलै ।
यकर साथे उहाँ कटैनी पुलसे पुरान भुँइयाँफाँटासम कृषि डगरामे ग्राभेल ओ मोहना लडियामे निर्माण हुइल झोलुङ्गे पुल कटानके जोखिममे रहल ओरसे तटबन्ध निर्माण लगायतके माग सहित ज्ञापनपत्र बुझाइल भलमन्सा चौधरी जानकारी डेलै ।
ओस्टके रामपुर गाउँके स्थानीय फेन उहाँहे बधाई सहित ज्ञापन पत्र बुझैले बटै । गाउँके भलमन्सा रामलाल चौधरीके अनुसार गाउँके प्रत्येक सडकमे पानी पिच सहित ढल निकास हुइ पर्र्ना, निर्माण हुइल ढेर समयसम फेन सञ्चालनमे आइ नैसेकल भुँइयाफाँटा खानेपानी सञ्चालन हुइ पर्र्ना, रामपुरसे हौसलपुरसम कृषि डगरामे पानीपिच हुइ पर्र्ना, खेट्वामे विद्युत विस्तार सहित कृषि मिटर, हौसलपुरसे विपतपुरसम जनता तटबन्ध कार्यक्रम, रामपुर ओ विपतपुरके बिच्चे रहल देउखरिया सँघ्वाके ठाउँमे झोलुङ्गे पुल निर्माणके माग सहित ज्ञापन पत्र बुझाइल भलमन्सा चौधरी जानकारी डेलै ।
ओस्टके बसन्ता, बैजपुर, मनकापुर ओ छुट्की पलिया, बर्का पलिया गाउँके स्थानीय समेत बधाई सहित गाउँघरके समस्या सुनैटी सम्बोधनके लाग अनुरोध करल रहिट ।
निर्वाचन सम्पन्न हुइलपाछे जोशी गाउँ–टोलमे पुगके शुभेच्छुक, समर्थक तथा मतदाताहुक्रनसे भेटघाट कैटी ओइनहे धन्यबाद सहित समस्या बुझ्टी रहल बटै ।
इहे फागुन २१ गते हुइल प्रतिनिधी सभा सदस्यके लाग जोशी २० हजार ३५९ मत प्राप्त कैके विजयी हुइल बटै । जोशीके निकटतम प्रतिस्पर्धी नेपाली कम्युनिष्ट पार्टी (नेकपा) के उम्मेदवार बिरमान चौधरी ११ हजार ९८३ मत प्राप्त करले बटै ।
ओस्टके नेपाली कांग्रेसके उम्मेदवार भिम बडुवाल नौहजार ७१० मत पैले बटै । ओस्टके नेकपा (एमाले) के उम्मेदवार गौरीशंकर चौधरी चार हजार ७५२ मत पैले बटै ।
भजनी नगरपालिका वडा नम्बर ३ के २०७४ ओ २०७९ मे वडा अध्यक्षमे बिजयी हुइल नागरिक उन्मुक्ति पार्टी नेपालके बिक्रम चौधरी ६७४७ मत ओ राष्ट्रिय प्रजातन्त्र पार्टीके बिरेन्द्रबहादुर बम दुईहजार ३४७ मत पैले बटै ।
