लाईसेट परियोजनासे जिविकोपार्जनमे सहयोग
पहुरा समाचारदाता
धनगढी, २८ फागुन । मुक्त कमैया महिला विकास मंचसे कैलारी गाउँ पालिकामे सचालित समुदाय सशक्तीकरण तथा विकासका लागि स्थानीय पहल (लाईसेट)परियोजनाके पालिका स्तरिय परियोजना सल्लाहकार समितिके बैठक बुधके रोज हसुलियामे सम्पन्न हुइल बा ।
पालिका स्तरिय परियोजना सल्लाहकार समितिके अध्यक्ष तथा गाउँपालिका अध्यक्ष राज समझ चौधरीके अध्यक्षतामे उ कार्यक्रम हुइल हो । कार्यक्रममे उहाँ लाईसेट परियोजनाके गतिविधिसे सीमान्तकृत, यूवा, महिला, मुक्तकमैया, मुक्त कमलरी, अपाङता रहल व्यक्ती, एकल महिलाके जिविकोपार्जनमे टेवा पुगल बटैलै । उहाँ कहलै, यी परियोजनाके गतिविधिमे पालिका सहकार्य करके आघे बह्रना तयार बा । यी परियोजनासे सम्बन्धित टमान शाखासे संचालित कार्यक्रय मिल्दो जुल्दो रहलेसे सहकार्य करके जैना तयार बटी ।
कार्यक्रममे गाउँ पालिका उपाध्यक्ष भगवती कुमारी चौधरी , टमान वडाके वडा अध्यक्ष हुकनके सहागिता रहे । कार्यक्रमके उ परियोजनाके परियोजना अधिकृत चेतमान साउद परियोजनासे सन २०२५ मे करल काम ओ सन २०२६ मे कैना कार्यक्रमबारे प्रस्तुतीकरण करल रहिट ।
यी परियोजनासे सन २०२५ साले व्यवसाय प्रवद्धन सहयोग कार्यक्रम अन्र्तगत दुना टपरी उद्योगके लाग २ वटा उद्योग संचालन बा । संगे २ ठो शौचालय ओ एक ठो नल्का निर्माण, ४ ओ ५ नम्बर साइजके दुना बनैना मेशिन टमान खालके १० सेट डाइ सहयोग ओ व्यवसायके दर्ता , प्यान, बैक खाता सहित सहयोग सहजीकरण २ थान त्रिपाल, २ थान टेबल, २ थान रयाक, ८ थान पिर्का ओ ४ ठो प्लाष्टिक कुर्सी सहयोग करल बा ।
दुना टपरी उद्योग स्थापनाके सहयोग करल पाछे ४० जाने लाभान्वित हुइल बटै । उ उद्योगमे आबद्ध रहुइयाहुक्रे सखुवाके पटियासे डोनिया, टेपारी बनाके आर्थिक रुपमे सबल हुइटी रहल उहाँ बटैलै ।
ओस्टेक कैके २ ठो बेसार उद्योग सञ्चालनके लाग सपोट कैगिल रहे । उ उद्योगमे ३४ जाने आवद्ध रहल बटै । जिहिसे बेसार उत्पादन कैके थोकमे विक्री करके आर्थिक रुपमे सवाल हुइल परियोजना अधिकृत साउद जनैलै । ४० जाने महिला जलवायूु मैत्री बेसार खेती ३० रोपनीमे बेसार खेती करल बा ।
उ परियोजनासे कैलारी गाउँपालिका वडा नम्बर ५ स्थित पुरान मन्कापुरमे १० कटठामे सामुहिक रुपमे मल्चिग प्रविधिसे मिर्चा खेतीफे सुरुवाट करलपाछे ४४ जाने लाभान्वित हुइल बटै ।
ओस्टेक करके १५ जनहनहे व्यवसाय सञ्चालनके लाग सपोट करल बा । ९ जनहनहे व्यवसायिक तालिम तथा आय आर्जनके सपोट कैगिल बा । ६ ठो स्थानीय विपत व्यवस्थापन समितिहे पुर्व तयारी, योजना निर्माणके लाग विपत सामाग्री सपोट करल बा ।
परियोजनासे ५४८ घरधुरीमे काम करटी रहल बा । ओम्ने मन्से मुक्त कमैया, कम्लहरी, सुकुम्बासी, अपाङ्ता रहल व्यक्ती, एकल महिला, २५ ठो समुहहे लक्षित कैके काम करटी रहल उहाँ जनैलै ।
ओम्ने ६ ठो स्थानीय विपत व्यस्थापन समिति,२ ठो मुक्त कमलरी सहकारी, पालिकास्तरके कमलरी सन्जाल, एक ठो दीप आपङ्ता मानव अधिकार संघसंगसे काम करटी रहल बा ।
उ परियोजनासे खास करके सामाजिक सद्भाव ओ संरक्षण कायम कैना, उत्पादनसिल जिविकोपार्जन, गुस्तरिय सेवा प्रवाह ओ सस्थागत विकासमे जोर डेहक लाग कार्यक्रम सञ्चालन करल बा ।
कार्यक्रममे मञ्चके सस्थापक अध्यक्ष कौशिला चौधरी परियोजना मार्फत उत्पादन करल वस्तुके बजारीकरण कैनामे सपोट करल बटैली । उहाँ पालिकाहे सस्थासंगे कार्यक्रममे साझेदारी कैना आग्रह करले बटी ।
कार्यक्रमके सञ्चालन मञ्चके कार्यक्रम सयोजक इन्द्र चौधरी करल रहिट । उहाँ गैर परम्परागत उद्यम धनगढी उपमहानगरपालिका ओ गोदावरी नगरपालिका क्षेत्रमे जस्ते थारु गरगहना बनैना, बेकरी, जेसिबी मर्मत तालिम डेनाके साथे व्यवसाय सञ्चालन के लाग सहयोग कैना जनैलै ।
कार्यक्रममे सस्थाके अध्यक्ष सीमा चौधरी, अपांगता अधिकारकर्मी नन्दराज भट्ट, मुक्तकमैया महिला विकास मञ्चके सामाजिक परिचालक रमेश चौधरी, गाउँपालिकाके टमान शाखाके प्रमुख हुकनके सहभागिता रहे ।
ओस्टेक करके लाइसेट परियोजनासे कैलारी गाउँपालिकाके वडा नम्बर ४ स्थित सुन्दरपुर खल्ला के गाउँहे नमुना बस्तीके रुपमे काम कैना ओ वडा नम्बर १,२ ओ ९ मे कार्यक्षेत्र विस्तार कैना जनागिल बा ।
