चैतन्य पाठशालाके रजत जयन्ती विविध कार्यक्रम सहित मनाजैना

पहुरा समाचारदाता
धनगढी, २८ फागुन । चैतन्य पाठशाला धनगढी आपन रजत जयन्ती समारोह अभिभावक दिवस तथा वार्षिकोत्सव विविध कार्यक्रम सहित मनैना हुइल बा ।
रजत जयन्तीके पूर्व सन्ध्यामे बिफेक रोज पत्रकार सम्मेलन मार्फत पाठशाला आपन रजत जयन्ती अभिभावक दिवस तथा वार्षिकोत्सव सम्बन्धि जानकारी कराइल हो । शिक्षा ओ संस्कारके संगम, वेद ओ विज्ञानके संयोजन तथा प्रकृति ओ संस्कृतिके सम्मान जैसिन मावन विकास ओ विश्व कल्याणके शैक्षिक दर्शनहे आत्मसात कैटी बालबालिकाके सर्वाङ्गीन विकासके लाग सर्मपित पाठशाला विविध कार्यक्रम आयोजना कैके मनैना हुइल हो ।

इहे फागुन २९ ओ ३० गते हुइना कार्यक्रममे पाठशालासे विद्यार्थी लक्षित कार्यक्रम अन्र्तगत विज्ञान प्रर्दशनी तथा स्टीम परियोजना प्रर्दशनी, सृजनात्मक अभिव्यक्ति तथा चित्रकला प्रस्तुती, विद्यार्थीहरुका बहुआयामिक सांस्कृतिक तथा प्रतिभा प्रस्तुती, प्रतिभा सम्मान कार्यक्रम रहना पाठशालाके अध्यक्ष गणेश प्रसाद जोशी जानकारी डेलै ।

अभिभावक लक्षित कार्यक्रम अन्र्तगत आर्दश अभिभावक सम्मान, रामाइलो खेल कार्यक्रम आयोजना हुइना ओ शिक्षक तथा कर्मचारी केन्द्रित कार्यक्रम अन्र्तगत आर्दश शिक्षक तथा कर्मचारी सम्मान, उत्कृष्ट शिक्षक तथा कर्मचारी सम्मान, शिक्षक तथा कर्मचारीके प्रस्तुती रहना अध्यक्ष जोशी जानकारी डेलै ।

ओस्टके शैक्षिक सेवा तथा शैक्षिक सहयोग अन्र्तगत कैलाली बहुमुखी क्याम्पसहे स्मार्ट बोर्ड हस्तान्तरण, धनगढी आसपासके सामुदायिक विद्यालयहे कम्प्युटर हस्तान्तरण, प्रदेशके ग्रामीण क्षेत्रके सामुदायिक विद्यालयसे सी परीक्षामे सहभागी एक हजार विद्यार्थीहे व्रिज कोर्ष तथा बहुआयामिक क्षमता विकास कोर्ष अध्ययन सम्बन्धी छात्रवृति डेना, मावन सेवा लक्षित संघसंस्थाहे सहयोग ओ सामुदायिक विद्यालयहे भौतिक तथा शैक्षिक सामाग्री वितरण, प्रदेशके पहाडी जिल्लामे अवस्थित सामुदायिक विद्यालयमे कक्षा १० मे अध्ययनरत छ हजार विद्यार्थीहे उपयोगी पुस्तक वितरण ओ लोक सेवा तयारी कक्षामे जेहेन्दार तथा आर्थिक रुपमे विपन्न युवाहे अवसर प्रदान कैना जनाइल बा ।

साथे पूर्व सञ्चालक, पूर्व शिक्षक, कर्मचारी, पूर्व विद्यार्थी, पूर्व पिटिए अध्यक्ष ओ व्यवस्थापन समिति सदस्यहे सम्मान ओ वर्तमान पिटिए पदाधिकारी तथा व्यवस्थापन समिति सदस्यहे समेत सम्मान कैना जनाइल बा ।

उहे अवसरमे फागुन २९ गते वनदेवी मन्दिर परिसरसे पाठशालासम ओ ३० गते गुरही चोकसे पाठशाला परिसरसम प्रभातफेरीके कार्यक्रम कैना जनाइल बा । साथे कार्यक्रममे टमान सांस्कृतिक झाँकी समेत प्रस्तुती रहना जनाइल बा ।

झाँकीमे सुदूरपश्चिम लोक सांस्कृतिक समाज पञ्चेबाजा, मगर समुदायके पञ्चेबाजा, थारु सखिया नाच, रानाथारुके होरी, अछामी सेवा समाजके होली, खप्तड छान्ना लोक संस्कृति संरक्षण समूहके भुवा नाच ओ चैतन्य तेक्वान्डो दोजाङ्ग, चैतन्य स्पोर्ट एकेडेमी, चैतन्य लोक सेवा तयारी, चैतन्य पतञ्जली योग केन्द्र ओ चैतन्य रिसर्च एण्ड डेभलपमेन्ट सेन्टरके प्रस्तुती रहना अध्यक्ष जोशी जानकारी डेलै ।