खाद्य प्रविधि तथा गुण नियन्त्रणसे अर्धवार्षिक प्रगति विवरण सार्वजनिक
पहुरा समाचारदाता
धनगढी, २९ फागुन । खाद्य प्रविधि तथा गुण नियन्त्रण कार्यालय धनगढीसे आर्थिक वर्ष २०८२÷०८३ के अर्धवार्षिक प्रगति सम्बन्धी जानकारी डेले बा ।
शुकके रोज कार्यालयमे आयोजित पत्रकार सम्मेलन मार्फत कार्यालयसे सम्पादक करल प्रगति विवरण सार्वजनिक कैटी जानकारी कराइल हो । कार्यालयके वरिष्ठ खाद्य अधिकृत हरेराम प्रधान सावन महिनासे पुस महिनासम ३९ चो खाद्य बजार अनुगमन, २६ चो होटल रेस्टुरेन्ट अनुगमन, ७४ चो खाद्य उद्योग अनुगन, १/१ चो दाना उद्योग ओ दाना बजार अनुगमन करल जानकारी डेलै ।
खाद्य उद्योगसे उत्पादन हुइना खाद्य वस्तुके उद्योगसे गुणस्तर सुनिश्चित कैना उद्देश्यसे खाद्य उद्योग अनुगमन करल वरिष्ठ खाद्य अधिकृत प्रधान बटैलै । ओस्टके बजारमे विक्रीवितरण हुइना खाद्य पदार्थ, होटल रेष्टुरेन्ट ओ अन्य खाद्य व्यवसायके फेन अनुगमन करल उहाँ बटैलै । उहाँ टरटिहुवार लक्षित नियमित ओ संयुक्त रुपमे ओ उजुरी गुनासो सम्बोधन लगायतके अनुगमन करल बटैलै ।
अनुगमनके क्रममे पसल तथा होटल रेस्टुरेन्टहे स्वच्छता सुधारके लाग परामर्श डेना, उपभोग अवधि समाप्त हुइल तथा गुणस्तरीय खाद्य वस्तु जफत कैके नष्ट कैना ओ आवश्यक कारवाही प्रकृया आघे बह्राइल समेत उहाँ जानकारी डेलै ।
उहाँ एक लाख ७२ हजार मूल्य बराबरके टमान उपभोग्य मिति ओराइल, मिसावट पाइल, खाद्य स्वच्छता कायम नैहुइल, दुषित तथा न्यूनस्तरके खाद्य पदार्थ जफत कैके नष्ट करल जानकारी डेलै । ओइसीन खाद्य पदार्थमे पाउरोटी, सस, मसला, रंग मिलााइल दाल, जेरी, घरी घरी प्रयोग करल तेल, जुस लगायत रहल जनाइल बा ।
ओस्टके उहाँ सावनसे पुससम १० ठो उद्योगके अनुमति पत्र जारी करल, २८ उद्योगके अनुमति पत्र नवीकरण ओ २० ठो उद्योग स्थापनाके लाग सिफारिस करल जनाइल बा ।
ओस्टके हालसम कार्यालयसे खाद्य निरीक्षण अधिकारीसे ऐन बमोजिम ५० ठो खाद्य नमुना संकलन, ११० ठो खाद्य स्वच्छता सर्भिलेन्सके लाग नमुना संकलन, टिनाटावन तथा फलफुलमे विषादीके अवशेष परिक्षणके लाग दुईसयठो नमुना संकलन करल जनाइल बा ।
ओहे अवधिमे सुदूरपश्चिम प्रदेशके टमान श्रोतसे ९७६ ठो नमूना संकलन होके आइल खाद्य तथा दाना नमूनाके विश्लेषण सेवा प्रदान करल फेन जनाइल बा । ओम्नेसे विषादी अवशेष नमुना दुइ सय, ९७९ खाद्य नमुनामे ४१ ठो प्रतिकूल रहल पाइल बा । १४५ औपचारिक नमूनासे ४ ठो प्रतिकूल पाइल, २४९ सर्भिलेन्स खाद्य नमुनासे ९ ठो प्रतिकुल ओ ५८५ अनुरोधात्मक खाद्य नमुनासे २८ ठो प्रतिकुल पाइल जनाइल बा ।
इहे अवधिमे ८ ठो खाद्य स्वच्छता तथा गुणस्तर सम्बन्धी उजुरी परल जनाइल बा । उजुरीमे मुख्यतया बोटलके पानी, प्लाष्टिकके चाउर ओ लेवल सम्बन्धी रहल बा ।
ओस्टके उहे अवधिमे १६ ठो होटल रेष्टुरेन्टके खाद्य स्वच्छताके आधारमे स्तरीकरण करल बा । कार्यालयसे करल स्तरीकरणमे घराना चुलो, बेल्स क्याफे, दुबका थकाली अतिउत्तम, होटल डिभोटी, शालिनी बाटिका एण्ड इको रिसोर्ट, गार्डेन होमस्टे एण्ड रिसोर्ट उत्तम ओ भीमदत्त नगरपालिकाके होटल कलश, आफनो घर टेम्पल रिसोर्ट धनगढी, ग्रिन गोदावरी रिसोर्ट, गोदावरी सामान्य रहल जनाइल बा ।
उ अवधिमे कार्यालयमे प्राप्त नमूनाके विश्लेषण दस्तुर तथा अनुज्ञापत्र जारी, नविकरण ओ सिफारिस दस्तुर वाफत सात लाख ३० हजार ७११ रुप्या राजस्व संकलन करल बा कलेसे कार्यालयसे चालु ओ पुँजीगत खर्च १६.१८ प्रतिशत वित्तिय प्रगति हुइल जनाइल बा ।
