धनगढी उपमहानगरपालिकाके प्रधानाध्यापकहुकन नेतृत्व क्षमता विकास तालिम
पहुरा समाचारदाता
धनगढी, २ चैत । धनगढी उपमहानगरपालिकासे काठमाडौं विश्वविद्यालयसँगके सहकार्यमे सञ्चालन करल प्रधानाध्यापक नेतृत्व क्षमता विकास तालिम सम्पन्न हुइल बा ।
शैक्षिक सत्र २०८२ मे पालिकाभिटर रहल ६८ ठो सामुदायिक विद्यालयके प्रधानाध्यापकहे लक्षित करटी सञ्चालन करल १६ डेना, ९३ क्रेडिट आवरो तालिम पूरा करल ५८ जाने प्रधानाध्यापकहे प्रमाणपत्र प्रदान करल हो । २०८१ पौष ३ गतेसे २०८२ सावन १२ गतेसम उ तालिम संचालन हुइल रहे । तालिम तीन चरणमे सञ्चालन करल रहे । पहिल चरणमे ४ दिन प्रत्यक्ष फेस–टु–फेस रूपमे, दुसरा चरणमे ८ दिन अनलाइन माध्यमसे ओ अन्तिम चरणमे पुनः ४ दिन प्रत्यक्ष रूपमे प्रशिक्षण डेहल रहे ।
तालिममार्फत विद्यालय नेतृत्व, व्यवस्थापन क्षमता अभिवृद्धि, शैक्षिक योजना निर्माण तथा विद्यालयके गुणस्तर सुधारसम्बन्धी विषयमे प्रधानाध्यापकहे प्रशिक्षण प्रदान करल रहे ।
प्रमाणपत्र वितरण कार्यक्रममे काठमाडौं विश्वविद्यालयके स्कूल अफ एजुकेशनके डिन प्राध्यापक डा.बालचन्द्र लुइँटेल तथा शिक्षक प्रशिक्षक इन्द्रमणि दाहाल सहभागी हुइल रहिट । कार्यक्रममे बोल्टी डिन लुइँटेल विद्यालयके शैक्षिक गुणस्तर सुधारमे प्रधानाध्यापकके प्रभावकारी नेतृत्व अत्यन्त महत्वपूर्ण हुइना बटैलै । उहाँ तालिमसे विद्यालय व्यवस्थापनहे व्यवस्थित बनैटी शिक्षण–सिकाइ प्रक्रियामे सकारात्मक परिवर्तन ल्यन्ना सहयोग पुग्न विश्वास व्यक्त करलै । साथे उहाँ तालिमसे प्राप्त ज्ञान ओ अनुभवहे विद्यालयमे व्यवहारिक रूपमे प्रयोग कैना प्रधानाध्यापकहुकनहे आग्रह करलै ।
उ कार्यक्रम सोम्मारके धनगढी उपमहानगरपालिकाके नगरसभा हलमे आयोजित मासिक प्रधानाध्यापक बैठकके अवसरमे सम्पन्न करल हो । कार्यक्रममे धनगढी उपमहानगरपालिकाके नगर प्रमुख गोपाल हमाल ओ नगर उपप्रमुख कन्दकला कुमारी रानाके उपस्थिति रहे । कार्यक्रममे सहभागी प्रधानाध्यापकहुक्रे तालिमसे प्राप्त ज्ञान ओ सीपहे विद्यालयके शैक्षिक विकासमे उपयोग कैना प्रतिबद्धता व्यक्त करले बटै ।
