सुदूरपश्चिम महोत्सवसे ३ करोड ७८ लाख आम्दानी
पहुरा समाचारदाता
धनगढी, ३ चैत । सुदूरपश्चिमके पहिचान, संस्कृति ओ आर्थिक सम्भावनाहे उजागर कैना उद्देश्यसे आयोजना करल सुदूरपश्चिम महोत्सव सफलतापूर्वक सम्पन्न हुइल बा ।
आयोजकसे पत्रकार सम्मेलनमार्फत महोत्सवके आय–व्यय विवरण सार्वजनिक कैटी कार्यक्रम भव्य ओ उपलब्धिमूलक रहल जनैले बा । आर्थिक विवरण अनुसार महोत्सवसे कुल ३ करोड ७८ लाख ३६ हजार ३६७ रुपैयाँ आम्दानी हुइल बा कलेसे २ करोड ६३ लाख १ हजार ७ सय ४० रुपैयाँ खर्च हुइल जनैले बा । करआघेक नाफा १ करोड १० लाखसे ढेर रहल जनाइल बा । टमान शिर्षक सहित ६० लाख ५३ हजार सात सय ७१ रुपैयाँ सरकारहे कर टिरल कैलाली उद्योग बाणिज्य संघके अध्यक्ष पुष्करराज ओझा जानकारी डेले बटै ।
संघीय तथा स्थानीय कर दायित्वअन्तर्गत करिब ५१ लाख रुपैयाँ भुक्तानी करल बा । सक्कु कर तथा दायित्व भुक्तानीपाछे करिब २४ लाख रुपैयाँ खुद बचत रहना उल्लेख करल बा ।
महोत्सवके सफल आयोजनामे आयोजक समिति, स्वयंसेवक, सुरक्षा निकाय, सञ्चारकर्मी, कलाकार तथा सहभागी सक्कु जनहनहे विशेष धन्यवाद व्यक्त कैटी कैलाली उद्योग बाणिज्य संघके बरिष्ठ उपाध्यक्ष केशबराज जोशी महोत्सव केवल व्यापारिक मेला किल नैहोके सुदूरपश्चिमके पहिचान, संस्कृति, सम्भावना ओ व्यवसाय प्रवद्र्धन कैना साझा मञ्चके रूपमे स्थापित हुइल बा ।
महोत्सव अवधिभर दुई हजारसे ढेर स्थानीय प्रत्यक्ष रोजगारी पाइल ओ स्थानीय कलाकारहुक्रे आपन प्रतिभा प्रस्तुत कैना अवसर पाइल जनाइल बा । इहीसे प्रदेशके कला ओ संस्कृतिके संरक्षण तथा प्रवद्र्धनमे महत्वपूर्ण योगदान पुगाइल आयोजकके कहाइ रहल बा ।
आयोजकसे ‘सुन्दर सुदूरपश्चिम’ अभियानहे निरन्तरता डेटी प्रदेशके आर्थिक, पर्यटन, कृषि, स्वास्थ्य, शिक्षा ओ औद्योगिक सम्भावनाके खोजी ओ विकासके सम्भावनाके खोजि करक लाग ‘भिजन सुदूरपश्चिम’ बहस मुलक कार्यक्रमके सुरुवात करल समेत अध्यक्ष ओझा बटैलै । उहाँ आगामी दिनमे आउर प्रभावकारी रूपमे महोत्सव सञ्चालन कैना प्रतिबद्धता जनैले बटै ।
