दशरथ चन्द स्वास्थ्य विज्ञान विश्वविद्यालयके स्तरोन्नतिबारे छलफल

पहुरा समाचारदाता
धनगढी, १५ चैत । कैलालीके गेटास्थित दशरथ चन्द स्वास्थ्य विज्ञान विश्वविद्यालयके स्तरोन्नति एवं आगामी योजनाबारे शिक्षा, विज्ञान तथा प्रविधिमन्त्री सस्मित पोखरेल ओ कैलाली–२ से निर्वाचित सांसद केपी खनाल बिच छलफल हुइल बा ।

सनिच्चरके सिंहदरबारमे हुइल छलफलमे दशरथ चन्द स्वास्थ्य विज्ञान विश्वविद्यालयके उपकुलपति, रजिस्ट्रार लगायतके अधिकारीके फेन सहभागिता रहल रहे । अस्पतालके क्षमता वृद्धि लगायतके विषयमे छलफल हुइल सांसद खनाल जानकारी डेलै । विश्वविद्यालयके स्तरोन्नति ओ आगामी कार्ययोजनाके बारेम विशेष छलफल हुइल बा । अस्पतालके क्षमता विस्तार कैके हाल १०० बेडमे सञ्चालनमे रहल ३०० बेडमे बिस्तार कैके सेवाहे थप प्रभावकारी बनैना बारे छलफल हुइल उहाँ कहलै ।

ओस्टके, नयाँ शैक्षिक कार्यक्रमके सुरुवात कैसिक कैना ओ आवश्यक स्रोत सम्बन्धमे फेन छलफल हुइल बा । आवश्यक आर्थिक स्रोत २ अर्ब ५८ करोडके सुनिश्चितता कैके आगामी शैक्षिक सत्रसे एमबीबीएस ५० सिट, नर्सिङ ३० सिट, बीएस्सी एमएलटी २० सिट ओ नेत्र विज्ञानके २० सिट सञ्चालन कैना बारे पहल करल उहाँ बटैलै ।

विश्वविद्यालयहे चालु आर्थिक बरसमे प्राप्त बजेट कार्यान्वयनके लाग फेन पहल करल सांसद खनालके कहाइ रहल बा । विश्वविद्यालयके लाग स्वीकृत हुइल ४३ करोड बजेट सिनेट बैठक बैठे नैसेकके रोकल जानकारी शिक्षामन्त्रीहे कराइल रहे । यथाशीघ्र सिनेट बैठक आयोजना कैके उक्त बजेटहे परिचालन कैना बारे छलफल हुइल बटाइल बा ।