धनगढीके नगरवासीनहे जटरा रगत चाही व्यवस्था कैना तयार बटीः नगरप्रमुख हमाल
पहुरा समाचारदाता
धनगढी, १५ चैत । धनगढी उपमहानगरपालिकाके नगर प्रमुख गोपाल हमाल धनगढीके नगरबासीहुकनहे जटरा रागत चाही व्यवस्था कैना तयार रहल बटैले बटै ।
अँटवारके रोज निशुल्क रगतके व्यवस्था, अपाङगता सहायक सामग्री वितरण ओ ‘पेपरलेस धनगढी’के अवधारणा आघे सारेक लाग कैगिल पत्रकार सम्मेलनमे उहाँ उ बाट बट्वाइल रहिट ।
उहाँ कहलै, धनगढीके नगरबासी जटरा रगत चाही उपमहानगरपालिकासे जटराफे निशुल्क रगतके व्यवस्था कैना तयार बटी । अस्पतालमे भर्ना हुइल धनगढीमे स्थायी बासिन्दा रहलेसे विमारी नगरपालिका अइही नैपारी डाक्टरसे लिखल पर्चा लेके रक्तसंचार केन्द्रमे सम्पर्क करलेसे रगतके व्यवस्था हुजाई । विरामी मनै रगत नैखैही, नैपिही डाक्टरके सल्लाह अनुसार चटरा आवश्यक रही ओटरा लैजाके चाह्रजाई ।
रगतके विषयमे धनगढीके नगरबासी ढुक्क हु्इलेसे हु्ई, पैसा दारे नैपरी, विमारी मनैसे पेसा करल विवरण धनगढीमे तीन तीन महिनामे विल पेश करलेसे यहाँसे भुक्तानी कैना व्यवस्था कैल बा ।
ओस्टेक धनगढी उपमहानगरपालिकासे अपाङगता रहल व्यक्तीहुकनके खोज खोजके आवश्यकताके आधारमे अपाङता सहायता सामाग्री निशुल्क व्यवस्था करटी रहल नगर प्रमुख हमाल बटैलै ।
धनगढ्री उपमहानगरपालिकासे आर्थिक बर्ष २०८१/०८२ मे १५ सय ३० पिन्ट रगत ओ आर्थिक वर्ष २०८२/८३ सालमे ५ सय ८२ पिन्ट रगत करके कुल २१ सय २२ पिन्ट रगत तथा रगत जन्य पदार्थ उपलब्ध कराइल बा ।
सेवाग्राहीहे आवश्यकता परल सक्कु रगतजन्य पदार्थ उपलब्ध कराइल बा । एक जाने विमारीहे आर्थिक बर्षमे ३३ चो सम रगत उपलब्ध कराइल बा । नगरपालिकासे नेपाल रेडक्र सोसाइटीहे हालसम रगतवाफत २४ लाख ४० हजार ३ सय रुप्या भुक्तानी करसेकल बा ।
उहाँ कहलै, ‘नगर प्रहरी, टोल विकास समिति, महिला स्वास्थ्य स्वयं सेविकालगायतसे जाके खोज्ठी । यहाँसम ल्यानके स्वास्थ्यकर्मीसे उहाँहुकनके स्क्रनिङक करके आवश्यक सामाग्री वितरण कैठी ।
धनगढीमे कोई अपाङता रहल व्यक्ति बटै कलेसे जेफे खबर करके सहयोग करेसेक्जाई । हम्रे उहाँहुकनके चाहल सहायता सामग्री डेहे सेकब कलेसे ओसिन व्यक्तीहुकनहे जीवनमे भारी परिवर्तन ल्याने सेक्जाई । हम्रहिनहे सन्तुष्टी मिली । यी कार्यपालिकासे निर्णय करल हो ओ हम्रे आघे बह्रल बटी ।
उपनगरपालिकासे आर्थिक २०७९/८० सालमे सेवा प्रदान करल १८९ जाने, सहायत सामग्री वितरण २०५ रहल बा । आर्थिक २०८०/८१ सालमे सेवा प्रदान करल १९६ जाने, सहायत सामग्री वितरण २१७ रहल बा । आर्थिक २०८१/८२ सालमे सेवा प्रदान करल १०९ जाने, सहायत सामग्री वितरण ११६ रहल बा । आर्थिक २०८२/८३ सालमे सेवा प्रदान करल २५७ जाने, सहायत सामग्री वितरण ३१८ रहल जनागिल बा ।
पेपरलेस धनगढीके अवधारण आघे सारगिल
ओस्टेक करके धनगढी उपमहानगरपालिकासे ‘पेपरलेस धनगढी’के अवधारणा आघे सरले बा । प्रशासनिक कामकारबाहीहे सरल ओ हाली बनैना उद्देश्यसे ‘पेपरलेस धनगढी’ के अवधारणा आघे सारल धनगढी उपमहानगरपालिकाके नगर प्रमुख गोपाल हमाल बटैलै । यी अवधारणासे सेवाग्राहीहे सहज ओ हाली सेवा उपलब्ध करैना अपने विश्वस्त रहल उहाँ बटैलै । डिजिटल प्रणाली लागू हुइलेसे घरसे बैठके सेवा लेहे सेक्ना उहाँ बटैलै ।
यी अन्तर्गत जन्मदर्ता, नागरिकतासहित टमान सिफारिस, दर्ता तथा नवीकरणजैसिन सेवाहे क्रमश अनलाइनमार्फत उपलब्ध करैना तयारी हुइटी रहल धनगढी उपमहानगरपालिकाके सञ्चार तथा सूचना प्रविधि शाखा प्रमुख अनुप भट्ट बटैलै । स्थानीय सरकारके टमान सेवा प्रणली, सूचनाहे एक्के प्लेटफर्ममे एकिकृत करके नागरिकहे हाली, पारदर्शी ओ सहज सेवा प्रदान कैना सूचना प्रविधि प्रणाली (युडिजीपी) अपनेहुक्रे विकास करटी रहल उहाँ बटैलै ।
युएनडिपीसंगके साझेदारीमे उ प्रणाली तयार करे लागल उहाँ बटैलै । प्रणाली विकास अन्र्तगत पहिल चरणके काम अइना असार पहिल हप्ता सेक्ना तयारी रहल भट्टके कहाई बा । पहिल चरण अन्र्तगत नागरिक इ–केवाइसी, मोड्युल, सिफारीस मोड्युल ओ फाइल ट्रयाकिङ मोड्युलके विकास कैना उहाँ बटैलै ।
पहिल चरणके विकासके काम सेकल लगटे युडिजीपी प्रणाली लागू कैना उहाँ बटैलै । युडिजीपी प्रणाली लागु हुइलपाछे ढेर सेवा अनलाइनसे प्रवाह हुइना ओरसे कम साक्षरता हुइल नागरिकके लाग सहायता डेस्क स्थापना कैना भट्ट बटैलै । सहायता डेस्कसे नागरिकहे अनलाइन सेवा प्रयोग कैना सहयोग कैना, आवेदन प्रविष्ट कैना सहयोग कैना ओ आवश्यक कागजात डिजिटल प्रणालीमे दर्ता करके सम्बन्धित शाखाहे फर्वाड कैना कार्य करी ।
ओकरपाछे ६ महिनाभिटरे सम्पन्न कैना करके दुसरा चरणके प्रणाली विकासके काम सुरु कैना बा । दुसरा चरण अन्र्तगत इ–सिग्नेचर मोड्युल, डिजिटल अभिलेख व्यवस्थापन प्रणाली, नागरिक गुनासो तथा सुझाव व्यवस्थापन मोड्युल, कार्यालय विवरण, सार्वजनिक सूचना मोड्युल लगायतके विकास करके लागू कैजाई । यी प्रणालीसे पेपर बोक्के कोठा–कोठा जाई नैपर्ना ओ डिजिटल माध्यमसे कागजरहित ओ नागरिक केन्द्रित सेवाप्रदान कैना करके अपनेहुक्रे प्रणाली विकास करे लागल उहाँ बटैलै ।
“घर बैठके जन्मदर्ता, नागरिकतासहित टमान सिफारिस, दर्ता तथा नवीकरणजैसिन कागजात प्राप्त करसेक्जाई, उहाँ कहलै, कौनो कागजात अपुग हुइलेसे वा कौनजो अन्य समस्या डेखलेसे सेवाग्राहीके मोबाइलमे नोटिफिकेशन तथा म्योसज आई ओ उहे अनुसार सेवाग्राही आघे बह्रे सेक्ही ।” उ प्रणाली लागू हुइलेसे सेवाग्राहीसे मोबाइलमे अपन कागजात प्राप्त कैना ओ हार्डकपी चाहलेसे केल्ह वडा वा पालिका आई पर्ना बा ।
सेवा प्रवाहके क्रममेकौनो गुनासो हुइलेसेफे उ सफ्टवयर मार्फत नै धारे सेक्ना व्यवस्था रहल सञ्चार तथा सूचना प्रविधि शाखा प्रमुख भट्ट बटैलै ।
धनगढी उपमहानगरपालिकाके उप प्रमुख कन्दकला राना यी प्रणाली लागू हुइलेसे सेवाग्राहीके समय तथा खर्च बचत हुइना बटैली । डिजिटल अभिलेख धारेबेर सूचनाके सुरक्षा ओ व्यवस्थापनफे थप सुदृढ हुइनामे अपने विश्वस्त रहल उहाँ बटैली ।
