असमानता अन्त्य कैना समावेशी नीति निर्माण संगे प्रभावकारी कार्यान्वयनमे जोड

पहुरा समाचारदाता
धनगढी, १७ चैत । असमानता अन्त्य कैना राज्यसे समावेशी नीति निर्माण किल नैकैके ओकर प्रभावकारी कार्यान्वयन हुइ पर्नामे एक कार्यक्रमके वक्ताहुक्रे जोड डेले बटै ।

गैरसरकारी संस्था महासंघ नेपाल सुदूरपश्चिम प्रदेशके आयोजनामे सोम्मार ओ मंगरके रोज धनगढीमे आयोजित असमानता प्रतिबेदन २०२६ के तयारीके लाग प्रदेश स्तरिय परामर्श बैठकके सहभागीहुक्रे ओम्ने जोड डेहल हुइट ।

उहाँहुक्रे शिक्षा, स्वास्थ्य, रोजगारी, डिजिटल प्रविधि ओ अवसरमे समान पहुँच सुनिश्चित नैकैके असमानता हटे नैसेक्ना बटैटी पाछे पारल समुदायहे लक्षित कार्यक्रम, तथ्यांकमे आधारित योजना ओ सक्कु तहके सहकार्य अपरिहार्य रहल बटाइल रहिट । उहाँहुक्रे सक्कु नागरिक समान अवसर ओ सम्मान नैपैही, तबसम समृद्ध ओ न्यायपूर्ण समाज निर्माण सम्भव नैहुइना बातमे समेत जोड डेहल रहिट ।

बैठकसे सहभागीके महत्वपुर्ण बिचार, अनुभव तथा सुझाब संकलन करल बा । संकलित सुझावके आधारमे प्रतिबेदनहे प्रभावकारी बनैनाके साथे प्रमाणमे आधारित वकालतमे महत्वपुर्ण योगदान पुगैना विश्वास आयोजक लेले बावै ।

कार्यक्रममे गैरसरकारी संस्था महासंघ नेपालके केन्द्रीय बरिष्ठ उपाध्यक्ष नानी माया थापा, केन्द्रीय सचिव साबित्रा घिमिरे, केन्द्रीय सदस्य तथा सुप सह इन्चार्ज कैशिला चौधरी तथा कन्सल्टेन्स मोनिका जि, गैरसरकारी संस्था महासंघ प्रदेश समिति अध्यक्ष देवि प्रसाद खनाल, धनगढी उपमहानगर पाकिकाके बालकल्याण अधिकारी तथा संघसंस्था प्रमुख टंक बिष्ट, सामाजिक विकास मन्त्रालय सुदुरपश्चिम प्रदेशके सामाजिक महाशाखा प्रमुख प्रतिभा श्रेष्ठ, टमान क्षेत्रके अभियान कर्मी, अगुवा जेन्जी, मिडियाकर्मी ओ अन्य संघ संस्थाके प्रमुख तथा प्रतिनिधि सहभागिता रहल रहे ।

उक्त सीआइआर कार्यक्रममे ३१ जनहनके उपस्थिति रहल रहे । ओस्टके एफजिडीएस कार्यक्रममे फेन अगुवा जेन्जी लगायत गैसस महासंघ प्रदेश समिति ओ जिल्ला शाखा समिति सहित १९ जनहनके सहभागिता रहल रहे कलेसे (KII) कार्यक्रममे प्रदेश नीति तथा योजना आयोग सुदूरपश्चिम प्रदेशके सदस्य नृप बहादुर सुनार, लगायत टमान क्षेत्रके अभियानकर्मी ओ गैसस महासंघ केन्द्रीय समिति बरिष्ठ उपाध्यक्ष नानी माया थापा, कन्सल्टेन्स मोनिका ओ गैरसरकारी संस्था महासंघ केन्द्रीय सदस्य तथा सुप इन्चार्च कैशिला चौधरी लगायत १५ जनहनके सहभागिता रहल रहे ।

उक्त कार्यक्रमके सहजीकरण गैसस महासंघ नेपाल केन्द्रीय बरिष्ठ उपाध्यक्ष नानीमाया थापा ओ मोनिका जि करल रहिट । कार्यक्रमके सञ्चालन गैसस महासंघ नेपाल सुदुरपश्चिम प्रदेश अध्यक्ष देवि प्रसाद खनाल करल रहिट कलेसे कार्यक्रमके व्यावस्थापन सुदुरपश्चिम कर्मचारी गोकुल खड्का करल रहिट ।