मुक्त कमैया तथा कम्लहरी पुनर्स्थापनाके कार्यविधि निर्माणके लाग ज्ञापनपत्र

पहुरा समाचारदाता
हसुलिया, १८ चैत । मुक्त कमैया समाज कैलारीसे मुक्त कमैया तथा कम्लहरी पुनर्स्थापना कार्यविधि निर्माण सहित कार्यान्वयनके लाग गाउँपालिका अध्यक्ष राजसमझ चौधरीहे ज्ञापन पत्र बुझैले बा ।

टठिया ठठैटी दबाव र्याली सहित गैल मुक्त कमैया तथा कम्लहरीके टोलीसे गाउँपालिका अध्यक्ष चौधरीहे ज्ञापनपत्र बुझाइल हो ।

ज्ञापनपत्रमे सुदूरपश्चिम प्रदेश सरकार भूमि व्यवस्था कृषि तथा सहकारी मन्त्रालयसे पारित करल मुक्त कमैया, कम्लहरी तथा हलिया पुर्नस्थापना कार्यविधिके आधारमे कैलारी गाउँपालिकासे फेन मुक्त कमैया तथा कम्लहरी पुर्नस्थापना कार्यविधि निर्माण कैके कार्यान्वयन ओ २०८३/८४ के नीति तथा कार्यक्रममे मुक्त कमैया पुर्नस्थापना तथा सामाजिक विकासके लाग बजेट विनियोजनके लाग माग करल बा ।

ओस्टके मुक्त कमैया ओ मुक्त कमैया युवाहे सीपविकास तालिम (कम्युटर, हेयरकटिङ्ग, उद्यमशिलता तालिम ओ स्थानीय सरकारसे श्रम ऐन, निर्देशिका तथा कार्यविधि बनाके अनुगनम संयन्त्र स्थापना कैके अनौपचारिक क्षेत्रके श्रम नियमित अनुगमन कैके समस्याके सम्बोधन कैना माग करल बा ।

ओस्टके मुक्त कमैयाहुक्रनके जमिनके समस्या समाधानके लाग अधिकार सम्पन्न कार्यदल बनाके बैठल ठाउँके लालपुर्जा वितरण, मुक्त कमैयाके बालबालिकाके लाग प्राविधिक शिक्षा तथा उच्च तहसम निःशुल्क शिक्षा तथा स्वास्थ्य उपचारके व्यवस्था कैना माग करल बा ।

साथे समाजसे कैलारी गाउँपालिका अन्र्तगत मुक्त कमैया बस्तीगत माग रख्टी फेन बुझाइल बा । उक्त मागमे मिलनपुर मुक्त कमैया बस्तीमे जिविकोपार्जनके लाग व्यवसायिक तरकारी खेतीमे सहयोग, आर्थिक सुधारके लाग मुक्त कमैयाहे नास्ता पसलके सामाग्री सहितके सहयोग ओ मिलनपुर बस्ती, विपतपुर, सपनानगर ओ हिरापुर मुक्त कमैया बस्तीमे थ्रिफेज कृषि विद्युत लाईन विस्तार माग करल बा । साथे विपतपुर मुक्त कमैया बस्तीमे जग्गा कटान नियन्त्रणके लागि तट्बन्ध निर्माण, खानेपानीके लाग खानेपानी तथा हेण्ठपम्प ओ सिँचाईके लाग ओभरहेड टंकी, डिप बोरिङ्ग समेतके माग रहल बा ।

मुक्त कमैया बस्तीमे व्यावसायिक वंगुर पालन, ओमनगर मुक्त कमैया बस्तीमे थारु सांस्कृतिक पहिरन पोसाक निर्माणके लाग तालिम, फाइबर पोली व्याग उद्योग सञ्चालन ओ सुन्दरपुर मुक्त कमैया बस्तीमे कचहरी भवन निर्माण ओ व्यावसायिक बाख्रा पालनमे सहयोग ओ सपनानगर मुक्त कमैयामे नयाँ मनिकापुरसे बन्दरगौह्रीसम सडक स्तरोन्नति सहित ग्राभेल माग करल बा ।
मुक्त कमैया समाजके केन्द्रिय अध्यक्ष पशुपति चौधरी हमार राखल माग गाउँपालिकासे समयमे सम्बोधन नैकैलेसे सशसक्त आन्दोलन कैना बटैले बटै ।