उत्कृष्ट कर्मचारीहे नगद ओ प्रमाणपत्रसहित सम्मान
पहुरा समाचारदाता
काठमाडौं, २१ चैत । शिक्षा क्षेत्रमे योगदान पुगैटी आइल चैतन्य इन्स्टिच्युट अफ म्यानेजमेन्ट, चैतन्य एकेडेमीसे अपन स्थापनाके १२ वर्ष सफलतापूर्वक पूरा करके १३औं वर्षमे प्रवेश करले बा ।
यी विशेष अवसरमे एकेडेमीसे एक भव्य समारोहके आयोजना करके संस्थाके प्रगतिमे अहोरात्र खटना उत्कृष्ट कर्मचारीहुकनहे नगद पुरस्कार तथा सम्मान–पत्रद्वारा पुरस्कृत करले बा ।
कार्यक्रममे बोल्टी एकेडेमीके संस्थापक तथा कार्यकारी निर्देशक गणेश जोशी संस्थाके आजसमके सफलताके मुख्य श्रेय यहाँ कार्यरत समर्पित कर्मचारी ओ प्रशिक्षकहुकनहे डेहल बटै । उहाँ चैतन्यके १२ वर्षके यात्रा चुनौतीपूर्ण रहलेसेफे टिमके निस्वार्थ भावना ओ मेहेनतसे आज यी उचाइ प्राप्त हुइल बटैलै ।
उहाँ कहलै, हमार संस्थामे शनिच्चरके बिदा कहे नैमिलठ, बिहान ५ बजेसे रात १० बजेसम कक्षा सञ्चालन हुइठै । यैसिन व्यस्त ओ कडा तालिकामेफे हाँसोमुख हुके काम करे सेक्ना जनशक्ति हमार मुख्य शक्ति हो । उहाँ थप्लै कि ढेर मनै यैसिन कार्यतालिकामे टिके नैसेक्ठै, मने जे टिक्ठै ओ दत्तचित्त हुके लग्ठै, ओइनके कारण चैतन्य आज ब्रान्ड बन्न सफल हुइल हो ।
संस्थाके विकासमे विशेष योगदान पुगैना कर्मचारीहे प्रोत्साहित कैना नगद राशी ओ सम्मान–पत्र प्रदान करल रहे । यैसिक सम्मान करेबेर कर्मचारीके मनोबल उच्च हुइना ओ ओइनके संस्थाप्रति थप अपनत्वके भावना जागृत हुइना विश्वास एकेडेमी लेले बा ।
सम्मानित कर्मचाीहुक्रे सम्मान ग्रहण करटी कहलै, “चैतन्य एकेडेमीमे काम करेबेर हम्रे केवल जागिर नाही, एक ठो परिवारके हिस्सा हुइल महसुस कैठी ं। यैसिन प्रोत्साहनसे कामप्रति उत्साह ओ संस्थाप्रति अपनत्व बढाइठ ।”
“यी सम्मानसे अपनेहुकनके मेहनतके मूल्याङ्कन हुइल महसुस हुुइल बटैलै । संस्थासे अपन कामहे मूल्य डेना केल्ह नाही, भविष्यमे आउर मेहनत कैना प्रेरितफे करटी रहल ओइनके कहाई रहे ।
विगत १२ वर्षसे चैतन्य एकेडेमीसे हजारौं विद्यार्थीनहे निजामती सेवाके टमान पदमे सफलतापूर्वक प्रवेश करैना मार्गदर्शकके भूमिका खेलल बा । गुणस्तरीय शिक्षण सामग्री, अनुभवी प्रशिक्षक ओ कडा अनुशासन यी संस्थाके विशेषता हुइट ।
सञ्चालकसे अइना दिनमेफे अस्टे जोस ओ जाँगरके साथ काम कैना टिमहे आग्रह करटी कर्मचारीके भविष्य ओ वृत्तिविकासो संस्था सदा गम्भीर रना बाटमे जोड डेलै ।
