कक्षा ८ के परिक्षामे उत्कृष्ठ नतिजा ल्यन्ना धनगढीके २५ विद्यालयहे सम्मान
पहुरा समाचारदाता
धनगढी, ३० चैत । धनगढी उपमहानगरपालिकासे कक्षा ८ के उपमहानगरस्तरीय परीक्षामे उत्कृष्ट नतिजा हासिल कैना २५ ठो सामुदायिक तथा संस्थागत विद्यालयहे सम्मान करले बा । शैक्षिक गुणस्तर सुधारमे उल्लेखनीय योगदान पुगुइया विद्यालयहे विशेष कार्यक्रममार्फत सम्मान तथा पुरस्कृत करल हो ।
उपमहानगरपालिकामे आयोजित कार्यक्रममे उत्कृष्ट नतिजा ल्यन्ना १० सामुदायिक ओ १५ संस्थागत विद्यालयहे सम्मान करल रहे । सामुदायिकओर वेहडाबाबा मावि, शारदा मावि, सिद्धार्थ मावि, सर्वोदय मावि, इन्द्रोदय मावि, पञ्चोदय मावि, शारदा मावि देवरिया, जनप्रिय मावि, ठेकराज मावि ओ चन्द्रोदय मावि रहल बटै ।
ओस्टे संस्थागतओर सिद्धार्थ विद्या मन्दिर, मयूर ई.बो., गुरुकुल ई.बो., जेसिज एभरेस्ट, ग्लोबल मोडर्न पब्लिक स्कुल, पञ्चकोटी विद्या निकेतन, नन्दिनाज एकेडेमी, अपि विद्या निकेतन, गोल्डेन ज्योति, केदारनाथ विद्या निकेतन, सिद्धार्थ इन्टरनेशनल, दरबार ई.बो., ग्यालेक्सी मावि ओ डिलाइट ई.बो. स्कुल सम्मानित हुइल बटै ।
यी बारके सम्मान कार्यक्रम परम्परागत शैलीसे फरक ढंगसे ब्यान्ड–बाजासहित सम्पन्न करल रहे । यिहीसे विद्यालय, शिक्षक तथा विद्यार्थीमे थप उत्साह ओ प्रेरणा थपल सहभागीहुक्रे बटैले बटै । कार्यक्रमहे सम्बोधन कैना गोपाल हमाल विद्यालयबीच स्वस्थ प्रतिस्पर्धा सिर्जना कैना तथा समग्र शैक्षिक वातावरण सुधार कैना सार्वजनिक सम्मानके परम्परा सुरु करल बटैलै । उहाँ २०७९ सालमे सामुदायिक विद्यालयके नतिजा अत्यन्त कमजोर डेखलपाछे सुधारके टमान कार्यक्रम सञ्चालन करल ओ ओकर सकारात्मक प्रभाव अब्बे डेखाई लागल उल्लेख करलै ।
उहाँक अनुसार सामुदायिक विद्यालयके नतिजा २०७९ मे ९.४७ प्रतिशत केल्ह रहलमे २०८० मे ३०.७९ प्रतिशत, २०८१ मे ४२.१६ प्रतिशत हुइटी हाल ५०.०६ प्रतिशतसे उप्पर पुगल बा । यी सुधारसे शिक्षा क्षेत्रमे करल लगानी, अनुगमन ओ योजनाबद्ध प्रयासके प्रतिफल डेखाइल उहाँ बटैलै ।
२०८२ सालके परीक्षामे सामुदायिकओर ४३ विद्यालयके २ हजार ५४३ विद्यार्थी सहभागी रहलमे १ हजार २७३ जाने उत्तीर्ण हुइल बटै, जौन विगतके तुलनामे उल्लेखनीय सुधार मानल बा । कार्यक्रममे सहभागी प्रधानाध्यापकसे उपमहानगरपालिकाके यी पहलसे अपनेहुकनहे थप जिम्मेवार बनाइल ओ अइना शैक्षिक सत्रमे आउर उत्कृष्ट नतिजा ल्यन्ना प्रेरणा मिलल प्रतिक्रिया डेलै ।
पछिल्का समय धनगढी उपमहानगरपालिकासे शिक्षा क्षेत्रहे प्राथमिकतामे रख्टी विद्यालयके भौतिक पूर्वाधार विकास, शिक्षक क्षमता अभिवृद्धि तथा गुणस्तरीय शिक्षामे जोड डेटी आइल बा । यैसिन कार्यक्रमसे अइना दिनमे शैक्षिक क्षेत्रमे आउर सकारात्मक परिवर्तन ल्यन्ना अपेक्षा करल बा ।
कार्यक्रममे उपप्रमुख कन्दकलाकुमारी राना शैक्षिक सुधार ओ उपलब्धी सक्कु जानेक प्रयास हुइल बटैली । शैक्षिक सुधार कार्यक्रम आइल पश्चात सक्कु जनहनमे मै स्मरण करैना चाहटु २०७९ सालके परिक्षाफलमे १७ विद्यालय निल हुइल रहे । जम्मा नौ प्रतिशत रहे । उ अब्बे मेहनत ओ दैनिक अनुगमन अपन प्रति विश्वासके कारण नतिजा सुधार आइल हो ।
संस्थामे मजा रहे अब्बे अब्बे आउर सुधार हुइल उहाँ बटैली ।
कार्यक्रममे धनगढी उपमहानगरपालिकाके शिक्षा शाखा अधिकृत घुम्मन सिंह बडायक उपमहानगरपालिकासे शिक्षा क्षेत्रमे करल गतिविधिबारे जानकारी डेहल रहिट ।
