‘पाँच बरसमे कमैयाके सक्कु समस्या सम्बोधन हुइ’
पहुरा समाचारदाता
हसुलिया, ३ बैशाख । कैलाली क्षेत्र नम्बर ३ से निर्वाचित प्रतिनिधीसभा सदस्य जगत प्रसाद जोशी मुक्त कमैयाके समस्या सम्बोधनके लाग अपने सदनमे निरन्तर आवाज उठैना बटैले बटै ।
मुक्त कमैया समाज कैलारीके आयोजनामे कैलारी गाउँपालिका वडा नम्बर ७ मिलनपुर बस्तीमे मुक्त कमैया पुनस्र्थापना सवाल तथा लावा बरसके शुभकामना आदान प्रदान कार्यक्रममे बोल्टी उहाँ ओइसीन बटाइल हुइट । आपन क्षेत्रमे सबसे ढेर पीडित समुदाय मुक्त कमैया रहल बटैटी उहाँ मुक्त कमैयाके समस्या अपने समस्याके रुपमे सदनमे आवाज उठैना बटाइल हुइट ।
‘आपन समस्याके पक्षमे बोल्क लाग मतदान कैके महिन पठाइल हुइटी, अपनेन् जस्टे दलित समुदाय फेन पीडा खेप्टी र हल बावै, इ देशके ढेर मनै आर्थिक स्थितिसे जुधल बटै, उ वर्गके निमित्त, उ समुदायके संघर्षके निमित्त, बोलक लाग ओ आवाज उठाइक लाग हम्रे उ सदनमे बटी’, उहाँ कहलै‐ ‘अपनेन्के समस्या मोर समस्या हो कहिके सदनमे आवाज उठैले बटुँु, ओ निरन्तर उ समस्या सम्बोधन नैहुइटसम आवाज उठैटी रहम् ।’
उहाँ मुक्त कमैयाके समस्या सम्बोधनके लाग सदनमे प्रतिनिधित्व करुइया थारु सांसदसँग समन्वय सहकार्य कैके ओइनहे फेन आवाज उठैना अनुरोध कैना बटैले बटै । यकर साथे उहाँ पाँच वर्षे कार्यकालमे कमैयाके सक्कु समस्या सम्बोधन हुइना फेन बटैले बटै ।
‘हम्रे बोल्नासे फेन अब्बे काम कैना ठाउँमे पुगल बटी, हम्रे पाँच वर्षे कार्यकाल पाछे कमैयाके नाउँमे इ नैहुइल, उ नैहुइल कहिके मुद्धा उठैना बात अब्बे जटरा फेन मुद्धा बावै उ मुद्धा कौनो पार्टीसे उठाइ नपरे हमार कार्यकालमे इ सक्कु मुद्धाके समाधान होए कहिके हम्रे चाहल बटी, ओकर लाग अपनेहुक्रे हम्रहीनहे सहयोग करे परल’, उहाँ कहलै ।
कार्यक्रममे बोलुइया अधिकांश वक्ताहुक्रे मुक्त कमैया पुर्नस्थापना तथा सामाजिक विकासके लाग बजेट विनियोजनके लाग आग्रह करल रहिट । ओस्टके मुक्त कमैया ओ मुक्त कमैया युवाहे सीप विकास तालिम, उद्यमशिलता तालिम, मुक्त कमैयाके जमिनके समस्या समाधानके लाग अधिकार सम्पन्न कार्यदल बनाके बैठल ठाउँके लालपुर्जा वितरण, मुक्त कमैयाके बालबालिकाके लाग प्राविधिक शिक्षा तथा उच्च तहसम निःशुल्क शिक्षा तथा स्वास्थ्य उपचारके व्यवस्थाके लाग ध्यानाकार्षण कराइल रहिट ।
मिलनपुर ओ विपतपुर मुक्त कमैया बस्ती बचाइक लाग तथा जग्गा कटान नियन्त्रणके लाग मोहना लडियामे तट्बन्ध निर्माण, खानेपानीके लाग खानेपानी तथा हेण्डपम्प ओ सिँचाईके लाग ओभरहेड टंकी, डिप बोरिङ्ग समेतके लाग ध्यानार्षण कराइल रहिट ।
कार्यक्रममे मुक्त कमैया समाजके केन्द्रिय अध्यक्ष पशुपति चौधरी, मुक्त कमैया समाज सुदूरपश्चिम प्रदेश अध्यक्ष चन्द्र प्रसाद चौधरी, मुक्त कमैया समाज भजनी नगर अध्यक्ष तेसराम चौधरी, विपतपुर बस्तीके भल्मन्सा दाउराम चौधरी, दिलरानी चौधरी, बुधराम चौधरी लगायत मुक्त कमैयाके समस्या ओ सम्बोधनके लाग अनुरोध करल रहिट ।
कार्यक्रम मुक्त कमैया समाज कैलारी अध्यक्ष झलारु चौधरीके अध्यक्षतामे हुइल रहे । मुक्त कमैया समाज कैलारीके उपाध्यक्ष रामु कुमालसे स्वागत करल कार्यक्रमके सञ्चालन विनोद चौधरी करल रहिट ।
