रानीकुन्डाके २१ मुक्त कमैयाहे सुरक्षित आवास हस्तान्तरण
पहुरा समाचारदाता
धनगढी, ६ बैशाख । कैलाली जिल्लाके बर्दगोरिया गाउँपालिका वडा नम्बर ३ रानीकुन्डाके २१ मुक्तकमैयाहे सुरक्षित आवास हस्तान्तरण कैगिल बा ।
सुदूरपश्चिम प्रदेश सरकार, भूमि व्यवस्था, कृषि तथा सहकारी मन्त्रालय, बर्दगोरिया गाउँपालिका ओ ह्याविट्याट फर ह्यूमानिटी नेपालके सहकार्य (राष्ट्रिय दलित नेटवर्कके सामाजिक परिचालन) मे रानीकुण्डाके मुक्तकमैया परिवारके लाग निर्मित २१ ठो सुरक्षित आवास अँटवारके रोज एक कार्यक्रमके विच हस्तान्तरण कैगिल हो ।
सुदूरपश्चिम प्रदेश सरकारक भूमि व्यवस्था, कृषि तथा सहकारी मन्त्रालयक मन्त्री विरबहादुर थापा लाभग्राही मुक्तकमैया परिवारहे सुरक्षित आवास निर्माण हुइल कागजातके प्रमाणपत्र हस्तान्तरण करल रहिट ।
मुक्त कमैयाके लाग बनागिल सुरक्षित आवासके कुल लागत रु.१ करोड ४७ लाख ६९ हजार ५३४ रुप्या २६ पैसा रहल बा । जेम्न भुमि व्यवस्था, कृषि तथा सहकारी मन्त्रालयके सर्शत अनुदान तथा वर्दगोरिया गाउँपालिकके संयुक्त लगानी रु. ७१ लाख ८४ हजार रहल बा ।
वसहेक ह्याविट्याट फर ह्यूमानिटी नेपाल ओ राष्ट्रिय दलित नेटवर्क नेपालके (सुरक्षित परियोजना) रु. ५२ लाख ५० हजार रहल बा । सुरक्षित आवास बनाइक लाग समुदायके जनश्रमदान लागत रु. २३ लाख ३५ हजार ५३४ रुप्या २६ पैसा रहल बा ।
सुरक्षित आवास हस्तान्तरण कार्यक्रममे बोल्टी मन्त्री विरबहादुर थापा सुदूरपश्चिम प्रदेश सरकार प्रदेशमे रहल मुक्तकमैया, हलिया पुनस्र्थापनाके लाग तयार रहल बटैलै । उहाँ कहलै, मुक्तकमैया, कमलरी, हलियाके तथ्याङक तथ्याङक ल्यानी तिनु तहके सरकार सवन्वय करी ओ पुनस्थापना कैना कटरा रुप्या लागी एक फेरा लाग पुनस्र्थापना करब । जौन प्रदेशमे बनल कार्यविधिमे व्यवस्था कैले बा ।
कार्यक्रममे सुदूरपश्चिम प्रदेश सरकारके पूर्व भूमि व्यवस्था, कृषि तथा सहकारी मन्त्री रमेश्वर चौधरी आपन पालामे मुक्तकमैया, कमलरी, हलिया पुनस्र्थापना कार्यविधि ल्यानल ओरसे पुनस्र्थापना कैना डगर खुलल बटैलै । उहाँ सुदूरपश्चिम प्रदेश ८८ स्थानीय तह मन्से ढेर पालिकामे यी कार्य विधि नैबनल ओरसे हाली बनैना आग्रह करलै ।
बर्दगोरिया गाउँपालिकाके अध्यक्ष कर्णबहादुर कुवँर अपने बर्दगोरियामे रहल सक्कु मुक्तकमैयाहे पुनस्र्थापना कैना तयार रहल बटैलै । उहाँ कहलै, गाउँपालिका भिटर रहल मुक्तकमैया, हलिया, कमलरीहुकनहे जौनफे आर्थिक, नैतिक सहयोग कैना तयार बा । उहाँहुकनके घर प्रदेश सरकारसे समन्वय करके बनैना तयार बा ।
ह्याविट्याट फर ह्यूमानिटी नेपालके पश्चिम प्रमुख पुनिता चौधरी अपनहुक्रे अभिनसम मुक्तकमैया, हलिया ओ विपन्न वर्ग भुमिहिनके लाग २५२ ठो सुरक्षित आवास घर बनासेकल बटैली । उहाँ नयाँ घर निर्माणसंगे मुक्तकमैया, हलिया ओ विपन्न वर्ग भुमिहिनके घरहे मर्मत सम्भारके लागफे आघे बह्रल बटैली ।
रानीकुण्डाके मुक्तकमैया परिवारमे महिलाहुक्रे केल्ह डेखा परल ओरसे रहल जग्गामे आयआर्जनमे ध्यान डेना आग्रह करली ।
आरडिएनके केन्द्रीय अध्यक्ष मोहन वड प्रदेश सरकार, स्थानीय तह, सस्था ओ स्थानीयहुकनके सहकार्य ओ समन्वयमे घर सुरक्षित आवास निर्माण हुइल बटैलै ।
लाभाग्राही मुक्तकमैया सुक्ली देवी चौधरी, सिङगी देवी चौधरी ओ जगतराम चौधरी अपनेहुक्रे सुरक्षित आवास पाके फोही लागल बटैलै । उहाँहुक्रे कहलै, हम्रे असिन घर पैबी कना सपनामे सोचल नैरही, घर निर्माण हुइलपाछे बहुट खुशी लागल बा ।
सुरक्षित आवासमे दुई ठो सुटना कोठा, एक ठो भन्सा कोठा ओ चर्पीफे रहल बा ।
सुरक्षित आवास निर्माण समितिके अध्यक्ष तुल्सीराम चौधरीके अध्यक्षतामे हुइल कार्यक्रममे ह्याविट्याट फर ह्यूमानिटी नेपालके कार्यक्रम संयोजक राममणि चौधरी, मन्त्रालयके सचिव शंकर शाह, आरडिएनके महासचिव पार्वती आग्री, कार्यक्रम संयोजक हुकुम सार्की, ह्याविट्याट फर ह्यूमानिटी नेपालके इन्जिनियर प्राविधिक अनुजराज जोशीलगायत भल्मन्सा ओ स्थानीहुकनके उपस्थिति रहे । कार्यक्रमके संचालन गोरख निरौला करल रहिट ।
