लोहरपुरमे बर्का भजहर कप फुटबल प्रतियोगिता हुइना

पहुरा समाचारदाता
धनगढी, ९ वैशाख । कैलालीके कैलारी गाउँपालिका वडा नम्बर ८, लोहारपुरमे थारु साँस्कृतिक छैठौं निसर्ग हस्पिटल बर्का भजहर कप फुटबल प्रतियोगिता सञ्चालन हुइना हुइल बा ।

युवा जनहित क्लबके अयोजनामे इहे बैशाख १६ गतेसे २३ गतेसम खेलकुद प्रतियोगिता हुइना बुधके धनगढीमे पत्रकार सम्मेलन मार्फत जानकारी डेहल हो । आयोजक क्लबके अनुसार फुटबल प्रतियोगिताके विजेता एक लाख ओ उपविजेता ५० हजार रुपैयाँ पुरस्कार पैना बटै ।

फुटबल प्रतियोगितामे १६ टिमके सहभागिता रहना जनाइल बा । प्रतियोगिताके मुख्य प्रायोजकमे निसर्ग हस्पिटल एण्ड रिसर्च सेन्टर धनगढी रहल बा । कैलारी गाउँपालिका मुख्य प्रवर्धकके रुपमे रहल बा । टमान संघ संस्था तथा निजि व्यवसायिक फर्म फेन प्रायोजन ओ प्रबद्र्धन कैके साथ डेहल आयोजक जानकारी डेले बा ।

थारु समुदायके लोप हुइटी गैल मौलिक लोक पर्व तथा संस्कृति संरक्षण सम्बद्र्धन कैना उद्देश्यसे भजहरके अवसरमे हरेक बरस खेलकुद प्रतियोगिता आयोजना कैटी आइलमे इ बरस फेन निरन्तरता डेहल क्लबके अध्यक्ष साँधुराम चौधरी बटैलै । उहाँ फुटबल प्रतियोगिता सँगे थारु समुदायके परम्परागत खेलकूद फेन आयोजना कैना बटैलै । अध्यक्ष चौधरीके अनुसार फुटबल प्रतियोगिताके साथे थारु समुदायके महिला छुर, डेल्वा दौड, टाँरा चिरौवर, कबड्डी, कुइली दिदी तथा पुरुष डेगा दौड लगायतके प्रतियोगिता फेन आयोजना कैना बटैलै ।

थारू समुदायमे रोगव्याधि लागे नैडेहक लाग भजहर पूजा कैना चलन रहल बा । गाउँसे कुछ डुर रुख्वक छँहुरीटर रमाइलो कैटी भजहर भागजाइठ् । इ पूजामे गाउँके गुरुवा गाउँघरमे रोगव्याधि नआए, बालबच्चा सुखीखुसी रहिट, गोरु, गैया, भैँसीनहे रोगव्याधि नलागे ओ खेतीपातीमे किराके प्रकोप नहोए कहिके पूजा कैना चलन रहल बा ।