नेपाल वितरक महासंघके १४औं साधारण सभा हुइना
पहुरा समाचारदाता
धनगढी, १० वैशाख । नेपाल वितरक महासंघके १४औं वार्षिक साधारण सभा काल्ह ओ परौँ (यही वैशाख ११ ओ १२ गते) सुदूरपश्चिम प्रदेशके राजधानी धनगढीमे हुइना बा ।
मंगरके रोज धनगढीमे आयोजित पत्रकार सम्मेलनमार्फत महासंघके अध्यक्ष दुर्गा गौतम साधारण सभाके तयारी अन्तिम चरणमे पुगल जानकारी डेलै । उहाँक अनुसार सभाके उदघाटन सुदूरपश्चिम प्रदेश प्रमुख नाजिर मियाँ कैही ।
’आन्तरिक पर्यटन प्रवद्र्धन ओ देशभरके वितरकबीचके एकता मजबुत बनैना उद्देश्यसे धनगढीमे साधारण सभा आयोजना करल हो,’ अध्यक्ष गौतम कहलै ।
२०६६ सालमे स्थापना हुइल महासंघ दैनिक उपभोग्य वस्तु द्रुत गतिमे बिक्री हुइना उपभोक्ता वस्तु (एफएमसीजी)के वितरण कैना जिल्ला वितरक संघके छाता संगठन हो । १७ वर्षके अवधिमे महासंघ ४५ जिल्लामे विस्तार हुसेकल बा ।
महासंघसे २०७२ सालके महाभूकम्प, २०७६ सालके कोभिड महामारी ओ २०८० सालके जाजरकोट भूकम्पके समयमे जोखिम मोलके अति आवश्यक वस्तुके आपूर्ति व्यवस्था चालु राखल अध्यक्ष गौतम स्मरण करलै । ’हम्रे नाफामुखिसेफे जिम्मेवारी लेके आपूर्ति व्यवस्थापनके पुलके रुपमे काम कैना व्यवसायी हुई,’ उहाँ कहलै ।
पत्रकार सम्मेलनमे पछिल्का समय अन्तर्राष्ट्रिय बजारमे इन्धनके मूल्य अत्यधिक बह्रेबेर ढुवानी लागत महँगा ह्ुइल ओ हरेक पसलसम सामान पुगैना चुनौती थपल अध्यक्ष गौतम जानकारी डेलै ।
साधारण सभामे देशभरके ४५ जिल्लाके ३०० ढेर वितरक प्रतिनिधिके सहभागिता रहन आयोजक जनाइल बा ।
