लागुऔषध सहित १० जाने पक्राउ

पहुरा समाचारदाता
धनगढी, ११ बैशाखा । कैलाली ओ कञ्चनपुरके अलग अलग ठाउँसे अवैध लागुऔषधसहित १० जाने पक्राउ परल बटै ।
कैलालीके गोदावरी न.पा.१ से ५१० मिलिग्राम लागुऔषध खैरो हेरोईन सहित उहे ठाउँ बैठना बर्ष २५ के राजन हमालहे प्रहरी पक्राउ करले बा ।

विशेष सूचनाके आधारमे हुकान घर लग्गे रहल मुरगी फर्मके टरे लुकाई छिपाई राखल अवस्थामे सुदूरपश्चिम प्रदेश प्रहरी कार्यालय समेतसे खटल प्रहरी टोलीसे शंका लागके चेकजाँच करेबेर हुकान थेनसे उ उ पदार्थ फेला पारल रहे ।

ओस्टेक करके कैलाली घोडाघोडी न.पा.५ देउकलियासे साडेपानी बैठना बर्ष १९ के पुर्ण बहादुर बिष्ट ओ बर्ष १९ के सुरज नेपालीहे नियन्त्रित लागुऔषध नाइट्रजिपाम १७० टयाब्लेटस ओ चक्कु थान १ (एक) सहित प्रहरी पक्राउ करले बा ।

इलाका प्रहरी कार्यालय सुखड, कैलालीसे खटल प्रहरी हुकान थेनसे उ लागुऔषध फेला पारके पक्राउ करल हो ।
ओस्टेक कैलाली धनगढी उ.म.न.पा.२ पुरान भन्सार रोडसे ४८० मिलिग्राम लागुऔषध खैरो हेरोईनसहिट उहे ठाउँ बैठना बर्ष २८ के जीवन बहादुर खड्का ओ कञ्चनपुरके पुनर्बास न.पा.६ बैठना १८ बर्षिय किशोरीहे प्रहरी पक्राउ करल हो ।

जिल्ला प्रहरी कार्यालय कैलालीसे खटल प्रहरी टोलीसे लागुऔषध सेवन करटी रहल अवस्थामे ओइनके थेनसे उ पदार्थ फेला पारके, आवश्यक प्रक्रिया पुरा करके उ पदार्थ सहित ओइनहे पक्राउ करल हो ।

ओस्टे कञ्चनपुर कृष्णपुर न.पा.५ कञ्चन बहुमुखी क्याम्पस लग्गेसे ४३० मिलिग्राम लागुऔषध खैरो हेरोईनसहित उहे ठाउँ बैठना बर्ष ३२ के हर्क बहादुर देउवा ओ उहे नगरपालिका ६ सिङपुर बैठना बर्ष ३६ के दिल बहादुर चौधरीहे प्रहरी पक्राउ करल हो ।
लागुऔषध सेवन करटी बटै कना गोप्य सूचनाके आधारमे इलाका प्रहरी कार्यालय गुलरिया, कञ्चनपुरसे खटल प्रहरी टोलीसे दुनहुनहे उ पदार्थ फेला पारी आवश्यक प्रक्रिया पुरा करके पक्राउ करल हो ।

ओस्टे कञ्चनपुर दोधारा चाँदनी न.पा. २ लठ्ठाघाट स्थित उहे ठाउँ बैठना वर्ष ४० के गोर्खे दमाईसे सञ्चालन करल पसलसे ९ ग्राम ८३० मिलिग्राम लागु औषध चरेशसहित उहाँ ओ उहाँक १८ बर्षिय छावाहे प्रहरी पक्राउ करले बा ।

इलाका प्रहरी कार्यालय दोधरा चाँदनी, कञ्चनपुरसे खटल प्रहरी टोली शंका लाग चेकजाँच करेबेर उ पदार्थ फेला पारके आवश्यक प्रक्रिया पुरा करके उ पदार्थ सहित ओइनहे पक्राउ करल हो ।

ओस्टे कञ्चनपुर शुक्लाफाँटा न.पा.१० नगरपालिका रोडसे २१.४७ ग्राम लागूऔषध चरेशसहित उहे नगरपालिका ९ सिसैया बैस्ना बर्ष ७० के भीम बहादुर ऐरहे प्रहरी पक्राउ करले बा ।

इलाका प्रहरी कार्यालय झलारी, कञ्चनपुरसे खटल प्रहरी टोलीसे संकास्पद बैठल अवस्थामे चेकजाँच करेबेर उ पदार्थ फेला पारके आवश्यक प्रक्रिया पुरा करके उ पदार्थ सहित ओइनहे पक्राउ करल हो ।