किसानके समस्या क्रमश: समाधान कैबी- मन्त्री चौधरी
पहुरा समाचारदाता
धनगढी, २० वैशाख । कृषि तथा पशुपन्छी विकास एवम् वन तथा वातावरणमन्त्री गिता चौधरी किसानके समस्याहे सरकारसे समाधान करटी लैजैना बटैले बटी ।
धनगढी नगर भल्मन्सा समितिसे अँटवार धनगढीमे आयोजना गरेको भेटघाट एवम् कृषि संवाद कार्यक्रममे उहाँ सरकारसे आपन कार्य योजनानुसार किसानके सक्कु समस्या समाधान कैना बटाइल हुइट । रासायनिक मलके प्रयोगसे जग्गाके अवस्था एकदम बिगरसेकल कहटी मन्त्री कहलै,“सरकारसे माटीक जाँचक कार्य आघे बढासेकल बा ।”
बह्रटी रासायनिक मलके प्रयोगके कारण भान्सामे विष पक्टी रहल कहटी चौधरी सरकारसे प्राङ्गारिक मलके प्रयोगहे बढावा डेना बटैली । उहाँ बाँझ जग्गा उपयोग कैना विषयमे अध्ययन, अनुसन्धान करके आघे बह्रना उल्लेख करली । कृषि क्षेत्रके समस्या समाधानके लाग कृषि सम्बन्धी पुराना ऐन, कानुन संशोधन कैना ओ समय सापेक्ष नयाँ कानुन ल्यन्ना मन्त्रीके कहाई बा ।
किसान परिवारसे प्रतिनिधित्व करल कारण किसानके समस्या अपने बुझल उल्लेख करटी मन्त्री चौधरी ठप्ली,“सक्कु जानेक सल्लाह, सुझाव लेके मै कृषकके समस्या समाधानके लाग काम करम ।”
कृषकके ओरसे धनगढी नगर भल्मन्सा समितिके अध्यक्ष रोहित चौधरी मन्त्री चौधरीहे मागपत्र बुझाइल रहिट । किसानसे सहुलियत दरमे समयमे किसानहे मलखाद, इन्धन उपलब्ध हुईपर्ना, कृषि उपकरण सहुलियतमे उपलब्ध हुईपर्ना माग करल रहिट । ओस्टेक करके, किसानसे उत्पादन करल वस्तुके खरिद समर्थन हुईपर्र्ना, उचित भण्डारनके व्यवस्था हुईपर्ना, छाडा चौपायाके व्यवस्थापन हुईपर्ना माग करले बटै ।
कृषिमे बिचौलिया हाबी रहल उल्लेख करटी समितिके अध्यक्ष चौधरी वास्तविक किसानके पहिचान कैना आवश्यक रहल औंल्यइलै । उहाँ कृषि यान्त्रिक उपकरण पैसा ओ पहुँचमे वितरण हुइना करल कारण वास्तविक किसानसे ओसिन उपकरण पाई नैसेकल बटैली ।
कार्यक्रममे थारु कल्याणकारिणी सभा कैलालीके निबर्तमान कार्यवाहक सभापति माधव थारु कैलाली कञ्चनपुरमे थारु समुदाय ढेर जैसिन बस्ती सामुदायिक वनके किनारमे रहल कहटी अब्बे सरकारसे सार्वजनिक जग्गा खाली करैनामे लागल बेला थारु समुरदायके घरवार विहिन हुइना बटैैलै । उहाँ थरुहट आन्दोलनके बेला टीकापुर घटनामे ढेर थारु समुदायके व्यक्तिउप्पर मुद्दा लागल कहटी सरकारसे ओकर समाधान कैना आग्रह करलै ।
थारु बुद्धिजिवी कुन्ना नारायण चौधरी भारतसे आलु प्याजके निर्यातसे यहाँके किसान मारमे परल कहटी उहीसे रोकथाम कैना आग्रह करलै । थारु बुद्धिजीवि रामदास चौधरी कृषि यान्त्रीकरण अनुदानमे नाउँमे गैर कृषकसे फाइदा लेहल बटैलै ।
पत्रकार अविनास चौधरी कैलाली जिल्लाके कैलारी गाउँपालिका वडा नम्बर ७ ओ पाँचमे हजारौ वाढी पीडित ओ मुक्तकमैया सामुदायिक वनके जग्गामे बैठना बाध्य रहल कहटी सरकारसे हटाई कलेसे ओकर कुछ विपल्प डेना आग्रह करलै । उहाँ कहलै, वाढ पीडित वनके किनारमे बाध्य हुके बैठल हुइट । यदि सरकार हटाई कलेसे मोहना कटैनी लडियामे अइना बाढ ओ कटानमे विकल्प खोज्ना जरुरी बा ।
कार्यक्रममे महेश चौधरी, प्रेम चौधरी, उन्नती चौधरीलगायतसे मन्त्री चौधरीहे थारु समुदाय, मुक्तकमैया कमलरी, ओ किसानहे समस्याबारे बाट राखल रहिट ।
